Nso Itịbe Inọ Uduot Owo?

“Ntak emi nnyịn inyenede mfiomo nditọ ke emana emi-e? Ntak emi nnyịn inyenede mfiomo unam-a? Ntak emi nnyịn inyenede edinam afai-a? . . . Ntak emi mme owo ẹwọn̄ọrede ẹbịne edinam oyomonsia-a? Ntak emi mme owo ẹmade ndida n̄kpọsọn̄ ibọk-ọ? Kamse, ke ini afo enyenede kpukpru n̄kpọ, ndi ndusụk owo ẹsiwọn̄ọde ẹbịne mme akpan n̄kpọ ẹmi osụhọrede ofụri ntatenyịn itie?”

EDI akpan isụn̄utom ukara Britain okobụp mme mbụme oro ye nsọn̄uyo. Iso-ọfọn afo ama obụp mbiet mbụme ẹmi ediwak ini. Nte afo omokụt ibọrọ ẹmi ọnọde uyụhọ?

Ke esịnde mbụme esie ke usụn̄ oro an̄wan̄ade, akpan isụn̄utom ukara oro ọkọdọhọ ete: “Ke ediwak isua, ke ini n̄kedide akparawa an̄wan n̄konyụn̄ ndude ke mbre ukara ye ofụri idotenyịn ye ekikere ye udọn̄ ikpọ n̄kpọ mi, eketie mi ye ediwak ubọkn̄ka mi nte ke edieke nnyịn isịmde emana oro nnyịn inyenede eti ufọkidụn̄, eti ifiọkn̄wed, ye eti idaha udu uwem, ini oro kpukpru n̄kpọ okpodu ke nde ndien nnyịn ikpenyene eti ini iso oro ememde akan. Nnyịn imọfiọk idahaemi ite ke emi idịghe ntre. Nnyịn isak iso ise mme ata mfịna uduot owo.”​—Sịghisịghi ubọkn̄wed edi eke nnyịn.

Ẹkeme ndidọhọ ke uduot owo ọwọrọ “esen esen mme akpan ndammana ido ye edu mme owo.” Ke akpanikọ, mme ndammana ido ndituaha ye mme edu ẹkeme ndida mme mfịna nsọk owo, idụt, m̀mê idem ke udomo eke ofụri ererimbot. Edi ke nso udomo ke ẹkeme ndinen̄ede nduọhọ uduot owo kaban̄a ndiọi idaha eke eyomfịn ke n̄kan̄ afai, edinam oyomonsia, unyam n̄kpọsọn̄ ibọk oro ibet akpande, ye mbiet n̄kpọ ntre?

Ndi ẹnyene ndiduọhọ uduot owo ikpọn̄îkpọn̄ ke ntak mme idaha oro oyomde “[ndisụhọde] ofụri ntatenyịn itie”? Mîdịghe nte n̄kpọ en̄wen ẹdu oro nnyịn ikpekerede iban̄a ke ndinam an̄wan̄a ntak emi mme owo ẹsiwọn̄ọrede ata mmemmem mmemmem ẹbịne esuene esuene, ye ibụk ibụk edinam ke ini mmọ ye ọkpọsọn̄ udọn̄ ẹkpebịnede n̄kokon̄, eti idaha-a? Ẹyak nnyịn ise.