Akwa Andibot Nnyịn Ye Mme Utom Esie
ẸKPON ADAN̄A DIDIE! Uyom uyom idon̄ode mmọn̄ Iguaçú m̀mê Niagara, ikpọ ebeden̄ Arizona m̀mê Hawaii, ndiye edịk Norway m̀mê New Zealand—nso mfiori uyai ke mme utịbe n̄kpọ obot ẹmi ẹsio ntem! Edi nte mmọ ẹdi sụk mme n̄kpọ oro ẹkedidude ke mbuari eke inua-okot Eka Obot? Baba, mmọ ẹmetịm ẹkpon ẹkan oro! Mmọ ẹdi mme enyene-uten̄e utom odudu eke Akwa Andibot, kpa ima ima Ete eke heaven oro enyene-ọniọn̄ Edidem Solomon ekewetde aban̄a ete: “Enye ama anam kpukpru n̄kpọ eye ke ini mmọ: ama onyụn̄ esịn mmọ asian ke esịt, koro edieke asian mîdụhe, owo ikemeke ndikụt n̄kpọ emi Abasi anamde, ọtọn̄ọde ke ibuot tutu osịm utịt.” (Ecclesiastes 3:11) Ke akpanikọ, ẹyeda ubonowo anana-utịt ini ndidụn̄ọde ofụri ubọn̄ ubọn̄ utom emi Andibot nnyịn anamde ọyọhọ ofụri ekondo.
Nso Akwa Andibot ke nnyịn inyene ntem! Ndien nnyịn ikop idatesịt didie ntem nte ke enyene ofụri-odudu Abasi emi “ke ukperedem ini emi ama etịn̄ [ikọ] ọnọ nnyịn [ebe] ke Eyen; emi enye ekemekde onịm, ete edidi andinyene kpukpru n̄kpọ, okonyụn̄ adade ubọk Esie obot ekondo.” (Mme Hebrew 1:2) Eyen emi, Jesus Christ, ama owụt esịtekọm aban̄a ndiye edibotn̄kpọ Ete esie. Enye ama esitịn̄ aban̄a mmọ ediwak ini ke anamde mme uduak Ete esie an̄wan̄a ye ke etịn̄de ikọ ndọn̄esịt ọnọ mme owo oro ẹkekpan̄de utọn̄ ẹnọ enye. (Matthew 6:28-30; John 4:35, 36) “Oto mbuọtidem” ediwak owo ẹmenịm ẹte ke “ẹkeda ikọinua Abasi” ẹbot mme utịbe n̄kpọ obot. (Mme Hebrew 11:3) Uwem nnyịn eke usen ke usen ekpenyene ndiwụt utọ mbuọtidem oro.—James 2:14, 26.
Ke akpanikọ, mme edibotn̄kpọ Abasi nnyịn ẹkpon. Mmọ ẹmewụt ọniọn̄ esie, odudu esie, edinen ido esie, ye ima esie ke utịbe utịbe usụn̄. Ke uwụtn̄kpọ, enye ama anam isọn̄ nnyịn otụhọ onyụn̄ anam enye asan̄a akanade utịn man edibotn̄kpọ esie eke ini iso, edide owo, ẹkpedara inem inem edisan̄a n̄kanade eke mme ini. Abasi ọkọdọhọ ete: “Adan̄a ofụri ini eke isọn̄ ododu, utọ, ye ukpen̄e, ye tuep ye eyo, ye ndaeyo ye ukwọ ye uwemeyo ye okoneyo iditreke.” (Genesis 8:22) N̄ko-n̄ko, Abasi ama ọdọn̄ ediwak mme enyene-ufọn n̄kpọ ke isọn̄ nnyịn. Akpan akpan, enye ama anam uwak mmọn̄ odu, man nte ini akade akpakabade edi akpan ubak n̄kpọ oro enyenede ufọn onyụn̄ ọnọde kpukpru n̄kpọ eke ẹdude ke isọn̄ uwem.
Ke ‘usen edibotn̄kpọ’ itiokiet ẹmi ẹdude ke adiana ke adiana, emi kiet kiet esịnede ediwak tọsịn isua ke uniọn̄, “spirit Abasi” ama akaiso ndidiọn̄ isọn̄ nnọ ubonowo ndidụn̄. Un̄wana emi nnyịn idade ikụt usụn̄, ofụm oro nnyịn in̄wekde, nsatisọn̄ oro nnyịn idụn̄de ke esịt, awawa ikọn̄, uwemeyo ye okoneyo oro etienede ke adiana ke adiana, iyak, mme inuen, mme unam—Akwa Andibot nnyịn akanam kpukpru emi ke adiana ke adiana kaban̄a udia ye inemesịt owo. (Genesis 1:2-25) Ke akpanikọ, nnyịn imekeme ndidiana ye andiwet psalm ke ndifiori nte: “O Jehovah, n̄kpọ ẹmi afo anamde ẹwak didie! Afo amanam mmọ kpukpru ke ifiọk; inyene fo ọyọhọ ke ererimbot.”—Psalm 104:24.
N̄wọrọnda Utom Obot Abasi
Nte ọyọhọ “usen” edibotn̄kpọ itiokiet akasan̄ade ekpere utịt, Abasi ama anam erenowo ndien ekem nsan̄a andin̄wam enye, kpa n̄wan. Nso utọ enyene-usọ utịt edibotn̄kpọ eke isọn̄, enyenede ndyọ akan kpukpru edibotn̄kpọ oro enyịn okụtde ẹmi ẹkebemde iso ẹdu! Psalm 115:16 asian nnyịn ete: “Enyọn̄ edi heaven Jehovah: edi enye ada isọn̄ ọnọ nditọ owo.” Nte ekemde, Jehovah okobot nnyịn nte mme owo ẹmi ẹdide ukpọn̄ man nnyịn ikeme ndikop inemesịt inyụn̄ ida mme akpa edibotn̄kpọ esie inam n̄kpọ ke isọn̄. Nnyịn ikpowụt esịtekọm didie ntem iban̄a enyịn nnyịn—emi awakde n̄kukọhọ akan nye-n̄kan ukwak usio ndise—oro ekemede ndisio ediwak uduot n̄kpọ oro ẹkande nnyịn ẹkụk! Nnyịn imenyene utọn̄ nnyịn—ọfọnde akan ubọk-nnam ndutịm ukwak utịn̄ikọ ekededi—ndin̄wam nnyịn ikop inem nneme, ikwọ, ye ndinem ikwọ inuen. Nnyịn imenyene n̄kpọ utịn̄ikọ oro ẹbotde ẹsịn nnyịn ke idem, esịnede edeme oro ekemede ndinam nsio nsio n̄kpọ. Ukeme ndikop inem n̄kpọ oro edeme enyenede, adianade ye ukeme ndikop ufịk n̄kpọ, anam n̄ko ikeme ndikop inem inem ufuọn̄ oro odude ke anana-utịt uduot nsio nsio udia. N̄ko isikop inem didie ntem ke ini ubọk owo ima otụkde nnyịn! Ke akpanikọ nnyịn imekeme ndikọm Andibot nnyịn, kpa nte andiwet psalm ọkọkọmde, emi ọkọdọhọde ete: “Nyekọm fi, koro nyenede ndyọ ye ndịk; se afo anamde edi utịbe; ukpọn̄ mi onyụn̄ ọfiọk enene.”—Psalm 139:14.
Ima-Mfọnido Andibot Nnyịn
Andiwet psalm ekewet ete: “Oh mbufo ẹkọm Jehovah; koro enye ọfọnde . . . Enyeemi anamde mme utịben̄kpọ ke idemesie ikpọn̄: koro ima esie odude ke nsinsi.” (Psalm 136:1-4) Ima-mfọnido oro omonụk enye idahaemi ndinam mme utịben̄kpọ oro ẹtịmde ẹkpon ẹkan kpukpru edibotn̄kpọ oro isụk itịn̄de iban̄a mi. Ih, idem ke adan̄aemi enye osụk ọduọkde odudu ke ndikobot mme n̄kpọ oro ẹkụtde ke enyịn, enye ke obot n̄kpọ ke idaha eke spirit. Enye anam emi ke ndibọrọ idiọk eneni oro ke usọn̄enyịn ekenenide enye ke iso. Didie ke edi ntre?
Ẹkesịn akpa eren ye n̄wan ke ubọn̄ ubọn̄ paradise, Eden. Nte ededi, ọsọn̄ibuot angel, Satan, ama emenede idem ke enyọn̄ nte abasi onyụn̄ ada owo iba oro usụn̄ ndisọn̄ ibuot ye Jehovah. Nte enende, Abasi ama obiom mmọ ikpe n̄kpa, ye utịp edide nte ke nditọ mmọ, kpa ofụri ekpụk ubonowo, ẹwọrọ ẹto idiọkn̄kpọ, ye n̄kpakpa idaha. (Psalm 51:5) Mbụk Bible aban̄ade Job owụt ete ke Satan ama amia ata ye Abasi, ọdọhọde ete ke baba owo kiet ikemeke ndimụm nsọn̄ọnda ke n̄kan̄ Esie n̄kama ke idak idomo. Edi Job ama owụt ete ke Satan edi ata idiọk osu nsu, kpa nte ediwak anam-akpanikọ asan̄autom Abasi eken ke mme ini Bible n̄ko tutu osịm eyo nnyịn emi ẹkewụtde. (Job 1:7-12; 2:2-5, 9, 10; 27:5) Jesus, nte mfọnmma owo, ama onịm n̄wọrọnda uwụtn̄kpọ edimụm nsọn̄ọnda n̄kama.—1 Peter 2:21-23.
Ntre, Jesus ama ekeme ndidọhọ ete, “Ọbọn̄ ererimbot emi [Satan] inyeneke baba n̄kpọ kiet ke esịt Mi.” (John 14:30) Edi, tutu osịm mfịn emi “ofụri ererimbot onyụn̄ esịne ke ubọk andidiọk.” (1 John 5:19) Ke ama akafan̄a aban̄a unen itie edikara Jehovah, ẹma ẹnọ Satan n̄kpọ nte isua 6,000 ndiwụt m̀mê itie edikara oro enye akarade ubonowo ekeme ndikụt unen. Didie ke enye okpu idiọk idiọk ntem, nte idiọk idaha ererimbot akade iso etie ntiense aban̄a! Ima ima Abasi nnyịn, Jehovah, eyesọp ndisio idiọk n̄ka ererimbot emi mfep, owụkde nnennen itie edikara esie ke isọn̄. Nso akama-inemesịt ubọhọ ke emi edida ntem ọsọk ubonowo emi oyomde emem emem, edinen ukara!—Psalm 37:9-11; 83:17, 18.
Nte ededi, ikụreke ke oro! Ima-mfọnido Abasi eyekaiso ndiwụt idem ke isọn̄ ọkọn̄ọde ke ikọ Jesus oro odude ke John 3:16: “Abasi akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” Edifiak n̄wụk idotenyịn nsinsi uwem emi ke isọn̄ nnọ ubonowo abuana edibot mbufa n̄kpọ. Nso ke mmọemi ẹdi? Didie ke mmọ ẹdinyene ufọn ẹnọ ubonowo emi ẹtuan̄ade? Ibuotikọ nnyịn efen eyeneme.