Mmọ Ẹkesop Idem Nte Idara Idara Mme Anditoro
ẸKENỌ ikọt Jehovah Abasi ke eset ewụhọ ẹte ‘ẹkûtre ndidat esịt’ ke ini mmọ ẹsopde idem ndituak ibuot. (Deuteronomy 16:15) Mme Mbono District “Idara Idara Mme Anditoro” eke 1995/96 ẹnen̄ede ẹnọ Mme Ntiense Jehovah eti ntak ndikop idatesịt.
Toto nte udịm udịm mbono ẹmi ẹketọn̄ọ, mmọ ẹmebọp mbuọtidem. Mmọ ẹmewụt n̄ko nte ẹkemede ndinyene idatesịt ke ererimbot unana idatesịt. Ẹyak nnyịn ineme iban̄a mbono emi usen kiet kiet ke ini kiet.
‘Mbufo Ẹtoro Jehovah . . . Ẹbre!’
Ibuotikọ akpa usen mbono eke enyọn̄ emi ọkọkọn̄ọ ke Psalm 149:1, 2. Utịn̄ikọ oro “Nnyịn Imenyene Ntak Ndisio N̄kpo Idara” ama odụn̄ọde nte ẹbuande prọfesi oro odude ke Isaiah ibuot 35. Enye ama enyene edisu ke Israel eset ndien akpan akpan ke eyo nnyịn ye edifiak nnam mme andituak ibuot nnọ Jehovah ẹnyene uforo ye nsọn̄idem ke paradise eke spirit. Ntem, mme andidụk mbono ẹma ẹnyene ntak ndisio n̄kpo idara kaban̄a se Abasi aduakde ndinam nnọ ikọt esie ke paradise eke spirit ye ke ata Paradise edide emi ekperede etieti.
Utịn̄ikọ ibuotikọ mbono, “Ẹsio Ẹnịm San̄asan̄a nte Idara Idara Mme Anditoro ke Ofụri Ererimbot,” ama ọbọrọ mbume oro: Nso inam nnyịn idi san̄asan̄a ye ererimbot emi? Edi nnyịn ndidiana kiet ntuak ibuot nnọ Jehovah. Inamke n̄kpọ m̀mê m̀mọ̀n̄ ke Mme Ntiense Jehovah ẹdụn̄ ke isọn̄, mmọ ẹtịn̄ ikọ ẹnyụn̄ ẹkpep n̄kpọ ke n̄kemuyo. Mmọ ẹkop idatesịt, n̄ko, ke akwa uduak Jehovah ndinam edisana enyịn̄ esie asana nnyụn̄ n̄wụt unen itie edikara esie ebe ke Obio Ubọn̄ esie. Didie, ndien, ke Jehovah an̄wam nnyịn ndinyene itie ke uduak esie? Enye ọmọnọ nnyịn akpanikọ eke edisana Ikọ esie. Abasi ọmọnọ nnyịn edisana spirit esie. Enye amada otu nditọete ofụri ererimbot ye ndutịm kaban̄a edisana utuakibuot ọdiọn̄ nnyịn. Ubon nnyịn eke ofụri ererimbot an̄wam nnyịn ndinam n̄kpọ Jehovah ye akwa idatesịt.
“Ndida San̄asan̄a Nnyụn̄ Nnana Ntọi ke Ererimbot” ama ọsọn̄ọ etịn̄ ufọn edifep mme ntọi asari ye ubahade eke n̄ka. (James 2:5-9) Ndusụk owo ẹkeme ndidụk nsan̄a n̄kukụre ye mbon oro mmọ ẹdude ke ukem idaha ke uwem m̀mê ke n̄kan̄ okụk, ẹfụmide ekemmọ mme Christian ẹmi ẹdide ubuene m̀mê ẹmi n̄kpọ ọdiọkde. Mmọ en̄wen ẹkeme ndinyene ntụhọ edifọn mfọn ye mbon ẹmi ẹnyenede ifetutom mbiomo ke esop. Mmọ ẹfre nte ke n̄kponn̄kan ifet emi owo ekededi ekemede ndinyene edi eke edidi Ntiense Jehovah. Ke ntre, inaha nnyịn iyak mme ntụhọ ererimbot ẹnam nnyịn inyene ntọi ẹnyụn̄ ẹbiat emem esop.—2 Peter 3:14.
Utịn̄ikọ oro, “Nte Mmeben̄e Idem Ndidọ Ndọ?” ama osio owụt nte ke ediwak owo ẹsibebụmede ẹdụk ndọ. Ndusụk owo ẹdọ ndọ man ẹbọhọ n̄kpọsọn̄ idaha ke ufọk mîdịghe ke ntak edide ubọkn̄ka mmọ ẹdọ ndọ. Nte ededi, nti ntak ndidọ ndọ ẹsịne udọn̄ oro edem mbiba ẹnyenede ndibịne mme utịtmbuba ukara Abasi, ata ima, udọn̄ kaban̄a edinyene nsan̄a ye ifụre, ye udọn̄ ndinyene nditọ. Ukpep eke spirit edi akpan n̄kpọ ke nditịm idem nnọ ndọ. Ke adianade ye mme n̄kpọ eken, ufọn odu ndikọri nti edu ebe ke ndimen obufa owo nsịne. N̄ko edi se iwụtde ọniọn̄ nditịm mfiọk m̀mê owo oro owo oyomde ndidọ ọnọ uyarade nte ke imenyene ata itie ebuana ye Jehovah onyụn̄ anam n̄kpọ ukpono ukpono ye mmọ en̄wen. Ndiyom item nto mme Christian ẹmi ẹma ẹkekọri ẹsịm ọyọhọ idaha edi n̄ko se iwụtde ọniọn̄.—Mme N̄ke 11:14.
Enyeoro ibuotikọ ọkọdọhọde “Mme Ete ye Eka Ẹmi Ẹkopde Inemesịt Ẹban̄a Nditọ Mmọ” ama etiene esịne-ifiọk nneme emi edem. Ini emi eyen amanade esiwak ndidi ini akwa idara. Nte ededi, ndinyene nditọ esida akwa mbiomo n̄ko edi. (Psalm 127:3) Ntem, edi akpan n̄kpọ nte ẹkpep nditọ ndima Jehovah. Mme ete ye eka ẹkeme ndinam emi ebe ke nditịn̄ mban̄a Jehovah nnọ nditọ mmọ kpukpru ini onyụn̄ ebe ke ndida mme edumbet Ikọ esie nsịn ke edinam ke ubon.
Akpa usen mbono oro ekeberi ye n̄kpọ n̄kpaidem—edisio obufa ediye uduot ekpri n̄wed oro Jehovah’s Witnesses and Education. Enye ama otịm anam an̄wan̄a nte ke Mme Ntiense “ẹsisịn udọn̄ ẹnọ n̄kparawa owo ndinam utom ọkpọsọn̄ nnyụn̄ nda mme utom oro ẹnọde ẹnam ke ufọkn̄wed ke akpan n̄kpọ.” N̄wed emi n̄ko anam an̄wan̄a n̄wọrọnda utịp oro mme ufọkn̄wed ẹmi ẹkpepde nte ẹkotde ẹnyụn̄ ẹwetde n̄kpọ ẹmi Mme Ntiense Jehovah ẹnịmde ke ediwak isua ke Nigeria, Mexico, ye mme idụt eken, ẹnyenede. Ediye uduot ekpri n̄wed emi ekpenyene ndin̄wam mme andikpep ẹkụt nte ke nnyịn imada ukpepn̄wed ke ata akpan n̄kpọ.
‘Ẹwa Uwa Ekọm Ẹnọ Abasi Kpukpru Ini’
Ibuotikọ eke ọyọhọ usen iba emi ọkọkọn̄ọ ke Mme Hebrew 13:15. Ndutịm usenubọk ama esịne nneme ke “Ndiyere Ikot Editoro Jehovah.” Isua emana idịghe n̄kpọ ubiọn̄ọ ndomokiet ke ndiyere ikot emi. Psalm 148:12, 13 akpak n̄kparawa owo, nditọiban, n̄kani iren, ye nditọwọn̄ ete ẹtoro Jehovah. Ediwak idara idara mme asan̄autom Jehovah ẹmekeme ndinam itoro mmọ okpon. Ke ofụri ererimbot, se iwakde ikan 600,000 ẹmebuana ke utom ukwọrọikọ uyọhọ ini, m̀mê utom usiakusụn̄. Se iwakde ikan 15,000 ẹbuana ke utom akpan asiakusụn̄, ndien n̄kpọ nte 15,000 ẹdu ke utom Bethel.
“Ndinam Utom ke Edinam Akpanikọ ye Esop Jehovah” ekedi utịn̄ikọ emi okowụtde nte ke edinam akpanikọ edi akpan n̄kpọ ọnọ mme asan̄autom Abasi. Ndinam akpanikọ nnọ Jehovah ọwọrọ ndiyịre ye enye ke uyakidem oro enen̄erede ọsọn̄ idem tutu enye editie nte okopodudu itai. Edinam akpanikọ oyom ete nnyịn ifep edikokoi mbiat mme ewụhọ Bible, edide mbon en̄wen ẹkụt nnyịn m̀mê ikwe. Enye n̄ko oyom ete nnyịn isọn̄ọ imụm mme ukpepn̄kpọ Bible ẹmi ẹdude ke mme magazine Enyọn̄-Ukpeme ye Awake! ikama ọkọrọ ye kpukpru udia eke spirit eken oro Watch Tower Society ọnọde. Utịn̄ikọ baptism ama etiene utịn̄ikọ emi edem. Nso idatesịt ikodu ntem ke ini mbon baptism ẹkewụtde uyarade uyakidem oro mmọ ẹyakde ẹnọ Jehovah!
Mme ikọ Hosea 4:1-3 ẹkediọn̄ usụn̄ ẹnọ utịn̄ikọ uwemeyo oro, “Eti Ido m̀mê Idiọkido—Ewe ke Afo Ebịne?” Okposụkedi usụn̄ emi ererimbot esede eti ido ama akakabade ọdiọk, ana mme Christian “ẹsịn ifịk ke ofụri ukeme” ẹbịne ata eti ido. (2 Peter 1:5) Emi esitọn̄ọ ke nte owo ekerede n̄kpọ. Edieke mme ekikere esie ẹdide nti, enye eyetịn̄ ndisana ikọ, nti ikọ, ye se ibọpde-bọp eyenyụn̄ odomo ndinam akpanikọ ke kpukpru edinam esie ye mbon en̄wen. Ndibịne eti ido n̄ko abuana edidomo ndinyene asian ye esịtmbọm nnọ ekemmọ Christian emi odude ke nnanenyịn m̀mê ke mfụhọ.—1 Thessalonica 5:14.
Utịn̄ikọ en̄wen, “Ẹkpeme Ẹbiọn̄ọ Mme Afia Devil,” ama ọnọ mme Christian item aban̄a edisio idemmọ nnyan nnọ mme odudu demon. Ke mme afan̄ usọbọ udọn̄ọ, mme Christian ẹnyene ndiwụt ukpeme kaban̄a mme usụn̄ unọ usọbọ, utọ nte utọ owo idap, oro ọnọde ekikere ndedịbe odudu. Ke ẹsiode oro ẹfep, se mme owo ẹnamde ndise mban̄a nsọn̄idem ikpọkidem mmọ edi mbubehe idemowo.
Ọyọhọ usen iba ekeberi ye idara idara n̄kpọ n̄kpaidem—edisio obufa n̄wed udomo ekpatọfọn̄ emi uduak edide ndin̄wam mbon esịt akpanikọ ẹnam n̄kọri usọp usọp ẹsịm uyakidem ye baptism. Ẹkot obufa n̄wed emi enyenede page 192 mi Ifiọk Oro Adade Osịm Nsinsi Uwem. N̄wed Ifiọk owụt akpanikọ ke usụn̄ oro ọbọpde-bọp. Enye inọhọ ntịn̄enyịn ke ndikụt ndudue nnọ mme nsunsu ukpepn̄kpọ. In̄wan̄în̄wan̄ usem ye nte ẹtịmde ke usụn̄ oro owụtde mbufiọk ekpenyene ndinam edi mmemmem ndikama n̄wed emi nnịm ukpepn̄kpọ Bible nnyụn̄ n̄n̄wam mme owo ẹdiọn̄ọ aduai-owo-idem ifiọk Abasi.
‘Mbufo Ẹdat Esịt, Ẹnyụn̄ Ẹbre ke Nsinsi’
Mme ikọ eke Isaiah 65:18 ẹmi ẹkedi ibuotikọ ọyọhọ usen mbono ita. Edisu prọfesi Bible anyan ubọk owụt 1914 nte isua oro idiọk editịm n̄kpọ emi okodụkde ukperedem ini esie. Ntem, mme utịn̄ikọ nneme oro ọkọdọhọde “Idara Idara Mme Anditoro ke Utịt Editịm N̄kpọ Emi” ama omụm ntịn̄enyịn otuowo. Mme etịn̄ikọ ẹma ẹwụt nte edu idiọkitọn̄ ye afai eke ererimbot emi ẹnyenede odudu ke idem ediwak biliọn owo. Nte ini akade, ẹyebiere ikpe ẹnọ mmọ nte ubak ererimbot emi Satan edide andikara. Ntem, ini edi emi ndinam edimek. Nnyịn iyom ndidu ke n̄kan̄ ewe? Nte nnyịn imoyom ndituak ibuot nnọ Jehovah nnyụn̄ mmụm itie edikara esie n̄kama, mîdịghe nte nnyịn iyenyịme Satan edi andikara nnyịn ebe ke ndinam mme n̄kpọ oro ẹnemde enye esịt? Kpukpru nnyịn ikpenyene ndida idaha nnyịn in̄wan̄în̄wan̄ ke n̄kan̄ Jehovah.
Utịn̄ikọ an̄wa mbono oro, “Ẹtoro Nsinsi Edidem!” ama ọnọ kpukpru mme andidụk n̄kpọ ndikere mban̄a. Okposụkedi etiede nte ekikere edidu ke nsinsi ayan̄a ifiọk n̄kpakpa owo, Jehovah otịm ọfiọk emi. “Jehovah edi edidem ke nsinsi nsinsi,” ntre ke andiwet psalm ọkọkwọ. (Psalm 10:16) Nsinsi Edidem emi emeberede usụn̄ ọnọ ubonowo ndidara uwem nsinsi ebe ke Eyen esie, Jesus Christ. (John 17:3) “Ih, nnyịn mme owo ẹmi idide mme anamidiọk imekeme ndinyene nsinsi uwem ebe ke ukpepn̄kpọ Abasi ye mbuọtidem ke uwa ufak Jesus,” ntre ke etịn̄ikọ ọkọdọhọ.
Nte mbono akasan̄ade ekpere utịt, ẹma ẹsọn̄ọ mbon oro ẹkedụkde idem ebe ke akpatre utịn̄ikọ, emi ọkọdọhọde “Nditoro Jehovah Idara Idara ke Usen ke Usen.” Ekedi n̄kpọ inemesịt ndibọ mme etop ẹban̄ade n̄kọri ke utom edinam mbet ke ofụri isọn̄. Ndien ama onụk mme andidụk mbono ‘ndikọm Jehovah kpukpru usen nnyụn̄ ntoro enyịn̄ esie ke nsinsi.’—Psalm 145:2.
Mme edinam nsọn̄ido emi inua mîkemeke nditịn̄ ẹmenam ererimbot ataba idatesịt. Edi, mme owo ẹmi ẹnyenede ọyọhọ mbuọtidem ke Jehovah ẹkeme ndinyene idatesịt otode Abasi. Nte otu nditọete ofụri ererimbot, Mme Ntiense Jehovah ke ntre ẹkeme ndifiak ntịn̄ mme ikọ Psalm 35:27, 28 ẹtienede mi: “Yak mmọ eke ẹmade edinen ikọ mi ẹkwọ ẹnyụn̄ ẹdara; yak mmọ ẹnyụn̄ ẹdọhọ kpukpru ini, ẹte, Yak ẹkpono Jehovah, emi amade ifụre owo esie. Ndien edeme mi eyetịn̄ eti ido fo, ye itoro fo, ofụri usen.”
[Mme ndise ke page 7]
Mme ubon ẹyebọ ufọn ẹto ediye uduot ekpri n̄wed oro “Jehovah’s Witnesses and Education”
[Mme ndise ke page 8, 9]
Obufa n̄wed oro “Ifiọk Oro Adade Osịm Nsinsi Uwem,” owụt akpanikọ Bible ke usụn̄ oro ọbọpde-bọp
[Ndise ke page 9]
Ediwak owo ẹma ẹna baptism ke idiọn̄ọ uyakidem mmọ nnọ Jehovah
[Ndise ke page 9]
Drama oro “Ndikpono Mmọ Oro Ẹdotde ke Mme Isua Usọn̄ Mmọ” ama enen̄ede otụk mme andidụk mbono