Akpakịp Edidiọn̄ Ke mme Mbono District “Mme Ọnọ Un̄wana”
KE N̄KPỌ nte isua 2,700 ẹmi ẹkebede, prọfet Isaiah ama ewet ete: “Sese, ekịm eyefụk ererimbot, ọkpọsọn̄ ekịm eyenyụn̄ ofụk mme idụt.” (Isaiah 60:2) Didie ke mme ikọ oro ẹdi akpanikọ ntem! Nte ededi, idotenyịn odu, koro Jehovah amanam un̄wana ayama. Isua oko, ẹma ẹnọ mbon oro ẹmade un̄wana Abasi ufiop ufiop ikot ndidụk Mbono District “Mme Ọnọ Un̄wana.”
Ẹkebem iso ẹnam ndutịm mbono emi ke June ke Edem Edere America. Ke mme ọfiọn̄ oro ẹketienede, ẹma ẹnam enye ke Edem Usiahautịn ye Edem Usoputịn Europe, Ufọt Ufọt ye Edem Usụk America, Africa, Asia, ye mme isuo inyan̄ibom. Mbon oro ẹkedụkde ẹkedi ediwak miliọn. Ndien nso udia eke spirit oro enyenede isek ke mmọ ẹkedara ntem!
“Ẹmedio-o, Kpukpru Mbufo Mme Ọnọ Un̄wana!”
Ke ata ediwak ebiet mbono oro ọkọtọn̄ọ ke Friday onyụn̄ etre ke uwemeyo Sunday. Nte mme andidụk mbono oro ẹketiede ke itie mmọ ke usenubọk Friday, mmọ ẹma ẹkop ibio ibio utịn̄ikọ oro aban̄ade usụn̄ oro un̄wana Jehovah ayamade akan nte akanam ayamade ke ukperedem ini emi. Ndien etieibuot okpokoro mbono oro ama ọdọk mbot utịn̄ikọ. Enye ama ọsọn̄ọ etịn̄ ete ke mme ata Christian ana ẹdi mme ọnọ un̄wana onyụn̄ etịn̄ ufiop ufiop ete: “Ẹmedio-o, kpukpru mbufo mme ọnọ un̄wana!” Ndutịm mbono oro eyen̄wam mmọ oro ẹkedụkde ndikaiso n̄wụt un̄wana Jehovah.
Utịn̄ikọ ibuotikọ mbono ama osio se ofụri mbono oro aban̄ade owụt. Etịn̄ikọ emi ama eti mme andidụk mbono oro nte ke nyanyama idotenyịn ubonowo ama ebe efep ke in̄wan̄ Eden. Ọtọn̄ọde ke ini oro, Satan omokịm ubonowo enyịn abaha un̄wana akpanikọ. (2 Corinth 4:4) Edi, Jesus ama edi nte “un̄wana mme idụt.” (Isaiah 42:1-6) Enye ama ayarade mme nsu eke ido ukpono, anam ẹdiọn̄ọ mme utom ekịm, emenede itie edikara Jehovah ke enyọn̄, onyụn̄ ọkwọrọ eti mbụk Obio Ubọn̄. Mme anditiene Jesus ẹkenam ukem oro—ndien mmọ ke ẹsụk ẹnanam! (Matthew 28:19, 20) Etịn̄ikọ ke ifiopesịt ama ọdọhọ ete: ‘Nnyịn, ukem nte Jesus, imekeme ndidi mme ọnọ un̄wana. Idụhe utom ndomokiet oro enen̄erede edi akpan utom ke usen nnyịn akan oro. Ifetutom eke okponde akan oro inyụn̄ idụhe.’
Nte akpa ikpehe mbono oro akasan̄ade ekpere utịt, n̄kpọ n̄kpaidem ama otịbe. Etieibuot okpokoro mbono ama afiak ọdọk mbot utịn̄ikọ onyụn̄ ọkọtọt edisio mbufa udịm udịm tract inan̄. Ẹma ẹwụt idara oro ẹnyenede ẹnọ n̄kpọntịbe emi ye n̄kwakubọk idatesịt, ndien ẹma ẹnọ kpukpru mme andidụk mbono oro idem tract emi kiet kiet.
Ke uwemeyo Friday, ndutịm mbono oro ama owụk ntịn̄enyịn ke ndinọ mme Christian ọnọ un̄wana akpan item. Mme akpa utịn̄ikọ iba ẹma ẹnọ nti item ke nte ẹkemede ndifep ndidi se ekịm ererimbot asabarede. Sia Satan ekemede ndiwụt idem nte angel un̄wana, edi akpan n̄kpọ ndimụm eti idaha eke spirit n̄kama man mme n̄kpọ ndek eke ererimbot editap nnyịn. (2 Corinth 11:14) Paul ọkọnọ item ete: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Mme andidụk mbono oro ẹma ẹkop ẹte ke edikpụhọde eduuwem Christian edi edinam oro akade-kaiso. Ikaiso ndinam esịt nnyịn asana inyụn̄ ibot enye nte ikpepde Ikọ Abasi inyụn̄ idade se nnyịn ikpepde isịn ke edinam. Ntem, nnyịn itotịm ibiet Jesus ikan, emi “[ọkọyọhọde] ye mfọn ye akpanikọ.”—John 1:14.
N̄kparawa Mme Ọnọ Un̄wana
Ẹkewọn̄ọde ntịn̄enyịn ẹnọ mme uyen ke udiana ubak ikpehe edinam eke uwemeyo Friday. Akpa utịn̄ikọ oro (“Mme Uyen—Nso ke Mbufo Ẹbịne?”) ama otoro n̄kparawa Christian oro ẹnịmde utọ eti uwụtn̄kpọ mbuọtidem oro. Edi emi ama eti mmọ nte ke mmọ ẹnen̄ede ẹdi akpan iso en̄wan Satan. Idem efeheitọk mbuba oro ẹtịmde ẹnọ ukpep osụk oyoyom andikpep. Ke ukem usụn̄ oro, n̄kparawa owo ẹyom un̄wam mme ete ye eka mmọ ye eke esop man ẹkaiso ndisan̄a ke un̄wana.
Ẹma ẹsọn̄ọ ẹtịn̄ ẹban̄a emi ke ata eti drama oro Ndinam Se Inende ke Enyịn Jehovah, oro akadade ndutịm Friday okosịm utịt. Ẹma ẹsio uwụtn̄kpọ Edidem Josiah ẹwụt. Idem nte ekpri akparawa, enye ama ebiere ndinam n̄kpọ Jehovah. Mme idiọk odudu ẹma ẹdu ẹkan enye ẹkụk, edi ye ndausụn̄ otode akwa oku Hilkiah ye ke ntak ima esie kaban̄a Ibet Abasi, Josiah ama anam se ikenende ke enyịn Jehovah. Akpakam n̄kparawa Christian mfịn ẹnam n̄kpọ ke ukem usụn̄ oro.
Yak Un̄wana Ayama
Ke ẹma ẹkeduọk odudu ke okoneyo, mme andidụk mbono ẹma ẹfiak ẹdi mbono ke usenubọk Saturday ye ntịmidem kaban̄a n̄kaiso item ẹtode N̄wed Abasi oro ẹbọpde-bọp. Mmọ ikekwe edikpu. Ke etienede edineme itien̄wed Abasi eke usen, ndutịm ama akaiso ye nneme oro okowụtde mme nsio nsio usụn̄ oro Christian ekemede ndiyak un̄wana esie ayama. (Matthew 5:14-16) Ndikwọrọ ikọ edi akpan usụn̄ kiet, ndien eti edu n̄ko enyene akpan n̄kpọ ndinam. Nte etịn̄ikọ eketịn̄de, “ukwọrọikọ etịn̄ ọnọ mbon efen se nnyịn inịmde ke akpanikọ, edi ndiwụt ima edi edinanam enye n̄wụt.”
Ẹma ẹdụri ntịn̄enyịn mme andidụk mbono oro ẹwụt akpan n̄kpọ un̄wam ukwọrọikọ—mme tract. Ye ntọt oro ẹkenọde ke usen oro ekebede osụk odude ke ekikere, mme andidụk ẹma ẹkop mme ifiọkutom oro ẹwụtde nte n̄kpri n̄kpọutom ẹmi ẹnyenede odudu. Ẹma ẹsịn udọn̄ ẹnọ mme andidụk ndikama mme tract emi kpukpru ini, ẹben̄ede idem ẹnọ kpukpru idaha.
Ẹkewụk ntịn̄enyịn efen ke mme asiakusụn̄, kpa mme asuanetop Obio Ubọn̄ uyọhọ-ini oro ẹnamde utom ọkpọsọn̄ ke ndinọ un̄wana. Nnyịn iwụt esịtekọm didie ntem inọ mme asiakusụn̄ nnyịn ẹmi ẹnamde utom ọkpọsọn̄! Ndien ibat mmọ ke ọkọri. Idem ke mme idụt oro ẹnọde ifụre utuakibuot ke ndondo emi, ibat mme asiakusụn̄ ke ọtọt. Ẹma ẹsịn udọn̄ ẹnọ mme asiakusụn̄ ndida ifetutom mmọ nte ọsọn̄urua n̄kpọ. Ẹma ẹsịn udọn̄ ẹnọ mbon oro mînamke utom usiakusụn̄ kan̄a ndikere mban̄a idaha mmọ. Iso-ọfọn mmọ n̄ko ẹkeme ndidiomi mme ndutịm mmọ ndiyak un̄wana mmọ ayama ke utom uyọhọ-ini.
Ndidi ọnọ un̄wana esiwak ndisan̄a ye n̄waidem, ndien ẹma ẹnam emi an̄wan̄a ke utịn̄ikọ oro eketienede, “Ndinam N̄kpọ Jehovah ye Edu N̄waidem.” Paul ama eben̄e ete: “Ẹda ikpọkidem mbufo ẹnọ Abasi nte oduuwem uwa, emi asanade, emi onyụn̄ enemde Abasi ndibọ.” (Rome 12:1) Edu n̄waidem edi se mbon oro ẹyọde ukọbọ ẹsiwụtde. Mme asiakusụn̄ ẹsinam n̄waidem kpukpru usen man ẹkeme ndikaiso ndu ke utom uyọhọ-ini. Ke akpanikọ, kpukpru mme ata Christian ẹsinam n̄waidem, ẹsịnde idem ke utom Jehovah utu ke ndibịne ibụk ibụk, n̄kpọ obụkidem ererimbot emi. Utọ edinam oro ada akpakịp edidiọn̄ ẹtode Jehovah edi.
Utịn̄ikọ oro akanam n̄kpọ nte ntọn̄ọikọ oro otịmde odot ọnọ se iketienede—utịn̄ikọ baptism. Mbon oro ẹkenade baptism ke Mbono District “Mme Ọnọ Un̄wana” ke akpanikọ idifreke utịn̄ikọ emi. Baptism mmọ kpukpru ini edidi akpan n̄kpọ ke uwem mmọ. Ẹma ẹti mmọ nte ke mmọ ẹketiene uwụtn̄kpọ Jesus Christ, oro akanade baptism ke edide isua 30 ke emana. Akande oro, mbon oro ẹkenade baptism ẹma ẹkop inemesịt nditi nte ke mmọ ‘ẹma ẹfọrọde utom ekịm’ ẹnyụn̄ ẹnam ubiere ‘ndinam utom nnọ Ọbọn̄.’ (Rome 12:11; 13:12) Ye idara mmọ ẹma ẹdaha ẹda ke iso otu mme andidụk mbono oro ẹnyụn̄ ẹnam an̄wan̄wa uyarade oro ẹkekemede ndikop mbemiso mmọ ẹkade ẹkena baptism. (Rome 10:10) Nnyịn iben̄e edidiọn̄ Jehovah inọ kpukpru mbon oro ẹkeyararede uyakidem mmọ ẹnọ enye ebe ke ndibụhọ ke mmọn̄ baptism ke Mme Mbono District “Mme Ọnọ Un̄wana.”
Uwemeyo Saturday ekedi ini ọnọ edinọ in̄wan̄în̄wan̄ ntọt. Emi ekedi ke uduot utịn̄ikọ oro ẹkedọhọde “Ẹfep Mme Afia Idiọkitọn̄,” “Nte Owo ke Abiat Nti Ido Fo?” ye “Ẹkpeme Ẹbiọn̄ọ Kpukpru Orụk Ukpono Ndem.” Utịn̄ikọ ita ẹmi ẹma ẹsio ẹwụt mme usụn̄ n̄kari oro Satan adade ke ndinam Christian okop mmemidem. Judas Iscariot ekedi apostle, edi enye ama atap Jesus ke ntak okụk. Ekpri akparawa Samuel ọkọkọri okpon ke obio oro ẹkenịmde iwụk ebiet utuakibuot Jehovah, edi enye ama osobo ye ndusụk ndiọi nsan̄a oro mîkekemeke ndifep. (1 Samuel 2:12, 18-20) Ukpono ndem ekeme ndibuana mme n̄kpọ nte oburobụt ido idan̄ ye edisịn esịt ke n̄kpọ owo. (Ephesus 5:5; Colossae 3:5) Ih, idiọkitọn̄, idiọk nsan̄a, ye ukpono ndem ẹdi ata n̄kpọndịk ndien ana ẹfep.
Ndutịm mbono oro ndien, yak idọhọ, ama okpụhọde uduot. Utịn̄ikọ efen ama edemede mme enyene-ufọn mbụme ke Bible onyụn̄ ọbọrọ mmọ. Ke uwụtn̄kpọ, nte afo emekeme ndinam an̄wan̄a m̀mê ẹyenam mme owo oro mîkọbọhọ akpanikọ ndien ẹkpa mbemiso akwa ukụt ẹset? Nso ke Christian ekeme ndinam ke ini enye mîkemeke ndikụt nsan̄andọ oro odotde? Man ẹnam ifiọk Bible mmọ otụn̄ọ, ẹma ẹsịn udọn̄ ẹnọ mme andidụk ndida Watch Tower Publications Index nnam n̄kpọ ọyọhọ ọyọhọ, akpan akpan ke idak ibuotikọ oro “Mme Mbụme Ẹtode Mme Andikot.”
Edidu ye Ediyarade Christ
Akpatre ikpehe ndutịm Saturday ọkọwọn̄ọde ebịne prọfesi ye nneme ẹkekotde “Ndisịn Un̄wana ke Edidu ye Ediyarade Christ.” Ẹma ẹdụn̄ọde nsio nsio ikpehe “idiọn̄ọ” oro ẹwụtde edidu Jesus Christ. (Matthew 24:3) Ke ọyọhọ ikpehe iba, ẹma ẹneme ẹban̄a utom oro “asan̄autom emi anamde akpanikọ, onyụn̄ enyenede ọniọn̄” anamde ke eyomfịn. (Matthew 24:45-47) Ẹma ẹnyan ubọk ẹwụt nte ke ọtọn̄ọde ke 1919 otu ofụn emi ke ada usụn̄ ke utom edikwọrọ eti mbụk Obio Ubọn̄ ke edinam akpanikọ. Ekem ẹma ẹtan̄ akwa otuowo ẹbok ke ofụri mme idụt ndibuana ye mme Christian oro ẹyetde aran ke ndiwụt un̄wana Jehovah. Etịn̄ikọ ama eberi ke ndidọhọ ete: “Ẹyak kpukpru owo ye ifịk ẹkaiso ndinọ asan̄autom oro anamde akpanikọ onyụn̄ enyenede ọniọn̄ ibetedem. Edi n̄kukụre ke ndinam emi ke usen kiet ke mîbịghike ke kpukpru mbon mbieterọn̄ ẹdikeme ndikop mme ikọ inemesịt ẹmi: ‘Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.’”—Matthew 25:34.
Akpatre etịn̄ikọ ama eneme se ediyarade Jesus Christ ọwọrọde ye mme n̄kpọ oro ẹbuanade. (1 Corinth 1:7) Nso ifiọk n̄kpọntịbe ke ediyarade oro edidi ntem! Ẹyesobo Akwa Babylon ẹfep. Akwa en̄wan oro ke ufọt ererimbot Satan ye Jesus ye mme angel esie eyesịm utịt ke ndisobo editịm n̄kpọ emi mfep. Ke akpatre, ẹyekọbi Satan ke idemesie ke ukpe ẹnyụn̄ ẹbọ enye odudu. Edi ubọhọ eyedu ọnọ ikọt Abasi, ye ndọ Eyenerọn̄ ke heaven ye edida obufa isọn̄ ndi. Etịn̄ikọ ama anam otuowo esie ẹkop idatesịt ebe ke ndisio obufa ekpri n̄wed oro Nte Abasi Enen̄ede Ekere Aban̄a Nnyịn? Nso eti n̄kpọ un̄wam ke oro edidi ntem ọnọ mbon nsụhọdeidem oro ẹnyenede ndidiọn̄ọ mban̄a Andibot oro ekerede aban̄a nnyịn ye mme uduak esie kaban̄a nnyịn!
Mme Ubon Christian
Sunday, akpatre usen mbono, ama edisịm kemi. Nte ededi, ediwak n̄kpọ ke ẹkesụk ẹsụhọ ndisio n̄wụt. Ke ẹma ẹkeneme itien̄wed Abasi eke usen ẹkụre, ẹma ẹwọn̄ọde ntịn̄enyịn ẹnọ ubon Christian ye nneme oro “Ndise Mban̄a Kiet Eken ke Ubon Christian.” Akpa ikpehe ama an̄wam mme andidụk mbono ndidiọn̄ọ ndịben̄kpọ aban̄ade edinyene ubon Christian oro okụtde unen: ndinịm mme n̄kpọ eke spirit akpa. Ọyọhọ ikpehe iba ama esịn udọn̄ ọnọ mme ubon ndinam mme n̄kpọ ọtọkiet, edide oro abuana edidụk mme mbonoesop, utom an̄wautom, ukpepn̄kpọ ubon, m̀mê unọ idem inemesịt. Ndien ọyọhọ ikpehe ita ke nneme oro ama eti mme andidụk aban̄a ifetutom ye mbiomo mmọ ke ndise mban̄a mbonusọn̄. Etịn̄ikọ ama ọdọhọ ete, “Nditọete iren ye iban nnyịn oro ẹma ẹkesọn̄ ẹdi uku ẹnọ esop.” Ẹyak nnyịn ida ifiọkutom mmọ ke ọsọn̄urua n̄kpọ inyụn̄ ikpebe nsọn̄ọnda mmọ.
Ẹma ẹdụn̄ọde se ikọ oro “ẹnyene eti ibuot” ọwọrọde. (1 Peter 4:7) Owo oro enyenede eti ibuot ada ukem ukem, enyene ibuot, ekere n̄kpọ, osụhọde idem, onyụn̄ enyene eti ekikere. Enye ekeme ndidiọn̄ọ eti ye idiọk, akpanikọ ye nsu. Akande oro, enye odomo ndimụm eti nsọn̄idem eke spirit n̄kama.
Akpatre utịn̄ikọ ke ndutịm usenubọk Sunday ama eneme aban̄a nsụkibuot nnyịn nnọ Abasi ye Christ. Etịn̄ikọ ama etịn̄ ete, “Ufọn nsụkibuot nnọ Jehovah Abasi ye Eyen esie, Jesus Christ, idịghe se ẹkpetịn̄de-tịn̄.” Enye ama akaiso ndisio n̄wụt nte emi otụkde kpukpru ikpehe ke uwem nnyịn. Nso idin̄wam nnyịn ndikaiso ndu ke nsụkibuot? Mme edu inan̄: ima, uten̄e Abasi, mbuọtidem, ye nsụhọdeidem.
Uwemeyo Sunday
Inikiet inikiet, uwemeyo Sunday ye akpatre ikpehe mbono oro ama edisịm. Ye ediwak owo, eketie nte mbono akam ọtọtọn̄ọ, edi enye ke akakam asan̄a ekpere utịt esie.
Ibuotikọ utịn̄ikọ an̄wa ekedi “Tiene Un̄wana Ererimbot.” Mbon oro ẹkedude ẹma ẹkop inem inem edinam an̄wan̄a oro aban̄ade udeme oro ata un̄wana enyenede ke ndinịm uwem. Ndien etịn̄ikọ ama owụt n̄kponn̄kan ufọn un̄wana eke spirit. Ata un̄wana onịm nnyịn uwem ke ibat ibat isua, edi un̄wana eke spirit ekeme ndinịm nnyịn uwem ke nsinsi. Akpan n̄kpọ eke utịn̄ikọ emi ekedi nneme ọkọn̄ọde ke ufan̄ikọ kiet kiet ke John 1:1-16, ke ebiet emi ẹwụtde Jesus nte edide un̄wana ererimbot. Mfịn, ke mme akpatre isua eke idiọk editịm n̄kpọ emi, edi usọp usọp n̄kpọ akan nte akanam edide nditiene Jesus ke usụn̄ emi.
Ke ẹma ẹkekụre utịn̄ikọ Ukpepn̄kpọ Enyọn̄-Ukpeme oro ẹkediomide ẹnọ urua oro, ini ama edikem ọnọ akpatre utịn̄ikọ. Ke inemesịt, etịn̄ikọ ama owụt ete ke ediwak n̄kpọ ẹdu oro isakde iso ise ke ini iso. Ke uwụtn̄kpọ, enye ama ọtọt obufa kaset, kpa drama oro Doing God’s Will With Zeal. Ndien ikokụreke ke oro. Akana nte ẹsio udịm udịm mbufa kaset video emi ẹkotde The Bible—A Book of Fact and Prophecy, akpa ke ibuotikọ oro ọdọhọ The Bible—Accurate History, Reliable Prophecy.
Ke akpatre, etịn̄ikọ ama ọtọt ete ke mme mbono district usen inan̄ ẹyedu ke 1993, esịnede mme akpan mbono ofụri ererimbot ke Africa, Asia, Europe, ye Edem Usụk America. Idem kpa ye oro Mbono District “Mme Ọnọ Un̄wana” okokụrede, mme andidụk ẹkeme nditọn̄ọ ndinam ndutịm nnọ isua oro etienede.
Ndien ini ama edikem ọnọ mme andidụk mbono oro ndifiak nnyọn̄ ufọk. Ke akpanikọ, mmọ ẹma ẹnam ọkpọsọn̄ ubiere ndikaiso nyak un̄wana ayama akan nte akanam edide ke n̄kịmn̄kịm ererimbot emi. Ke usen ita oro ẹkeyọhọde ye nti udia eke spirit ẹbede, mme ikọ akpatre itien̄wed Abasi oro ẹkekotde ke akpatre utịn̄ikọ ama enyene akamba n̄kpọ oro ọkọwọrọde: “Jehovah edi Abasi, enye omonyụn̄ an̄wan̄a nnyịn. . . . Mbufo ẹkọm Jehovah, koro enye ọfọnde: koro ima esie ebịghide ke nsinsi.”—Psalm 118:27, 29.
[Ndise ke page 15]
Ndutịm mbono ke usem Russia
[Mme ndise ke page 16, 17]
Mme andibuana ke Otu Ukara ẹma ẹtịn̄ ikọ ke ediwak mbono
Mme andidụk ẹdide mbon Japan ẹma ẹsịne ke otu mbon oro ẹkesopde idem ke St. Petersburg, Russia
Edemede-owo udọn̄ drama Bible ama osio owụt ufọn edinam se inende ke enyịn Jehovah
Mbufa mme ọnọ un̄wana ẹma ẹyarade uyakidem mmọ ẹnọ Jehovah ke ndina baptism
Mme andidụk mbono ẹnọde n̄kpan̄utọn̄ ke ndutịm ke St. Petersburg
[Ndise ke page 18]
Mme andidụk ẹma ẹkop nduaidem ndibọ obufa ekpri n̄wed oro “Nte Abasi Enen̄ede Ekere Aban̄a Nnyịn?”