Buọt Idem Ke Jehovah Ye Ikọ Esie
“Mmọ eke ẹfiọkde enyịn̄ fo ẹyebuọt idem mmọ ye afo.”—PSALM 9:10.
1. Ntak emi nnyịn isụk ikemede ndinyene mbuọtidem ke Jehovah ye Ikọ esie ke eyo nnyịn emi-e?
KE ERERIMBOT eyomfịn, ikot oro ẹnọde ẹte ẹbuọt idem ke Abasi ye Ikọ esie, kpa Bible, ekeme nditie nte se mînyeneke ufọn ye se owo mîkemeke ndinam. Edi, ini oro ebede owụt nte ọniọn̄ Abasi edide akpanikọ onyụn̄ enyenede ufọn. Andibot eren ye n̄wan edi Anditọn̄ọ ndọ ye ubon, ndien enye ọfiọk mme n̄kpọ oro nnyịn iyomde ọfọn akan nte owo efen ekededi ọfiọkde. Kpa nte mme akpan n̄kpọ oro owo oyomde mîkpụhọkede, kpa ntre ke mme akpan usụn̄ ndida nnyene mme n̄kpọ ẹmi ẹsụk ẹdi ukem. Ọniọn̄ ọniọn̄ item eke Bible, okposụkedi ẹkewetde ẹnịm ediwak isua ikie ẹmi ẹkebede, osụk ọnọnọ mfọnn̄kan ndausụn̄ kaban̄a edikụt unen ke uwem ye ke edikọk mme mfịna. Nditiene enye esisụn̄ọ ke ekese inemesịt—idem ke awak-n̄kukọhọ ererimbot ifiọk ntaifiọk emi nnyịn idude uwem!
2. (a) Nso nti mfri ke edinịm mme ewụhọ Abasi osion̄o ke uwem ikọt Jehovah? (b) Nso n̄kpọ efen ke Jehovah ọn̄wọn̄ọ ọnọ mbon oro ẹkopde uyo ẹnọ enye ye Ikọ esie?
2 Ndibuọt idem ke Jehovah nnyụn̄ nda mme edumbet Bible nsịn ke edinam ada nti ufọn edi kpukpru usen. Ẹkụt akpanikọ emi ke uwem ediwak miliọn Mme Ntiense Jehovah ke ofụri ererimbot ẹmi ẹnyenede mbuọtidem ye uko ndida mme item Bible nsịn ke edinam. Ye mmọ, mbuọtidem ke Andibot ye Ikọ esie idịghe ndudue. (Psalm 9:9, 10) Edinịm mme ewụhọ Abasi anam mmọ ẹdi nti owo ke ini edide edisịm usanaidem, edinam akpanikọ, edinam utom ọkpọsọn̄, ediwụt ukpono nnọ uwem ye inyene mbon efen, ye edifara ke idem ke udia ye edin̄wọn̄ n̄kpọ. Emi ada okosịm edinyene ima oro odotde ye edinọ eti ukpep ke esịt ubon—ediwụt mfọnido, ime, mbọm, ye edidahado nnọ—ọkọrọ ye ediwak n̄kpọ eken. Mmọ ke akamba udomo ẹkeme ndifep ndiọi mbun̄wụm iyatesịt, usua, uwotowo, isịnenyịn, ndịk, editie ifu, n̄kohodeidem, usu nsu, udọk edidọk, uwem unana ufat, ye oburobụt ido. (Psalm 32:10) Edi Abasi anam n̄kpọ akan edin̄wọn̄ọ nti n̄kpọ nnọ mbon oro ẹnịmde mme ibet esie. Jesus ama etịn̄ ete ke mbon oro ẹtienede usụn̄uwem Christian ẹyebọ “n̄kpọ utịm ikikie ke emi ke ini emi, . . . mme eka, ye nditọ, ye isọn̄, [ọkọrọ] ye ukụt: ye nsinsi uwem ke eyo emi edidide.”—Mark 10:29, 30.
Fep Ndibuọt Idem ke Ọniọn̄ Ererimbot
3. Ke ndikaiso mbuọt idem ke Jehovah ye Ikọ esie, mme mfịna ewe ke mme Christian ẹsisobo ndusụk ini?
3 Mfịna emi mme anana mfọnmma owo ẹnyenede edi nte ke mmọ ẹnyene ntụhọ edisụhọde idaha m̀mê edifre mme n̄kpọ oro Abasi oyomde. Mmọ ẹsitọn̄ọ ndikere mmemmem mmemmem nte mmimọ ifiọkde n̄kpọ ikan mîdịghe ke ọniọn̄ mme ọfiọkn̄kpọ owo ererimbot emi okon̄ akan eke Abasi, nte ke enye enen̄ede edi eke idahaemi. Mme asan̄autom Abasi ẹkeme n̄ko ndikọri utọ edu emi, ke emi mmọ ẹdụn̄de ke ererimbot emi. Ntem, ke ndinọ ima ima ikot ndọhọ ẹkop item imọ, Ete nnyịn eke heaven ọnọ n̄ko mme ntọt oro ẹdotde ete: “Eyen mi, kûfre mbet mi; edi yak esịt fo ekpeme mme ewụhọ mi: Koro ẹyekọrọ anyan usen, ye isua uwem, ye ifụre ẹnọ fi. Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm. Kûse idem fo ke ọfiọkn̄kpọ: ten̄e Jehovah, nyụn̄ kpọn̄ idiọk.”—Mme N̄ke 3:1, 2, 5-7.
4. “Ifiọk ererimbot emi” ọdiọk adan̄a didie, ndien ntak emi enye edide “ndisịme ke iso Abasi”?
4 Ọniọn̄ ererimbot emi odu barasuene onyụn̄ oto nsio nsio ebiet. Ediwak ufọkn̄wed unọ ukpep ẹdu, ndien “edinam ediwak n̄wed inyeneke edikụre.” (Ecclesiastes 12:12) Idahaemi inua-okot ntatara usụn̄ unọ ntọt eke eyo kọmputa emi ọn̄wọn̄ọ ndinọ ntọt oro mînyeneke adan̄a ke ekperede ndidi ke kpukpru n̄kpọ. Edi edinyene kpukpru ifiọk emi inamke ererimbot ọfiọk n̄kpọ akan m̀mê ọkọk mme mfịna esie. Utu ke oro, idaha ererimbot ototịm ọdiọk kpukpru usen. Nte an̄wan̄ade, Bible ọdọhọ nnyịn ete ke “ifiọk ererimbot emi edi ndisịme ke iso Abasi.”—1 Corinth 3:19, 20.
5. Nso ntọt ke Bible ọnọ aban̄a “ifiọk ererimbot emi”?
5 Ke utịt ikpehe eke ukperedem ini emi, ẹdori enyịn ẹte ke akwa andibian̄a oro, Satan kpa Devil, eyesu ekese nsu ke ukeme ndibiat mbuọtidem oro ẹnyenede ke nte Bible edide akpanikọ. Ikpọ mbon nsụkuyo ẹmịn̄ ediwak n̄wed ẹmi ẹyọhọde ye se ẹkerede-kere oro ẹdemerede eyịghe ẹban̄a edidi oro Bible edide akpanikọ ye se ẹkemede ndiberi edem. Paul ama odụri ekemmọ Christian esie utọn̄ ete: “O Timothy, kpeme se ẹkeyakde ẹsịn fi ke ubọk. Fep idem ke mbukpo ndisịme ndutịn̄ ye ọkpọsọn̄ eneni, eke owo ẹkotde ke nsu, ete, ifiọk; ndusụk owo ẹma ẹnyịme ukpepn̄kpọ oro, ẹdiyo ẹkpọn̄ mbuọtidem.” (1 Timothy 6:20, 21) Bible akaiso odụri owo utọn̄ ete: “Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo; nte asan̄ade ekekem ye mme enyene-odudu eke ẹkarade ererimbot, mînyụn̄ isan̄ake ikekem ye Christ.”—Colossae 2:8.
N̄wana ye Ntụhọ Edinyene Eyịghe
6. Ntak emi oyomde ẹdu ke edidemede man ẹbiọn̄ọ eyịghe ndidọn̄ n̄kam ke esịt-e?
6 Abian̄a abian̄a usụn̄ efen emi Devil akamade edi ndisịn owo eyịghe ke esịt. Enye odu ke edidemede kpukpru ini man okụt ndusụk mmeme ke mbuọtidem onyụn̄ ada enye anam n̄kpọ. Owo ekededi eke enyenede eyịghe ekpenyene nditi ete ke owo emi edide ntak utọ eyịghe oro edi enyeemi ọkọdọhọde Eve ete: “Nte Abasi ọkọdọhọ ete, Mbufo ẹkûdia baba eto in̄wan̄ ẹmi kiet?” Ndondo oro Andidomo emi ekesịnde eyịghe ke esịt esie, udiana n̄kpọ ekedi ndisu nsu nnọ enye, emi enye okonịmde ke akpanikọ. (Genesis 3:1, 4, 5) Man ifep ndiyak ẹda eyịghe ẹbiat mbuọtidem nnyịn nte ẹkebiatde eke Eve, oyom nnyịn idu ke edidemede. Edieke ekpri eyịghe kaban̄a Jehovah, Ikọ esie, m̀mê esop esie ọtọn̄ọde ndidụk fi esịt sụn̄sụn̄, nam n̄kpọ usọp usọp ndisio enye mfep mbemiso enye ọkọride akabade edi n̄kpọ oro ekemede ndibiat mbuọtidem fo.—Men 1 Corinth 10:12 domo.
7. Nso ke ẹkeme ndinam man ẹbiat eyịghe ẹfep?
7 Nso ke ẹkeme ndinam? Inikiet efen, ibọrọ edi ndibuọt idem ke Jehovah ye Ikọ esie. “Edieke owo mbufo ekededi ananade eti ibuot, yak enye eben̄e Abasi, emi ọnọde kpukpru owo ke ntatubọk, mînyụn̄ itọhọke owo; ndien Abasi eyenọ enye. Edi yak enye eben̄e ke mbuọtidem, okûyok; koro owo ke oyokde ebiet mbufụt mmọn̄, eke ofụm eberide, emen, otop, ọduọk ko.” (James 1:5, 6; 2 Peter 3:17, 18) Ntre edibọn̄ akam ifịk ifịk nnọ Jehovah edi akpa usio-ukot. (Psalm 62:8) Ndien, kûmen̄e ndiyom un̄wam nto mme ima ima esenyịn ke esop. (Utom 20:28; James 5:14, 15; Jude 22) Mmọ ẹyen̄wam fi odụn̄ọde ebiet emi eyịghe fo otode, emi ekemede ndidi oto ntan̄idem m̀mê ndusụk ukwan̄ ekikere.
8. Didie ke ekikere nsọn̄ibuot esiwak nditọn̄ọ, ndien nso idi usọbọ?
8 Nte edikot n̄wed m̀mê edikpan̄ utọn̄ nnọ ekikere mbon nsọn̄ibuot m̀mê ukpepn̄kpọ akwaifiọk eke ererimbot anam enyene idiọk eyịghe? Ke ọniọn̄, Bible ọnọ item ete: “Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ. Fep idem ke idiọk ye ikpîkpu ndutịn̄; koro oro edi se idinamde mme owo ẹkọri ke unana uten̄e Abasi, ndien se mmọ ẹtịn̄de ẹyetara nte ọnọk.” (2 Timothy 2:15-17) Edi n̄kpọ udọn̄ ndifiọk nte ke ediwak owo oro ẹkabarede ẹdi mbon nsọn̄ibuot ẹketọn̄ọ ndidụk idiọk usụn̄ ebe ke ndibem iso n̄kụni mban̄a usụn̄ oro mmọ ẹkerede nte ẹnamde n̄kpọ ye mmimọ ke esop Jehovah. (Jude 16) Ekem ẹkụt ndudue ẹnọ se ẹnịmde ke akpanikọ. Kpa nte asiak owo idem anamde n̄kpọ inikiet inikiet ndisịbe ọnọk mfep, nam n̄kpọ usọp usọp ndibiat ntụhọ ekededi ndikụni, nditre ndikop uyụhọ ke usụn̄ nte ẹnamde mme n̄kpọ ke esop Christian mfep ke ekikere. (Colossae 3:13, 14) Biat n̄kpọ ekededi oro anamde enyene utọ eyịghe oro fep.—Mark 9:43.
9. Didie ke eti edinam ukara Abasi eke ofụri ini edin̄wam nnyịn isọn̄ idem ke mbuọtidem?
9 Sọn̄ọ yịre ye Jehovah ye esop esie. Nam akpanikọ ke ndikpebe Peter, emi eketịn̄de ye iwụk ete: “Ọbọn̄, nnyịn iditiene anie? Afo enyene ikọ uwem nsinsi.” (John 6:52, 60, 66-68) Nyene eti ndutịm ukpepn̄kpọ Ikọ Jehovah man otodo anam mbuọtidem fo ọsọn̄ idem, ukem nte akamba otuekọn̄, emi ekemede “ndinịme kpukpru enyịmikan̄ andidiọk.” (Ephesus 6:16) Sịn ifịk ke utom ukwọrọikọ Christian, buana etop Obio Ubọn̄ ima ima ye mbon efen. Kpukpru usen, tie kere ye esịtekọm ban̄a usụn̄ nte Jehovah ọdiọn̄de fi. Nem esịt nte ke afo emenyene ifiọk akpanikọ. Ndinam kpukpru n̄kpọ ẹmi ke eti ndutịm ofụri ini eke Christian eyen̄wam fi okop inemesịt, ọyọ, onyụn̄ ọbọhọ eyịghe.—Psalm 40:4; Philippi 3:15, 16; Mme Hebrew 6:10-12.
Nditiene Ndausụn̄ Jehovah ke Ndọ
10. Ntak emi edide ata akpan n̄kpọ ndiberi edem ke Jehovah kaban̄a ndausụn̄ ke ndọ Christian-a?
10 Ke ndinam ndutịm nnọ eren ye n̄wan ndidụn̄ ọtọkiet nte nsan̄andọ, uduak Jehovah ikedịghe ndinam ẹyọhọ isọn̄ mfọn mfọn kpọt edi n̄ko man anam inemesịt mmọ ọkọri. Nte ededi, idiọkn̄kpọ ye unana mfọnmma ẹda ikpọ mfịna edisịn ke ebuana ndọ. Mme Christian ibọhọke ẹmi, sia mmọ n̄ko ẹdi mme anana mfọnmma ẹsinyụn̄ ẹsobo mme mfịghe udu uwem eke eyomfịn. Edi, adan̄a nte mmọ ẹbuọtde idem ke Jehovah ye Ikọ esie, mme Christian ẹkeme ndikụt unen ke ndọ ye ke edibọk nditọ mmọ. Ufan̄ idụhe inọ mme edinam ye mme edu ererimbot ke ndọ Christian. Ikọ Abasi eteme nnyịn ete: “Yak kpukpru owo ẹbat ndọ ke n̄kpọ eke ẹkponode ẹkûnyụn̄ ẹsabade bed ndọ; koro Abasi eyekpe ikpe ye mbon use ye mme esịn-efịbe.”—Mme Hebrew 13:4.
11. Ke ndikọk mme mfịna ndọ, nso ke nsan̄andọ mbiba ẹkpenyene ndifiọk?
11 Ndọ oro ẹnamde nte ekemde ye item Bible esinyene idaha oro owụtde ima, mbiomo, ye ifụre. Ebe ye n̄wanndọ ẹsifiọk ẹnyụn̄ ẹwụt ukpono ẹnọ edumbet itieibuot. Ke ini mme mfịna ẹdemerede, ediwak ini mmọ ẹsito edikpu ndida ndusụk item Bible nsịn ke edinam. Ke ndikọk uyịre uyịre mfịna, edi akpan n̄kpọ nsan̄andọ mbiba ndiwụk ntịn̄enyịn ye esịt akpanikọ ke se inen̄erede idi mfịna nnyụn̄ nnam n̄kpọ mban̄a mme ntak mmọ ẹtịbede utu ke mme mfịna oro mmọ ẹdade ẹdi. Edieke mme nneme oro ẹnyenede ke ndondo emi ẹsụn̄ọde ke edinyene esisịt m̀mê unana emem, ebe ye n̄wan ẹmi ẹkeme ndiyom un̄wam oro asari mîdụhe nto ima ima esenyịn.
12. (a) Nso ọsọ mfịna ke ndọ ke Bible ọnọ item aban̄a? (b) Ntak emi oyomde nsan̄andọ mbiba ẹnam mme n̄kpọ ke usụn̄ Jehovah?
12 Nte mfịna oro abuana nneme, ediwụt ukpono nnọ ntụk kiet eken, ediwụt ukpono nnọ itieibuot, m̀mê nte ẹnamde mme ubiere? Nte enye enyene n̄kpọ ndinam ye edibọk nditọ, m̀mê edinam udọn̄ kaban̄a idan̄ ada ukem ukem? Mîdịghe nte edi ndutịm ubiatokụk ke ubon, unọ idem nduọkodudu, nsan̄a, n̄kpọ aban̄ade m̀mê akpana n̄wan anam utom, m̀mê ebiet oro mbufo ẹkpedụn̄de? Se ededi oro edide mfịna, Bible ọnọ eti item edide nnennen nnennen ebe ke mme ibet mîdịghe ke usụn̄ efen ebe ke mme edumbet. (Matthew 19:4, 5, 9; 1 Corinth 7:1-40; Ephesus 5:21-23, 28-33; 6:1-4; Colossae 3:18-21; Titus 2:4, 5; 1 Peter 3:1-7) Ke ini nsan̄andọ mbiba ẹtrede ndiyom n̄kpọ ke ntak ibụk ẹnyụn̄ ẹyakde ima anam n̄kpọ ọyọhọ ọyọhọ ke ndọ, emi esisụn̄ọ ke ata akamba inemesịt. Ana ọkpọsọn̄ udọn̄ odu ke n̄kan̄ nsan̄andọ mbiba ndinam mme ukpụhọde oro ẹyomde, ndinam n̄kpọ ke usụn̄ Jehovah. “Owo eke otịmde ọfiọk ndinam n̄kpọ eyekụt ufọn: ama edi owo eke ọbuọtde idem esie ye Jehovah, ọfọfọn ọnọ enye!”—Mme N̄ke 16:20.
Mme Uyen—Ẹkpan̄ Utọn̄ ke Ikọ Abasi
13. Ntak emi mîdịghe mmemmem n̄kpọ mme uyen Christian ndikọri n̄kpon ye ọkpọsọn̄ mbuọtidem ke Jehovah ye Ikọ esie?
13 Idịghe mmemmem n̄kpọ inọ mme Christian ẹdide uyen ndikọri nsọn̄ idem ke mbuọtidem ke ini idiọk ererimbot akanarede mmọ okụk. Ntak kiet edi nte ke “ofụri ererimbot . . . esịne ke ubọk andidiọk,” Satan kpa Devil. (1 John 5:19) Mme uyen ẹdu ke en̄wan ye idiọk asua emi, emi ekemede ndinam idiọk etie nte eti. Edu ami ami, ibụk ibụk udọn̄ ikpọ n̄kpọ, udọn̄ kaban̄a mme n̄kpọ ẹdide oburobụt ẹnyụn̄ ẹdiọkde, ye ebeubọk edibịne inemesịt—kpukpru ẹmi ẹdọn̄ọ ọtọkiet ke ọsọ, n̄wọrọnda usụn̄ ukere n̄kpọ oro ẹtịn̄de ẹban̄a ke Bible nte “spirit emi anamde utom kemi ke esịt nditọ ntụt-utọn̄.” (Ephesus 2:1-3) Satan ada n̄kari n̄kari usụn̄ esịn udọn̄ ọnọ “spirit” emi ke mme n̄wed ufọkn̄wed, ke ekese ikwọ oro ẹdude, ke mme mbre mbuba, ye mme orụk unọ idem inemesịt eken. Oyom mme ete ye eka ẹdu ke edidemede man ẹbiat utọ odudu oro ebe ke ndin̄wam nditọ mmọ ẹkọri ẹkpon ẹnyụn̄ ẹbuọt idem ke Jehovah ye Ikọ esie.
14. Didie ke mme uyen ẹkeme ‘ndifehe n̄kpọn̄ udọn̄ itọn̄ ini uyen’?
14 Paul ama ọnọ ekpri nsan̄a esie Timothy item ebietde eke ete: “Fehe kpọn̄ mme idiọk itọn̄ ini uyen, nyụn̄ tiene mmọ eke ẹsemede ẹkot Ọbọn̄ ke edisana esịt, bịne edinen ido, ye mbuọtidem, ye ima, ye emem.” (2 Timothy 2:22) Ke adan̄aemi mîdịghe kpukpru ‘udọn̄ itọn̄ ini uyen’ ẹdiọk ke idemmọ, mme uyen ẹkpenyene ‘ndifehe n̄kpọn̄’ mmọ ke usụn̄ifiọk nte ke mmọ ikpayakke mme n̄kpọ ẹmi ẹkara ekikere mmọ, ẹkpọn̄de esisịt ini, edieke osụhọde-sụhọ, ẹnọ edibịne n̄kpọ Abasi. Ke adan̄aemi edisịn̄ede idem, mbre mbuba, ikwọ, unọ idem inemesịt, mme edinam ini nduọkodudu, ye edika isan̄ mînen̄ekede idiọk, mmọ ẹkeme ndidi afia edieke ẹyakde mmọ ẹdi akpan n̄kpọ ke uwem. Fehe ofụri ofụri kpọn̄ nneme oro mînyeneke ufọn, kpọn̄ edifen efen, kpọn̄ ebeubọk udọn̄ kaban̄a idan̄, kpọn̄ nditie ifu nnyụn̄ n̄kop mfekuwem, nyụn̄ kpọn̄ ediseme nte ke ete ye eka fo idiọn̄ọke fi.
15. Nso mme n̄kpọ ẹkeme nditịbe ke ini owo odude ikpọn̄ ke ufọk oro ẹkemede nditịp nsịn ke mme uyen ndidu uwem esịt iba?
15 Idem ke ini ẹdude ikpọn̄ ke ufọk, n̄kpọndịk ekeme ndidịbe mbet mme uyen. Edieke ẹsede edinam TV ye eke mme video oro ẹwụtde oburobụt ido m̀mê afai, udọn̄ edinam ndiọi n̄kpọ ekeme ndidụk owo esịt. (James 1:14, 15) Bible ọnọ item ete: “Mbufo ẹmi ẹmade Jehovah, ẹsua idiọk ido.” (Psalm 97:10; 115:11) Jehovah ọfiọk m̀mê owo ekededi ke odomo ndidu uwem esịt iba. (Mme N̄ke 15:3) Mme uyen Christian, ẹse ẹkanade ubet mbufo. Nte mbufo ẹmedian mme ndise oburobụt ọwọrọiso owo ke mbre mbuba m̀mê ikwọ ererimbot ke ibibene, mîdịghe nte mbufo ẹdian nti n̄kpọ oro ẹnamde ẹti nti n̄kpọ? (Psalm 101:3) Ke itie ukọn̄ ọfọn̄ mbufo, nte mbufo ẹmenyene ọfọn̄ oro ẹwụtde iso o-bụt, mîdịghe nte ndusụk ọfọn̄ mbufo ẹwụt ebeubọk ido usịnen̄kpọ eke ererimbot emi? Ke n̄kari n̄kari usụn̄ Devil ekeme ndimụm mbufo edieke mbufo ẹyakde idem ẹnọ idomo edikpebe se idiọkde. Bible ke ọniọn̄ eteme ete: “Ẹfara ke idem ẹnyụn̄ ẹkpeme; asua mbufo, kpa Satan, ke oyoyo nte lion eke okụnide, oyom se editade.”—1 Peter 5:8.
16. Didie ke item Bible ekeme ndin̄wam uyen anam kpukpru owo ẹmi ẹnyenede ebuana ye enye ẹkop idatesịt ẹban̄a enye?
16 Bible asian mbufo ete ẹkpeme nsan̄a mbufo. (1 Corinth 15:33) Nsan̄a mbufo ẹkpenyene ndidi mbon oro ẹbakde Jehovah. Ẹkûyak idem ẹnọ mfịghe otode ubọkn̄ka. (Psalm 56:11; Mme N̄ke 29:25) Ẹkop uyo ẹnọ mme ete ye eka mbufo ẹmi ẹbakde Abasi. (Mme N̄ke 6:20-22; Ephesus 6:1-3) Ẹberi edem ke mbiowo kaban̄a ndausụn̄ ye nsịnudọn̄. (Isaiah 32:1, 2) Ẹwụk ekikere ye enyịn mbufo ke mme ọsọn̄urua n̄kpọ ye mme utịtmbuba eke spirit. Ẹyom mme ifet ndinam n̄kọri ke n̄kan̄ eke spirit nnyụn̄ mbuana ke mme edinam esop. Ẹkpep ndida ubọk mbufo nnam n̄kpọ. Ẹkọri ẹkop idem ẹnyụn̄ ẹsọn̄ idem ke mbuọtidem, ndien ekem mbufo ẹyewụt ẹte ke mmimọ inen̄ede idi owo—owo ẹmi ẹdotde ndidu uwem ke obufa ererimbot Jehovah! Ete nnyịn eke heaven eyekop inemesịt aban̄a mbufo, esịt eyedat ete ye eka mbufo eke isọn̄ aban̄a mbufo, ndien nditọete Christian mbufo iren ye iban ẹyebọ nsịnudọn̄ ẹto mbufo. Se idide akpan n̄kpọ edi oro!—Mme N̄ke 4:1, 2, 7, 8.
17. Nso mme ufọn ke mbon oro ẹberide edem ke Jehovah ye Ikọ esie ẹbọ?
17 Ke mme ikọ uto ẹma ẹnọ andiwet psalm odudu spirit ndiwet ete: “Ama edi mmọ eke ẹnen̄erede ẹsan̄a, [Jehovah] isịnke mmọ eti n̄kpọ. O Jehovah mme udịm, ọfọfọn ọnọ owo eke ọbuọtde idem esie ye afo.” (Psalm 84:11, 12) Ih, inemesịt ye edikụt unen, idịghe edikpu ye ntakurua, ẹdi se kpukpru mbon oro ẹbuọtde idem ye Jehovah ye Ikọ esie, kpa Bible, ẹdinyenede.—2 Timothy 3:14, 16, 17.
Didie ke Afo Ọkpọbọrọ?
◻ Ntak emi mme Christian mîkpọkọn̄ke mbuọtidem mmọ ke “ifiọk ererimbot emi”?
◻ Nso ke ẹkpenam edieke owo enyenede eyịghe?
◻ Didie ke ndinam n̄kpọ ke usụn̄ Jehovah ada edikụt unen ye inemesịt edi ke ndọ?
◻ Didie ke Bible an̄wam mme uyen ‘ndifehe n̄kpọn̄ udọn̄ itọn̄ ini uyen’?
[Ndise ke page 23]
Mme Christian ẹsiwọn̄ọde ẹbịne Jehovah ye Ikọ esie ke adan̄aemi ẹsịnde “ifiọk ererimbot emi” nte ndisịme n̄kpọ
[Ndise ke page 25]
Mme ubon oro ẹberide edem ke Jehovah ye ke Ikọ esie ẹkụt eti unen ye inemesịt