Mme Mbụme Ẹtode Mme Andikot

Jesus ọkọdọhọ ete: “Owo ekededi eke mbufo ẹfende mme idiọk-n̄kpọ, ẹmefen mmọ mme idiọk-n̄kpọ mmọ; owo ekededi eke mbufo ẹmụmde mme idiọk-n̄kpọ ẹnịm, ẹmụm mme idiọk-n̄kpọ mmọ ẹnịm.” Ndi ikọ ẹmi ẹwọrọ ke mme Christian ẹkeme ndifen mme idiọkn̄kpọ?

Isọn̄ N̄wed Abasi ndomokiet idụhe ndibiere nte ke Abasi ọnọ mme Christian ke ofụri ofụri, m̀mê idem mbiowo oro ẹmekde ke mme esop, odudu ndifen mme idiọkn̄kpọ. Edi, se Jesus eketịn̄de ọnọ mme mbet esie ke John 20:23, oro ẹkotde ke enyọn̄ emi, owụt ete ke Abasi ama ọnọ mme apostle san̄asan̄a odudu ke afan̄ emi. Ndien utịn̄ikọ Jesus do ekeme ndinyene ebuana ye se enye eketịn̄de ke Matthew 18:18 aban̄a mme ubiere eke heaven.

Mme Christian ẹkeme ndifen ndusụk ndudue, ke n̄kemuyo ye item apostle Paul oro ẹwetde ke Ephesus 4:32 ẹte: “Ẹfọn ido ye kiet eken, ẹnyụn̄ ẹnyene esịt mbọm, ẹnyụn̄ ẹfen kiet eken, kpa nte Abasi okonyụn̄ efende mbufo ke Christ.” Paul mi eketịn̄ aban̄a mme ọkpọkpọ mfịna ke ufọt mme Christian, utọ nte utịn̄ikọ oro owo mîwụtke mbufat. Mmọ ẹkpedomo ndibiere n̄kpọ ẹmi, ẹfende kiet eken. Ti mme ikọ Jesus: “Mmọdo edieke adade enọ fo edi ke itie-uwa, onyụn̄ etide do ete, eyen-ete fo enyene ikọ ye afo, kpọn̄ enọ fo do ke iso itie-uwa, ka kebem iso nam emem ye eyen-ete fo, ndien di diwa enọ fo.”—Matthew 5:23, 24; 1 Peter 4:8.

Nte ededi, udọn̄ikọ eke John 20:23 ọnọ ekikere ete ke Jesus eketịn̄ otụk mme akpan idiọkn̄kpọ, nte ẹwụtde ebe ke n̄kpọ efen oro enye eketịn̄de ọnọ san̄asan̄a otuowo emi. Ẹyak nnyịn ise ntak.

Ke usen oro ẹkenamde enye eset ke n̄kpa, Jesus ama ọbiọn̄ọ mme mbet esie ke iso ke ubet oro ẹkekọbide-kọbi usụn̄ ke Jerusalem. Mbụk oro ọdọhọ ete: “Jesus ọtọn̄ọ ntak ọdọhọ mmọ ete, Emem osụk odu ye mbufo. Nte Ete okosiode Mi ọdọn̄, kpa ntre ke Ami nnyụn̄ nsio mbufo ndọn̄. Ndien ke Enye ama eketịn̄ ntem, ọduọk mmọ ibifịk ke idem, onyụn̄ ọdọhọ mmọ ete, Ẹbọ Edisana Spirit: owo ekededi eke mbufo ẹfende mme idiọk-n̄kpọ, ẹmefen mmọ mme idiọk-n̄kpọ mmọ; owo ekededi eke mbufo ẹmụmde mme idiọk-n̄kpọ ẹnịm, ẹmụm mme idiọk-n̄kpọ mmọ ẹnịm.”—John 20:21-23.

Eyedi mme mbet oro ẹtịn̄de ẹban̄a ẹkenen̄ede ẹdi mme anam-akpanikọ apostle. (Men Joh 20 ufan̄ikọ 24 domo.) Ebede ke ndiduọk mmọ ibifịk nnyụn̄ ndọhọ, “Ẹbọ Edisana Spirit,” Jesus ke ndamban̄a usụn̄ ama asian mmọ ete ke mîbịghike ẹyen̄wan̄a edisana spirit ẹduọk mmọ. Jesus ama akaiso ndidọhọ nte ke mmọ ẹyenyene odudu ndifen mme idiọkn̄kpọ. Nte owụtde eti ibuot, utịn̄ikọ esie iba oro ẹnyene ebuana, kiet adade osịm efen.

Usen 50 toto ke ediset ke n̄kpa esie, ke usen Pentecost, Jesus ama an̄wan̄a edisana spirit ọduọk. Nso ke oro ọkọyọhọ? N̄kpọ kiet edi, mbon oro ẹkebọde spirit oro ẹma ẹfiak ẹmana nte nditọ Abasi eke spirit ẹmi ẹnyenede idotenyịn edidi ekemmọ mme andikara ye Christ ke heaven. (John 3:3-5; Rome 8:15-17; 2 Corinth 1:22) Edi edin̄wan̄a spirit oro nduọk ama anam n̄kpọ efen efen. Ndusụk mbon oro ẹkebọde enye ẹma ẹnyene utịbe utịbe odudu. Ebede ke enye ndusụk owo ẹma ẹkeme ndisem isen usem oro mmọ mîkọfiọkke. Mbon en̄wen ẹma ẹkeme nditịn̄ prọfesi. Edi mbon en̄wen ẹma ẹkeme ndinam mbon udọn̄ọ ẹkop nsọn̄idem m̀mê ndinam mme akpan̄kpa ẹset ẹdinyene uwem.—1 Corinth 12:4-11.

Sia ikọ Jesus ke John 20:22 akanyande ubọk owụt edin̄wan̄a edisana spirit emi nduọk mme mbet ke idem, etie nte mme ikọ esie oro ẹtienede ẹmi ẹban̄ade edifen mme idiọkn̄kpọ ẹwọrọ ke ebede ke spirit ndidu ke edinam ke Abasi ama ọnọ mme apostle n̄wọrọnda odudu ndifen m̀mê ndimụm mme idiọkn̄kpọ nnịm.—Se Enyọn̄-Ukpeme (Ikọmbakara), eke March 1, 1949, page 78.

Bible inọhọ nnyịn ọyọhọ mbụk oro aban̄ade kpukpru ini ẹmi mme apostle ẹkedade utọ odudu oro ẹnam n̄kpọ, edi enye inyụn̄ iwetke kpukpru idaha ẹmi mmọ ẹkedade utịbe enọ editịn̄ ikọ ke usem, editịn̄ prọfesi, m̀mê edikọk udọn̄ọ ẹnam n̄kpọ.—2 Corinth 12:12; Galatia 3:5; Mme Hebrew 2:4.

N̄kpọntịbe kiet oro akabuanade odudu oro mme apostle ẹkenyenede ndifen m̀mê ndimụm mme idiọkn̄kpọ nnịm akabuana Ananias ye Sapphira, ẹmi ẹkesude nsu ẹnọ spirit. Peter, emi okokopde Jesus etịn̄de ikọ oro nnyịn ikotde ke John 20:22, 23, ama ayarade Ananias ye Sapphira. Peter ekebem iso etịn̄ ikọ ye Ananias, emi akakpade ke ebe oro. Ke ini Sapphira ke ukperedem okodụkde edi onyụn̄ etienede osu nsu oro, Peter ama atan̄a ubiereikpe esie. Peter ikefenke idiọkn̄kpọ esie edi ọkọdọhọ ete: “Sese, ukot owo ẹmi ẹkebụkde uberi ẹda ke enyịn-usụn̄, mmọ ẹyenyụn̄ ẹmen fi ẹwọrọ.” Enye n̄ko ama akpa ke ebe oro.—Utom 5:1-11.

Ke uwụtn̄kpọ emi apostle Peter akada san̄asan̄a odudu ndiwụt akpan edimụm idiọkn̄kpọ nnịm, kpa utịbe utịbe ifiọk nte ke Abasi idifenke idiọkn̄kpọ Ananias ye Sapphira. Etie nte mme apostle n̄ko ẹma ẹnyene ifiọk oro akande eke owo ẹban̄a mme idaha ẹmi mmọ ẹkenịmde ẹte ke ẹma ẹfen mme idiọkn̄kpọ ke isọn̄ uwa Christ. Ntre mme apostle oro ẹkenọde odudu spirit mi ẹma ẹkeme nditan̄a edifen nnọ m̀mê edimụm mme idiọkn̄kpọ nnịm.a

Emi iwọrọke ite ke kpukpru mbiowo oro ẹkeyetde aran ke spirit ke ini oro ẹma ẹnyene utọ utịbe utịbe odudu oro. Nnyịn imekeme ndikụt oro nto se apostle Paul eketịn̄de aban̄a eren oro ẹkesiode ẹfep ke esop Corinth. Paul ikọdọhọke ite, ‘Mmefen mme idiọkn̄kpọ eren oro’ m̀mê ndikam ndọhọ, ‘Mmọfiọk nte ke ẹfen ẹnọ eren oro ke heaven, ntre ẹfiak ẹda enye.’ Utu ke oro, Paul ekesịn udọn̄ ọnọ ofụri esop ndifen nnọ Christian emi ẹkefiakde ẹda mi nnyụn̄ n̄wụt enye ima. Paul ama adian ete: “Owo emi mbufo ẹfende enye n̄kpọ ke ami mfen n̄ko.”—2 Corinth 2:5-11.

Ndondo oro ẹkefiakde ẹda eren oro ẹsịn ke esop, kpukpru nditọete Christian iren ye iban ẹkenyene ndifen nnọ enye ke usụn̄ifiọk editre ndikama udu mban̄a se enye akanamde. Akpa, nte ededi, enye ekenyene ndikabade esịt ẹkenyụn̄ ẹnyene ndifiak nda enye. Didie ke emi eketịbe?

Mme akwa idiọkn̄kpọ ẹdu ẹmi mbiowo esop ẹnyenede ndise mban̄a, utọ nte uyịpinọ, usu nsu, m̀mê akwa oburobụt ido. Mmọ ẹsidomo ndinen̄ede nnyụn̄ nsua nnọ mme utọ anamidiọk oro, ẹdemede mmọ ndikabade esịt. Edi edieke owo ye unana edikabade esịt anamde akwa idiọkn̄kpọ, mbiowo ẹmi ẹsitiene ndausụn̄ Abasi ndisio anamidiọk oro mfep. (1 Corinth 5:1-5, 11-13) Se Jesus eketịn̄de ke John 20:23 inyeneke n̄kpọ ndinam ke mme utọ idaha oro. Mbiowo ẹmi inyeneke mme utịbe utịbe enọ eke spirit, utọ nte ukeme edinam ọdọn̄ọ udọn̄ọ okop nsọn̄idem m̀mê ndinam mme akpan̄kpa ẹset; mme enọ oro ẹma ẹyọhọ uduak mmọ ke akpa isua ikie ndien ekem ẹtre. (1 Corinth 13:8-10) N̄ko-n̄ko, mbiowo mfịn inyeneke odudu Abasi ndifen akwa idiọkn̄kpọ ke usụn̄ifiọk eke edidọhọ ke anam akwa idiọkn̄kpọ asana ke enyịn Jehovah. Orụk edifen nnọ emi enyene ndibe ke isọn̄ uwa ufak, ndien Jehovah kpọt ekeme ndifen nnọ ke isọn̄ oro.—Psalm 32:5; Matthew 6:9, 12; 1 John 1:9.

Nte eketịbede ọnọ eren oro ke Corinth eset, ke ini anam akwa idiọkn̄kpọ esịnde ndikabade esịt, ẹnyene ndisio enye mfep. Edieke enye ke ukperedem akabarede esịt onyụn̄ anamde utom eke odotde ye edikabade esịt, edifen nnọ otode Abasi ekeme ndidu. (Utom 26:20) Ke utọ idaha oro, N̄wed Abasi ọnọ mbiowo ntak ndinịm nte ke Jehovah ke akpanikọ emefen ọnọ anamidiọk oro. Ekem, ndondo oro ẹfiakde ẹda owo oro, mbiowo ẹkeme ndin̄wam enye ke n̄kan̄ eke spirit ndikabade nsọn̄ idem ke mbuọtidem. Mbon eken ke esop ẹkeme ndifen ke ukem usụn̄ oro mme Christian ke Corinth ẹkefende ẹnọ eren oro ẹkesiode ẹfep emi ẹkenyụn̄ ẹfiakde ẹda adan̄aoro.

Ke ndise mban̄a mme n̄kpọ ke usụn̄ emi, mbiowo inịmke mme idaha ubiereikpe idemmọ. Mmọ ẹda mme edumbet Bible ẹsịn ke edinam ẹnyụn̄ ẹtiene mme ndutịm N̄wed Abasi oro Jehovah onịmde ketket. Ntem, edifen ekededi m̀mê editre ndifen ke n̄kan̄ mbiowo edidi ke usụn̄ifiọk aban̄ade mme ikọ Jesus ke Matthew 18:18: “Ke akpanikọ ke ndọhọ mbufo nte, n̄kpọ ekededi eke mbufo ẹdibọpde ke isọn̄, ẹyebọp ke heaven; n̄kpọ ekededi eke mbufo ẹdinyụn̄ ẹtatde ke isọn̄, ẹyetat ke heaven.” Mme edinam mmọ ẹyekam ẹwụt nte Jehovah esede mme n̄kpọ nte ẹwụtde ke Bible.

Mmọdo, se Jesus eketịn̄de, nte ẹwetde ke John 20:23, ituahake ye mme itie eken ke N̄wed Abasi, edi enye owụt ete ke mme apostle ẹma ẹnyene san̄asan̄a odudu kaban̄a edifen nnọ, ke n̄kemuyo ye san̄asan̄a udeme oro mmọ ẹkenyenede ke ntọn̄ọ ntọn̄ọ esop Christian.

[Ikọ idakisọn̄]