“Etie Nte Nnyịn Ikemeke Ndineme Nneme!”
MICHAEL, ekpeibet, ekenyene ndidi ata eneme nneme. Utom esie okoyom enye anam ntre. Edi isua 16 ke ama ọkọdọ ndọ, ẹma ẹnyịk Michael ndifiọk nte ke ekeme ndidi usọ nneme esie esisop ke ini enye ọnyọn̄de edi ufọk ebịne n̄wan esie, Adrian. Michael eti ete, “Ami ye Adrian ikesitọhọ utọk kpukpru ini, iseme eseme, isụk kiet eken uyo, itịn̄ ikọ idian kiet eken nte mîdotke ndien mma n̄kere ke emi eyenam idem emem nnyịn. Mma n̄kere m̀mê oro ekedi ndọ, kpa n̄kaiso uyịre uyịre iyatesịt unana uyụhọ oro akade-kaiso ndikpon. Edieke oro ekenyenede ndidi idaha nnyịn ke ofụri ini uwem oro idụn̄de ọtọkiet, mma nyom ndifep ndọ—nnamke mbubru. N̄kam n̄kemeke ndisobo utọ n̄kaiso ọkpọsọn̄ idaha mfịghe oro ke isua 20, 30, 40.”
Mme utọ ekikere ẹmi idịghe isio isio n̄kpọ inọ Michael ye Adrian kpọt. Mmọ ẹdi se inen̄erede itịbe inọ ediwak ebe ye ibanndọ oro itie ebuana mmọ odude ke ufọt en̄wan ye emem. N̄kprin̄kan nneme osụn̄ọ ke ekọn̄ inuaikọ. Mmọ “ẹkop” mme ikọ oro owo mîtịn̄ke. Mmọ ẹtịn̄ mme ikọ oro mîkekereke ntre. Mmọ ẹn̄wana ẹnyụn̄ ẹdori kiet eken ikọ, ekem ẹkabade ẹdu ke uyat uyat ndopuyo. Mmọ idianakede itie, mmọ inyụn̄ inen̄ekede idi “obụk kiet.” (Genesis 2:24) Itie ebuana oro okpu ofụri ofụri. Ndifiak edem ediwọrọ ndidianade ntie; ndika iso ediwọrọ ndisobo n̄kpọsọn̄ ini ke iso. Man ẹfep ubiak ke otu n̄kpọ mbiba ẹmi, ebe ye n̄wan emi ẹma ẹdianade man ẹdu nsannsan ke ifụre ke n̄kan̄ eke ntụk ẹkpọn̄ kiet eken.
Oyom mme utọ ebe ye n̄wan oro ‘ẹnyene ikike’ ke ndọ mmọ. (Mme N̄ke 1:5) Ikike emi odu ke Ikọ Abasi, kpa Bible. Udiana n̄wed oro Paul ekewetde ọnọ ẹsọk Timothy ọsọn̄ọ nte ke Bible edi se “ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende.” (2 Timothy 3:16) Ẹmekụt nte emi edide akpanikọ ke ndikọk n̄wụre ke nneme itie ndọ, nte nnyịn idikụtde.