Nte Ẹma Ẹnyan̄a Fi?
JOHNNY ekedi isua duop ke emana ke ini eren kiet ke an̄wa unyam n̄kpọurua ọkọdọhọde enye ebet onyụn̄ obụpde enye ete: “Akparawa, nte afo emenyịme Jesus Christ nte Ọbọn̄ ye Andinyan̄a fo?” Oro eketie nte ata esen esen mbụme ọnọ Johnny, sia enye onịmde Jesus ke akpanikọ kpukpru ini. Ntre enye ama ọbọrọ ete, “Mmenyịme.” Eren oro ama ofiori ke usụn̄ oro kpukpru owo ẹkopde ete: “Ẹtoro Ọbọn̄! Ẹnyan̄a ukpọn̄ efen ẹnọ Christ!”
Nte edinyan̄a enen̄ede emem utom ntre? Ndi “ẹma ẹnyan̄a” Johnny toto ke ini oro enye eketịn̄de mme ikọ oro, inamke n̄kpọ m̀mê nso ke enye edinam ke nsụhọ uwem esie? Ediwak mbon esịt akpanikọ ẹkeme ndibọrọ ih. Ndusụk tract ido ukpono ẹsidọhọ yak owo ewet usenọfiọn̄ oro ‘ẹkenyan̄ade’ enye man ekeme nditi.
Ọkwọrọ ederi kiet ekewet ete “ini oro owo enyịmede Christ . . . ẹbiere ini iso owo oro ke nsinsi.” Enye ọkọdọhọ ete ke Bible ọdọhọ ke edinyan̄a ọkọn̄ọ ke “edinam mbuọtidem [ini kiet], idịghe ke mbuọtidem oro akade-ka iso.” Ewetn̄wed efen mban̄a ido ukpono ekewet ete: “Emi edi utom oro ama okokụre. Ẹma ẹnanam enye ẹma ẹnọ fi . . . ‘En̄wan [fo] omosịm utịt.’ ‘Ẹmesọhi idiọkn̄kpọ [fo] ẹfep.’” Edi idem mbon oro ẹnen̄erede ẹnịm ẹte ke emi edi akpanikọ ẹkeme ndikụt mfịna odude mi. Ana in̄wan̄în̄wan̄ nte ke ediwak owo ẹmi ẹkesiande ẹte ke “ẹma ẹnyan̄a” mmọ idụhe uwem ke usụn̄ oro Bible ọdọhọde ke mmọ ẹkpenyene ndidu. Ọsọ edinam an̄wan̄a oro ẹsinọde edi nte ke ekeme ndidi mmọ ikenen̄ekede “inyịme” Christ.
Ntre, “ndinyịme” Jesus enen̄ede ọwọrọ nso? Nte enye edi edinam mbuọtidem oro ẹnamde ini kiet, mîdịghe nte enye edi usụn̄uwem oro akade-ka iso? Nte ana se inịmde ke akpanikọ ọsọn̄ odudu ekem ndinụk nnyịn inam n̄kpọ? Nte nnyịn imekeme ndinen̄ede mbọ ufọn nto uwa Jesus ye unana edibiom mbiomo oro asan̄ade ye editiene enye?
Ediwak owo ẹyom mme edidiọn̄ edi iyomke mbiomo editiene nnyụn̄ n̄kop uyo Jesus. Ke akpanikọ, ikọ oro “kop uyo” esiwak nditịmede mmọ ekikere. Edi Jesus ọkọdọhọ ete: “Di disan̄a ye Ami.” (Luke 18:18-23) Ndien Bible ọdọhọ ete: ‘Mmọ ẹmi mîsụkke ibuot inọ gospel Ọbọn̄ nnyịn Jesus ẹyebọ ufen nsinsi nsobo.’—2 Thessalonica 1:8, 9; Matthew 10:38; 16:24.
Bible etịn̄ ediwak n̄kpọ oro ẹdemerede mme akpan mbụme ẹban̄a se ẹkpepde ẹban̄a edinyan̄a. Edieke edimade ndidụn̄ọde se Bible enen̄erede etịn̄ ke ibuot nneme emi, afo eyekụt mme page ẹtienede mi nte ẹdide akpan n̄kpọ udọn̄. Kụbọde Bible fo, nyụn̄ kot mme itien̄wed oro ẹsiakde ẹsịn man okụt se Jesus ye mme apostle esie ẹkekpepde ẹban̄a akpan n̄kpọ emi.