‘Ẹkûkpa Mba Ke Edinam Eti N̄kpọ’
Mme Akpan N̄kpọ Ẹtode Udiana N̄wed Thessalonica
UDỌN̄ oro apostle Paul ekenyenede ọnọ mme Christian ke obio Thessalonica ke Macedonia ama ọnụk enye ndiwet udiana n̄wed esie nnọ mmọ, ke n̄kpọ nte isua 51 C.E. Ndusụk owo ke esop oro ke ndudue ẹkedọhọ ke edidu Christ ama ekpere. Idem eyedi ẹkekabade n̄wed oro nte mînenke ẹkekotde ẹnọ Paul nte owụtde ke “usen Ọbọn̄ [“Jehovah,” NW]” ama ededi.—2 Thessalonica 2:1, 2.
Ntre ama oyom enen̄ede ekikere ndusụk mbon Thessalonica. Ke udiana n̄wed esie, Paul ama otoro mmọ ke mbuọtidem mmọ ndikọri, uwak ima, ye ediyọ ke edinam akpanikọ. Edi enye ama owụt n̄ko nte ke nsọn̄ibuot eyedi mbemiso edidu Jesus. Ntre n̄kpọsọn̄ ini ama odu ke ini iso, ndien n̄wed apostle oro ama an̄wam mmọ ndinam item esie: “Ẹkûkpa mba ke edinam eti n̄kpọ.” (2 Thessalonica 3:13, NW) Ikọ Paul ẹkeme ndin̄wam nnyịn ke ukem usụn̄ oro.
Ediyarade ye Edidu Christ
Paul ekebemiso etịn̄ aban̄a edibọhọ ukụt. (1:1-12) Emi edidi “ke ini emi Ọbọn̄ Jesus editode ke heaven ọbiọn̄ọ [“ayarade idem,” NW] . . . ye mme angel odudu Esie.” Ẹyeda nsinsi nsobo ke ini oro ẹtiene mmọ eke mîsụkke ibuot inọ eti mbụk. Edi n̄kpọ ndọn̄esịt nditi emi ke ini ikụtde ukụt ke ubọk mme andikọbọ.
Ekem, Paul ama anyan ubọk owụt ke ẹyeyarade “owo eke edide ata abiatibet” mbemiso edidu Christ. (2:1-17) Ikanaha mbon Thessalonica ẹkop nduaidem ke etop ekededi oro ọnọde ekikere nte “usen Ọbọn̄ [“Jehovah,” NW]” ama ososịm mmọ. Akpa, nsọn̄ibuot ekenyene ndida itie ẹyenyụn̄ ẹyarade owo eke edide ata abiatibet. Ke ini oro ebede, Jesus eyesobo enye, anamde ntre ke uyarade edidu esie. Mi kan̄a, Paul ama ọbọn̄ akam ete Abasi ye Christ ẹdọn̄ mbon Thessalonica esịt ẹnyụn̄ ẹnam mmọ “ẹsọn̄ọ ẹda ke kpukpru nti utom ye ikọ.”
Ndinam N̄kpọ ye Mmọ eke Ẹsan̄ade Otịme Otịme
Ke otu ikọ Paul efen efen ekedi mme item ke nte ẹnamde n̄kpọ ye mme owo eke ẹsan̄ade otịme otịme. (3:1-18) Enye ama owụt mbuọtidem nte ke Ọbọn̄ eyesọn̄ọ mbon Thessalonica idem onyụn̄ ekpeme mmọ mbak andidiọk, Satan kpa Devil. Edi mmọ ẹkenyene ndinam mme usio-ukot kaban̄a ufọn n̄kpọ spirit mmọ. Mmọ ẹkenyene ndidianade idem ye mmọ eke ẹsan̄ade otịme otịme, mmọ oro ẹnọhọde ke mme mbubehe ẹmi mîbeheke mmọ ẹnyụn̄ ẹsịnde ndinam utom. Paul ọkọdọhọ ete: “Edieke owo mînyịmeke ndinam utom, enye okûnyụn̄ adia n̄kpọ.” Ẹkeneyene ndinịm mme utọ owo oro idiọn̄ọ, ndien owo ikenyeneke ndidụk ndụk ye mmọ, okposụkedi ekenyenede nditụnọ mmọ nte nditọete. Mme anam-akpanikọ Christian mbon Thessalonica ikanaha ẹkpa mba ke edinam eti n̄kpọ, ndien ama ọdọn̄ Paul ete mfọn Ọbọn̄ Jesus Christ oro owo mîdotke odu ye kpukpru mmọ.
Udiana n̄wed emi Paul ekewetde ọnọ ẹsọk mbon Thessalonica ọnọ Mme Ntiense Jehovah nsọn̄ọ nte ke ubọhọ mmọ ke ukụt oro mmọ ẹkụtde eyedi ke ini Christ ye mme angel esie ẹsiode usiene ẹnọ mbon oro mîsụkke ibuot inọ eti mbụk. Ndifiọk nte ke ẹyesọp ẹda utịt ẹsọk “owo eke edide ata abiatibet” (otu mme ọkwọrọ ederi Christendom) ye kpukpru nsunsu ido ukpono edi n̄kpọ ọsọn̄ọde mbuọtidem n̄kọ. Kan̄a kemi, ẹyak nnyịn inam item Paul oro ọdọhọde nnyịn ikûkpa mba ke edinam eti n̄kpọ.
[Ekebe/Ndise ke page 23]
Ikọ Jehovah Asan̄a Usọp Usọp: Paul ekewet ete: “Ẹnam n̄kpeubọk ẹnọ nnyịn ẹte, ikọ Abasi edifehe asuana onyụn̄ enyene ubọn̄, kpa nte edide ke n̄kan̄ mbufo.” (2 Thessalonica 3:1) Ndusụk nditọ ukpepn̄kpọ ẹma ẹnọ ekikere ẹte ke Paul eketịn̄ aban̄a mbonitọk ẹmi ẹfehede itọk usọp usọp ke mbuba. Ke adan̄aemi owo mîfiọkke oro, Paul okoyom akam mme Christian mbon Thessalonica man enye ye nsan̄autom esie ẹkpesuan ikọ akpanikọ usọp usọp ye unana ubiọn̄ọ. Sia Abasi esibọrọde utọ akam emi, ikọ esie ‘efehe asuana’ nte ẹkwọrọde eti mbụk usọp usọp ke akpatre usen ẹmi. Ikọ Jehovah n̄ko ke “enyene ubọn̄,” mme andinịm ke akpanikọ ẹnen̄ede ẹbat enye nte “odudu Abasi, emi ọwọrọde edinyan̄a,” nte enye ekedide ke otu mbon Thessalonica oro ẹkenyịmede enye. (Rome 1:16; 1 Thessalonica 2:13) Nnyịn idat esịt didie ntem nte ke Abasi ke ọdiọn̄ mme anditan̄a Obio Ubọn̄ onyụn̄ ọkọri udịm mme andituak ibuot nnọ enye usọp usọp!—Isaiah 60:22.