Ẹmụm Mbuọtidem Ẹkama ke Abasi ye Christ

Mme Akpan N̄kpọ Ẹtode N̄wed Mbon Colossae

MBUỌTIDEM ke Jehovah Abasi ye Jesus Christ edi akpan n̄kpọ kaban̄a edinyan̄a. Edi ndimụm utọ mbuọtidem oro n̄kama edi n̄kpọ-ata. Oro ekedi ntre ọnọ mme Christian ke Colossae, kpa obio oro okodude ke edem usiahautịn Ephesus ke Asia Minor. Ntak-a? Koro do nsunsu mme andikpep ke ukwan̄ usụn̄ ẹkenịm nte ke edinyan̄a ọkọn̄ọ ke edina mbobi, se owo adiade, ye edinịm ndusụk usen usọrọ.

Nte an̄wan̄ade, ndien, apostle Paul ama ekere aban̄a mfọnọn̄kpọ eke spirit mme Christian ke Colossae, ndien enye ke akpanikọ ama oyom mmọ ẹmụm mbuọtidem mmọ ke Abasi ye Christ ẹkama. Ntre ke ekperede utịt akpa n̄kpọkọbi apostle oro ke Rome (ke n̄kpọ nte 60-61 C.E.), enye ama ewet n̄wed ọnọ esọk mbon Colossae oro ẹketịmde ndibiat mme ukwan̄ ekikere nnyụn̄ mbọp mbuọtidem ọsọn̄. Ẹyak ise nte nnyịn n̄ko ikemede ndibọ ufọn nto ima ima ikọ esie.

Ediwụt Esịtekọm Nnọ Idaha Christ

Ke ntọn̄ọ ntọn̄ọ n̄wed esie, Paul okosio ediwụt esịtekọm nnọ Jesus owụt. (1:1–2:12) Enye ama otoro mbon Colossae ke ntak mbuọtidem mmọ ke Christ ye ke ntak ima emi mmọ ẹmade ekemmọ mme andinịm ke akpanikọ. Paul ama etịn̄ otụk akakan idaha Christ nte enyeemi ebede ke enye ẹbot kpukpru n̄kpọ eken, Ibuotufọk Abasi, ye andibemiso mmana ke otu mme akpan̄kpa. Ẹnam edifiak ntie ke emem ye Abasi odu ebe ke Christ, kpa enyeemi ofụri inyene ọniọn̄ ye ifiọk edịbede ke idem. Ye kpukpru ẹmi ke ekikere, mme Christian ẹkenyene ndikaiso nsan̄a ke Christ inyụn̄ iyakke owo ndomokiet ada ifiọkowo obụme mmọ.

Ebede ke Christ, Abasi ama ọkpọnọde Ibet efep. (2:13-23) Ẹma ẹkọn̄ enye ke ndamban̄a usụn̄ ẹdian ke eto n̄kpa Jesus. Se Ibet okoyomde ekedi sụk “ukpọn̄ n̄kpọ eke edidide, edi idem n̄kpọ ẹsan̄a ye Christ.” Ke ndisọn̄ọ nyịre ke Christ, mmọ ikayakke owo ndomokiet ọbọ mmọ utịp uwem unana n̄kpa ke heaven ọduọk.

Ediwụt Esịtekọm Nnọ Abasi ye Christ

Ekem Paul ama akpak mbon Colossae ndimen obufa owo nsịne nnyụn̄ nsụkibuot nnọ odudu Jesus Christ. (3:1-17) Ke ndiwụk ekikere mmọ ke n̄kpọ enyọn̄, mmọ ẹma ẹnịm n̄kpọ eke spirit akpa ke uwem. Emi ama oyom ẹduọk ukwan̄ eduuwem ye utịn̄ikọ. Ẹdidiọn̄ mmọ didie ntem edieke mmọ ẹsịnede utọ edu nte mbọm, nsụkidem, ye ima! Emem Christ eyekara esịt mmọ edieke mmọ ẹnamde kpukpru n̄kpọ ke enyịn̄ Jesus, ẹkọmde Abasi ebe ke enye.

Esịtekọm oro ẹnyenede ẹnọ Jehovah Abasi ye Jesus Christ ekpenyene n̄ko ndikara itie ebuana Christian ye mbon en̄wen. (3:18–4:18) Ibanndọ, mme ebe, nditọ, ifụn, ye mme eteufọk ẹkenyene ndinam utom mmọ ye mbak Abasi ẹnyụn̄ ẹnyene Christ ke ekikere. Onyụn̄ edi se ẹyomde didie ntem ndikọbọ ke akam nnyụn̄ nsan̄a ọniọn̄ ọniọn̄!

N̄wed oro Paul ekewetde ọnọ ẹsọk mbon Colossae ekeme ndin̄wam nnyịn ndifep nsunsu ukpepn̄kpọ ẹmi ẹkemede ndibọ nnyịn utịp uwem nduọk. Apostle oro ndidori nsọn̄uyo ke edifiọk itie odudu Jehovah ye Eyen esie ekeme ndinyene odudu ke nte nnyịn inamde n̄kpọ ye mmọ en̄wen. Ndien ẹwọn̄ọ uwak edidiọn̄ ẹnọ nnyịn edieke isọn̄ọde imụm mbuọtidem ke Abasi ye Christ ikama.

[Ekebe/Ndise ke page 26]

N̄wed ẹwetde ẹnọ ẹsọk Mbon Laodicea: Paul ekewet ọnọ ẹsọk mbon Colossae ete, “Ẹma ẹkot n̄wed emi ke otu mbufo, ẹnam ẹkot enye ke ufọk Abasi nditọ Laodicea n̄ko; ẹnyụn̄ ẹbọ n̄wed emi otode ke Laodicea n̄ko ẹkot.” (Colossae 4:16) Laodicea ekedi obio uforo ke edem usoputịn Asia Minor, oro mme usụn̄ ẹyịride enye ye mme utọ obio nte Philadelphia ye Ephesus. Iso-ọfọn, utom Paul ke Ephesus ama osịm Laodicea, okposụkedi enye mîkanamke utom do. Enye ama ọnọ n̄wed ẹsọk mme Christian ẹtode Laodicea, okposụkedi ndusụk nditọ ukpepn̄kpọ ẹnịmde ke enye ekedi ukem ye enyeoro enye ekewetde ọnọ ẹsọk mbon Ephesus. Owo ikwe n̄wed oro ẹkewetde ẹnọ ẹsọk Laodicea ke Bible, ndusụk koro enye mîkesịneke ntọt oro iyomde mfịn, mîdịghe eyedi enye afiak etịn̄ mme akpan n̄kpọ oro ẹma ẹketetịn̄ ẹtụk mfọn mfọn ke ndisana n̄wed eken.

[Ndise]

N̄wụre ke Laodicea