Mme Mbụme Ẹtode Mme Andikot
Nte ekemde ye N̄wed Mbon Galatia 6:8, “owo eke ọtọde ọnọ obụkidem eyedọk mbiara oto obụkidem; edi owo eke ọtọde ọnọ Spirit, oto ke Spirit ke enye eyedọk nsinsi uwem.” Ewe “Spirit” ke ẹtịn̄ ẹban̄a, ndien didie ke nnyịn ke ntre ikeme ndidọk uwem?
Mme ikọ Hebrew ye Greek oro ẹkabarede “spirit” ẹwọrọ nsio nsio n̄kpọ, utọ nte: (1) anamutom odudu Abasi, (2) odudu uwem ke idem mme owo m̀mê mme unam, (3) odudu oro onụkde ekikere owo, ye (4) owo eke spirit, m̀mê angel. Akpa ke otu mmọemi—anamutom odudu Abasi—edi se nnyịn ikụtde ke N̄wed Mbon Galatia 6:8.
Nte ntọt ndinam an̄wan̄a, tịmfiọk se idude ke N̄wed Mbon Galatia 3:2, emi nnyịn ikụtde akpa edida oro ẹdade ikọ oro “spirit” ke n̄wed mbon Galatia. Paul okobụp mme Christian ete: “Nte mbufo ẹkebọ Spirit koro ẹnamde utom ibet, m̀mê koro mbufo ẹkopde ikọ Abasi ye mbuọtidem?” Ekem, ke N̄wed Mbon Galatia 3:5, enye ama abuan spirit oro ye edinam mme utom odudu. Ntre “Spirit” oro enye eketịn̄de aban̄a ekedi edisana spirit, anamutom odudu Abasi oro enyịn owo mîkwe.
Nte ini akade, ke N̄wed Mbon Galatia 6:16, Paul ama owụt ukpụhọde odude ke spirit ye obụkidem. Nnyịn ikot ite: “Mmọdọhọ mbufo nte, Ẹsan̄a ke Spirit, ndien mbufo idinamke se idọn̄de obụkidem.” Ke ndidọhọ “se idọn̄de obụkidem” ikọ esie ọkọwọrọ anamidiọk ikpọkidem eke owo. Ntem, ke N̄wed Mbon Galatia 5:19-23, enye ama abat mme “ubọkutom obụkidem” nte ẹdide isio ye “mbun̄wụm Spirit.”
Ntem, ke N̄wed Mbon Galatia 6:8, owo eke “ọtọde ọnọ obụkidem” anaedi owo emi ayakde mme udọn̄ unam idiọk eke owo ẹkara enye, esịnde idem ke “ubọkutom obụkidem.” Enye ekeme ndikụt mme mbiara utịp utọ eduuwem oro, ndien edieke enye mîkpụhọkede, enye ke akpanikọ idinyeneke uwem ke Obio Ubọn̄ Abasi m̀mê ke idak esie.—1 Corinth 6:9, 10.
Nte mme Christian oro isịnde ifịk udọn̄ nnyịn ekpedi ‘nditọ nnọ spirit Abasi.’ Oro abuana edidu uwem ke usụn̄ oro ayakde edisana spirit anam utom ifụre ifụre ke uwem nnyịn, an̄wamde nnyịn ndiwụt mbun̄wụm esie. Nnyịn ikpenyene nditi oro ke ini nnyịn ibierede se idikotde m̀mê edinam television oro idisede. Nnyịn itọ inọ spirit ke ini inọde n̄kpan̄utọn̄ ke mme mbonoesop inyụn̄ idomode ndida item mbiowo oro ẹdade edisana spirit ẹmek nsịn ke edinam.—Utom 20:28.
Nte enemde, N̄wed Mbon Galatia 6:8 etre ye un̄wọn̄ọ oro nte ke nte nnyịn itọde ke n̄kemuyo ye edisana spirit, nnyịn iyedu ke udịm ‘edidọk nsinsi uwem nto spirit.’ Ih, ọkọn̄ọde ke ufak Christ, Abasi eyenam anana-utịt uwem odu ebe ke utom oro edisana spirit anamde.—Matthew 19:29; 25:46; John 3:14-16; Rome 2:6, 7; Ephesus 1:7.