Mmanie Ẹdi Mme Ata Isụn̄utom Emem?
KE May 31, 1996, mme itie usuanetop ẹma ẹtan̄a se iketiede nte etop emem. Ke usen oro ekebemde iso, ukara ama ọnọ ntọt ndisọn̄ọ nte ke Benjamin Netanyahu, emi okoyomde ndikabade ndi akpan isụn̄utom ukara Israel, ama “enen̄ede esịn idem ke n̄kaiso edinam usịn emem, emem ye ifụre, ke ufọt idụt Israel ye kpukpru mbọhọidụn̄ esie, esịnede Palestine.”
Edimek Netanyahu oro ẹketọtde ntatara ntatara ama anam ediwak owo ẹyịk m̀mê emem ke Ufọt Ufọt Edem Usiahautịn ekeme ndidi ata idem n̄kpọ. Ke edide ntre, nte mme idụt efen ẹkeme ndikpebe Israel, ẹfrede ẹban̄a utọk mmọ?
Nte ededi, edi mmemmem n̄kpọ ndin̄wọn̄ọ emem akan ndida enye ndi. Ke ẹfiọkde emi, ediwak owo ẹma ẹnyene eyịghe. Nte Hemi Shalev, ọkọmbụk n̄kpọntịbe, ekesịnde enye, “mbahade iba ke otu mbio obio Israel idahaemi ẹnyene ekikere nte ke edinyan̄a emekpere, ndien mbon eken ẹnịm ẹte ke enye odu ke hell ke isọn̄.” Ke nditịn̄ ibio ibio, enye ọkọdọhọ ete: “Ndusụk owo ke ẹdat esịt; mmọ eken ke ẹtuan̄a.”
Ntre ke esidi ye mme ukeme oro mme owo ẹsịnde ndida emem ndi. Edikan oro adaiso kiet ye nsan̄a esie ẹnyenede ọwọrọ edikpu ọnọ otu efen. Unana edikop uyụhọ ada esịm edikpu, ndien edikpu, esiwak ndida nsịm nsọn̄ibuot. Edide ke Ufọt Ufọt Edem Usiahautịn, Latin America, N̄kan̄ Edem Usiahautịn Europe, m̀mê ke ebiet en̄wen ekededi—mme ukeme oro ubonowo esịnde ndida emem ndi ẹdi abian̄a abian̄a.
Ata Emem Emekpere!
Ke ini emi emem ke Ufọt Ufọt Edem Usiahautịn ekedide akpan ibuotikọ nneme, ẹma ẹkop etop efen aban̄ade emem. Emi ikedịghe utịn̄ikọ mbre ukara oro ẹketọtde ntatara ntatara; ikonyụn̄ idịghe ediomi emem ke ufọt mme idụt. Utu ke oro, etop emi akatan̄a emem oro edidide ebe ke Obio Ubọn̄ Abasi kpọt. Ẹkekop etop emi ke m̀mọ̀n̄? Ke se ibede Mme Mbono District “Mme Isụn̄utom Emem Abasi” 1,900 ẹmi Mme Ntiense Jehovah ẹkenịmde ke ofụri ererimbot ke 1996/97.
Ẹma ẹnam an̄wan̄a ke mbono ẹmi nte ke idụhe ukara owo oro ekemede ndida ata emem ye ifụre ndi. Ntak-a? Koro emi oyoyom ẹda utịt ẹsọk mme n̄kpọ oro ẹnamde nnyịn ikûnyene emem ke usen ke usen. Ata emem ọwọrọ ndidemede kpukpru usenubọk ye unana ndịghe otode ekọn̄ m̀mê afai. Enye ọwọrọ unana ubiatibet, unana edidọn̄ ukpọhọde ke mme usụn̄ufọk nnyịn, unana edikop ndịk ndisan̄a ke mme efak, unana n̄wụre ke mme ubon. Efe ukara ke isọn̄ ikeme ndinam kpukpru oro? Ke nditịm ntịn̄, efe ukara ke isọn̄ ekpekeme ndikam n̄n̄wọn̄wọn̄ọ ndida emi ndi?
Nte ededi, Obio Ubọn̄ Abasi ekeme oyonyụn̄ ada mme n̄kpọ ẹmi ẹdi. Bible ọn̄wọn̄ọ ete: “Sese, ebiet idụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Ediyarade 21:3, 4) Nso ubọhọ ke oro edida ntem ọsọk ubonowo oro okụtde ndutụhọ!
Un̄wọn̄ọ Jehovah Abasi idịghe ikpîkpu un̄wọn̄ọ. Bible ọsọn̄ọ ọnọ nnyịn ete: “Abasi idịghe owo eke enye okposude nsu, inyụn̄ idịghe eyen owo eke enye okpokpụhọde. Nte enye ọdọhọ, ndien etre ndinam? Nte enye ọn̄wọn̄ọ, ndien etre ndinam osu?” (Numbers 23:19, 20a) Ih, se Abasi ọkọn̄wọn̄ọde oyosu—adade edidiọn̄ ọsọk kpukpru mbon oro ẹsọn̄ọde ẹda ke n̄kan̄ esie.
Mme Isụn̄utom Emem Abasi
Ẹtịm ẹdiọn̄ọ Mme Ntiense Jehovah kaban̄a ifịk ifịk ukwọrọikọ mmọ mban̄a Obio Ubọn̄ Abasi. Kpukpru isua, ofụri mmọ ẹsisịn se iwakde ikan biliọn hour kiet ndibuana ọnọ-nsịnudọn̄ etop Bible ye mbon en̄wen. Emi edi ke ndisu mme ikọ Jesus ẹmi: “Ẹyenyụn̄ ẹkwọrọ [eti mbụk, NW] Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Etop oro Mme Ntiense ẹnọde edi “eti mbụk” ke akpanikọ, koro enye atan̄ade Obio Ubọn̄ Abasi eke heaven nte n̄kukụre idotenyịn ubonowo. Ndien nso eti idotenyịn ke emi edi ntem ọnọ ini iso!
Idem idahaemi Obio Ubọn̄ Abasi ke anam mme andidu ke idak esie ẹnyene ata mbọbọ emem ye ima nditọete. Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Mme Ntiense Jehovah ẹdomo ndidu uwem ekekem ye akpan n̄kpọ oro ẹyomde mi ẹto ata Ido Ukpono Christ. Nte utịp, ekemmọ edi utịbe utịbe itie nditọete emi adiande mme Jew ye mbon Arabia, mbon Croatia ye mbon Serbia, mbon Hutu ye mbon Tutsi, ọtọkiet. Emem oro ediwak ke otu ubonowo ẹkemede n̄kukụre ndikekere mban̄a mi edi se ediwak miliọn Mme Ntiense Jehovah ke ofụri ererimbot ẹnyenede.
Ẹma ẹnọ nsịnudọn̄ ndika iso nda mme edumbet Bible ndu uwem nnyụn̄ n̄ka iso n̄kwọrọ eti mbụk Obio Ubọn̄ Abasi ke ndutịm Mbono District “Mme Isụn̄utom Emem Abasi” oro. Nnyịn imọnọ fi ikot ndikot ntọt etienede mi emi aban̄ade edemede-owo-udọn̄ mbono usen ita emi ediwak miliọn owo ẹkedarade.