Ndinam Utom ye Jehovah ke Edinam Akpanikọ
“O Abasi, afo ama eteme mi toto n̄kedi eyenọwọn̄: ndien nsiak mme utịben̄kpọ fo tutu osịm ini emi.”—Psalm 71:17.
1. Ntak emi nnyịn ikemede ndidọhọ ke utom edi enọ otode Jehovah?
UTOM edi kiet ke otu enọ oro Abasi ọnọde owo. Ye akpa ete ye eka nnyịn, Adam ye Eve, Jehovah ọkọdọhọ ete “Ẹyọhọ ke isọn̄, ẹnyụn̄ ẹkan enye.” Oro ekedi utom-ata, edi kiet oro ekekemde mfọn mfọn ye ukeme mmọ. Ukeme ikpọkidem ye eke n̄kan̄ ekikere oro ẹkeyomde akpakanam idara mmọ ọkọri, okpon akan n̄kpọ ekededi oro unam ẹmi ẹkebuanade ebietidụn̄ ye mmọ ẹkenyenede.—Genesis 1:28.
2, 3. (a) Utom akabade edi nso ọnọ ediwak owo mfịn, ndien ntak-a? (b) Nso ifet edinam akpan utom ke oyom nnyịn ineme iban̄a?
2 Idem ke idaha unana mfọnmma nnyịn, “ọkpọsọn̄ utom” oro osụn̄ọde ke “eti n̄kpọ” edi “enọ Abasi,” nte Solomon, owo ọniọn̄ oro ekewetde. (Ecclesiastes 3:13) Owo osụk oyoyom ndida mme ukeme ukere n̄kpọ ye ukeme unam n̄kpọ esie nsịn ke utom. Owo ndidi se ẹsiode ke utom esidi n̄kpọ mfụhọ. Kpa ye oro, idịghe kpukpru utom ẹdi se ifọnde m̀mê se idotde. Ye ediwak owo, utom edi se ifekde-fek owo uwem, ẹmanade ubuene ndikpa utom ke ekpri se ẹdade ubọk ẹka inua.
3 Nte ededi, utom emi enen̄erede ọnọ utịp odu emi ẹnọde kpukpru owo ikot ndibuana. Edi ediwak mbon ubiọn̄ọ ye mme mfịna ẹdu ẹnọ mmọemi ẹbuanade ke enye ndikan. Ntak emi edide akpan n̄kpọ nnyịn ndidot ndinam utom emi-e? Didie ke nnyịn inam ntre? Mbemiso ibọrọde mme mbụme ẹmi, ẹyak nnyịn ibemiso ineme emi:
Nnyịn Inam Utom Inọ Anie?
4. Nso orụk utom ikọnọ Jesus idara ye uyụhọ?
4 Jesus Christ ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Ndinam utom nnọ Jehovah ke edinam akpanikọ ama ada ekese idara ye uyụhọ ọsọk Jesus. Emi ama ọnọ enye uduak ke uwem, ndien ke utịt utom esie eke isua-ita-ye-ubak, enye ke ofụri akpanikọ ama ekeme ndidọhọ Ete esie eke heaven ete: “Ami mma nnọ Fi ubọn̄ ke isọn̄, ke emi n̄kanamde utom eke Afo ọkọnọde Mi nnam.” (John 17:4) Kpa nte ata udia ọnọde nsọn̄idem, ntre n̄ko ke utom edi ke idaha eke n̄kan̄ spirit. Jesus ama ọsọn̄ọ etịn̄ emi ke idaha en̄wen ke ini enye ọkọdọhọde ete: “Ẹkûn̄wana udia eke edibiarade, edi ẹn̄wana udia eke ebịghide osụn̄ọ nsinsi [ke] uwem.” (John 6:27) Ke okpụhọrede, utom eke mîn̄wụmke mfri ke n̄kan̄ eke spirit esida osịm edikpu ye n̄kpa.
5. Mmanie ẹkebiọn̄ọ eti utom oro Jesus akanamde, ndien ntak-a?
5 “Ete Mi ke ananam utom tutu osịm emi, Ami ke nnyụn̄ nnam.” Jesus eketịn̄ ikọ emi ọnọ mme Jew oro ẹkesụkde enye uyo sia enye ke usen Sabbath akanamde udọn̄ọ okụre eren oro ọkọdọn̄ọde ke isua 38. (John 5:5-17) Okposụkedi Jesus akanamde utom Jehovah, mbon ido ukpono oro ẹkedide mme andibiọn̄ọ ẹma ẹsịn ndifiọk akpanikọ oro ẹnyụn̄ ẹnam kpukpru se mmọ ẹkekemede nditre enye. Ntak-a? Sia mmọ ẹketode ete mmọ, Satan kpa Devil, emi kpukpru ini esibiọn̄ọde utom Jehovah. (John 8:44) Sia Satan ekemede ‘ndiforo angel un̄wana,’ adade “kpukpru abian̄a eke ẹtode ukwan̄ido,” nnyịn imoyom ikike eke spirit ye in̄wan̄în̄wan̄ ekikere ndidiọn̄ọ mme utom esie ke se mmọ ẹdide. Mîdịghe ntre, nnyịn imekeme ndifiọhọ idem nnyịn nte inamde n̄kpọ ituaha ye Jehovah.—2 Corinth 11:14; 2 Thessalonica 2:9, 10.
Mme Andibiọn̄ọ Ẹdu ke Utom
6. Ntak emi mbon nsọn̄ibuot ẹdide “mme anamutom n̄kari”? Nam an̄wan̄a.
6 Ndusụk owo, nte ndusụk mbon nsọn̄ibuot mfịn, ye unana edinam akpanikọ ke ẹdu ke utom nte mme isụn̄utom Satan ndiwụri mbuọtidem mme andibuana obufa ke esop Christian. (2 Corinth 11:13) Utu ke ndikam nda Bible emi nte isọn̄ oro mme ata ukpepn̄kpọ ẹdude, mmọ ẹwụk enyịn ke ndibiat ufọn New World Translation of the Holy Scriptures, nte n̄kpọ eke ẹdọhọde ke Mme Ntiense Jehovah ẹkeberi edem ofụri ofụri ke enye man ẹnyene un̄wam. Edi emi idịghe ntre. Ke akamba iduọk ini ke isua ikie, Mme Ntiense ẹmi ẹkeda King James Version, Douay Version eke Roman Catholic akpan akpan, m̀mê mme edikabade ekededi oro ẹkedude ke usem mmọ, ndikpep akpanikọ aban̄ade Jehovah ye mme uduak esie. Ndien mmọ ẹma ẹkama n̄kani edikabade ẹmi ẹtan̄a akpanikọ aban̄ade idaha mme akpan̄kpa, itie ebuana Abasi ye Eyen esie, ye ntak emi ekpri otuerọn̄ kpọt ẹkade heaven. Mbon oro ẹbọde ntọt ẹdiọn̄ọ n̄ko ẹte ke Mme Ntiense Jehovah, ke utom ukwọrọ ikọ mmọ eke ofụri ererimbot, ẹkaiso ndikama ediwak Bible oro ẹkekabarede. Nte ededi, toto ke 1961, mmọ ẹmedara ndikama New World Translation oro ẹdade ẹdidian, ẹnam ekem ye ifiọk eyomfịn, nnennen ukabade ikọ esie emi onyụn̄ ememde utom ndikot.
7. (a) Ntak emi Jesus ẹsịnde ediwak mbon oro ẹdọhọde ke imọbuọt idem ye enye? (b) Ntak edide akpan n̄kpọ ndinam item oro odude ke 1 John 4:1?
7 Jesus ọkọdọhọ ke imọ iyekan̄ ediwak mbon oro ẹdọhọde ke imọbuọt idem ye imọ. Enye ama onyịme ete ke mmọ ẹkeme nditịn̄ prọfesi, ẹbịn mme demon ẹduọn̄ọ, ẹnyụn̄ “[ẹ]nam ediwak n̄kpọ odudu” ke enyịn̄ imọ. Kpa ye oro, enye ọdọhọ ke ẹmi ẹdi utom “ukwan̄kpọ.” (Matthew 7:21-23) Ntak-a? Sia mmọ mînamke uduak Ete esie eke heaven mînyụn̄ iwọrọke usụn̄ adan̄a nte edide mbubehe Jehovah. Nte esen esen n̄kpọ, idem mme utom ẹtiede utịbe utịbe mfịn ẹkeme ndisụk nto akwa andibian̄a, Satan. Apostle John, ke ewetde akpa n̄wed esie oro ọkọnọde ẹsọk ofụri owo ke se iwakde ikan 60 ke n̄kpa ye ediset ke n̄kpa Jesus ebede, ama ọnọ m̀mê Christian item ete “ẹkûnịm kpukpru spirit ke akpanikọ, edi ẹdomo mme spirit ẹse m̀mê mmọ ẹdi eke Abasi.” Oyom nnyịn inam kpasụk ntre.—1 John 4:1.
Mme Utom eke Mînyeneke Utịp
8. Didie ke nnyịn ikpese mme utom obụkidem?
8 Idem ọkpọkọm nnyịn isịnke idem ke utom oro ọbiọn̄ọde-biọn̄ọ mbun̄wụm ke n̄kan̄ eke spirit, utom nnyịn ẹdi ikpîkpu edieke mmọ ẹkade iso ndin̄wam mme udọn̄ mbiara obụkidem. Apostle Peter ọkọdọhọ ete ke nnyịn ima ibiat ini ebịghide ekem ndida nnam “se idọn̄de mme Gentile itọn̄ . . . [i]du uwem ke use, ye idiọkitọn̄, ye ediyụhọ mmịn, ye otịme otịme ido, ye edin̄wọn̄ mmịn, ye obukpo edikpono ndem.” (1 Peter 4:3, 4) Ke akpanikọ, emi iwọrọke ite ke kpukpru owo ẹmi idahaemi ẹdide Christian oro ẹma ẹkeyak idem ẹnọ ẹma ẹsịn idem ke mme utọ edinam ntre, edi ọwọrọ ete ke edu mbon oro ẹkenamde ntre ekpekenyene ndikpụhọde usọp usọp nte se mmọ ẹkụtde ke n̄kan̄ eke spirit ọkọride. Ererimbot eyesụn̄i mmọ ke ntak mmọ ẹkabarede esịt; oro edi se ẹkpedoride enyịn ndikụt. Edi, ana mmọ ẹkpụhọde edieke mmọ ẹyomde ndikabade ndi mbonutom akpanikọ ke utom Jehovah.—1 Corinth 6:9-11.
9. Nso ke nnyịn ikpep ito ifiọkutom Ntiense oro ọkọtọn̄ọde ndibọ ukpep nte ọkwọ ikwọ kọnsat?
9 Jehovah ọmọnọ nnyịn ediwak enọ ndida n̄kop inemesịt, ikwọ esịne ke otu mmọ. Nte ededi, sia “ofụri ererimbot onyụn̄ esịne[de] ke ubọk andidiọk,” Satan kpa Devil, nte emi isịneke ererimbot ikwọ? (1 John 5:19) Ih, ikwọ ekeme ndidi n̄kari n̄kari ifia, nte Sylvana ekedide edifiọk. N̄wan emi ama enyene ifet ndibọ ukpep ke France nte ọkwọ ikwọ kọnsat. Enye anam an̄wan̄a ete, “Ami n̄kosụk nyenyene ọkpọsọn̄ udọn̄ ndinam n̄kpọ Jehovah. Ami ke n̄kokop inem usiakusụn̄ unọ un̄wam ke n̄konyụn̄ ndori enyịn ndinam n̄kpọ mbiba ẹmi ẹdu ke n̄kemuyo ke uwem mi. Edi akpa mfịna oro ami n̄kenyenede ndisobo ke ndibịne ubọkọkọ mi ekedi oburobụt ido. Ke ntọn̄ọ ntọn̄ọ, nsan̄a mi ẹkese mi nte ọkọi ke ini mmen̄kesibuanake ke oburobụt ikọ ye uwụtn̄kpọ mmọ. Ekem, idiọk n̄kann̄kụk oro ama ọtọn̄ọ ndinam esịt mi odoro ufiọn, anamde mi nnyịme mme n̄kpọ oro Jehovah asuade. Kiet ke otu mme andikpep mi ama ọkọbọ ke ndidọhọ yak ami nnam ikwọ edi ido ukpono mi, ẹma ẹnyụn̄ ẹkpep mi nditie utọk utọk ke n̄kpoto ndinyụn̄ n̄kere ke ami n̄kpon n̄kan owo en̄wen ekededi. Kpukpru ẹmi ẹma ẹnam esịt mi otịmede etieti. Ke akpatre, n̄kenyene nditịm idem nnọ akpan udomo ukwọ ikwọ. Mma mbọn̄ akam nnọ Jehovah nte anam usụn̄ oro n̄kpetienede an̄wan̄a mi. Okposụkedi n̄kọkwọde ikwọ ọfọn nnyụn̄ nnyenede mbuọtidem, ami n̄kodụhe ke otu mbon oro ẹkemekde. Ke akpatre, ami mma ndidiọn̄ọ ntak—ẹma ẹnọnọ ibọrọ udomo ndịbe ndịbe anyanini mbemiso udomo oro. Edi mma mbọ ibọrọ akam mi nnyụn̄ mbiere ndikpọn̄ mbre kọnsat oro ndikpep ikwọ ke ufọk.” Eyenete an̄wan emi ke akpatre ama ọdọ ebiowo ke esop Christian, ke ebiet mmọ mbiba ke edinam akpanikọ ẹnamde utom ndimenede mme ufọn n̄kpọ Obio Ubọn̄.
10. Nso ke afo ebiere oto mme ikọ Jesus ke John 3:19-21?
10 Jesus ọkọdọhọ ete: “Kpukpru owo eke ẹnamde idiọk ẹsasua un̄wana, inyụn̄ iwọrọke idi ke un̄wana, mbak edibiom se mmọ ẹnamde.” Ke n̄kan̄ eken, “owo eke anamde se idide akpanikọ ọwọrọ edi ke un̄wana, man ẹyarade utom esie, ẹte, enye etie ke Abasi ananam mmọ.” (John 3:19-21) Nso edidiọn̄ ke edi ntem ndinam utom ke n̄kemuyo ye uduak Jehovah! Edi man inam ntre uforo uforo, ana nnyịn kpukpru ini isiyak ẹdụn̄ọde mme utom nnyịn ke un̄wana Ikọ Abasi. Nnyịn idehedei isọn̄ ke emana ikaha, ini inyụn̄ idehedei ibe ikaha ndikpụhọde usụn̄uwem nnyịn nnyụn̄ nnyịme ikot oro ẹdọhọde itọn̄ọ utom Jehovah oro enyenede ufọn.
Ndinam “Nti Utom” Mfịn
11. Nso ke ediwak owo ẹbịne nte “nti utom,” ndien ntak utọ utom oro ekemede ndida nsịm edikpu?
11 Ana Utom oro odotde mfịn owụt nte ini nnyịn oyomde ẹnamde n̄kpọ usọp usọp. Ediwak mbon esịt akpanikọ ẹsinyịme ẹnyụn̄ ẹsịn idem ke utom ẹmi ẹwakde ndidọhọ ke ẹdi “nti utom,” ẹmi ẹnamde ẹyom ufọn ubonowo ke ofụri ofụri m̀mê ke akpan ntak kiet. Kpa ye oro, orụk utom emi esikpu didie ntem! Ke Britain, CAFOD (Catholic Fund for Overseas Development [Okụk Mbon Catholic Kaban̄a N̄kọri Isenidụt]), ke ọtọtde aban̄a ubịnikọt esie ke ndin̄wam ẹbọhọ akan̄, ọkọdọhọ ete: “Isua ita oro ẹkebede . . . ẹma ẹtịp ediwak million pound ndida nnọ Un̄wam. Ẹma ẹnyan̄a uwem ke ediwak tọsịn. Idahaemi uwem oro ẹdu ke itiendịk inikiet efen . . . Edi ntak-a? Nso n̄kpọ ikakwan̄a?” Ke akade iso ke mbụk esie, CAFOD Journal anam an̄wan̄a ete ke akananam owo itụkke-tụk mfịna anyanini emi, ye nte ke “ẹsida inyene ẹmi ẹyomde-yom ke n̄kịmenyịn ke ufọn n̄kọri owo ẹn̄wam ekọn̄ [mbio obio].” Nte eyịghe mîdụhe, afo ama okop mme ekikere ẹbietde emi, otode mme n̄ka enọ imaesịt oro ẹsịnde idem ke mbiet utom emi.
12. Nso idi n̄kukụre usọbọ inọ mme mfịna oro ẹsatde iso ẹse ererimbot mfịn?
12 Akan̄ edi mfịna oyomde ẹnam n̄kpọ usọp usọp ẹban̄a. Kpa ye oro, mmanie ẹnam ẹdiọn̄ọ mme n̄kpọ mmọn̄eyet mfịn ẹdide akan̄ ye ekọn̄ nte ẹsude prọfesi Jesus Christ, ẹnyande ubọk ẹwụt utịt editịm n̄kpọ odude kemi? (Matthew 24:3, 7) Mmanie ẹmịn̄ uyarade oro adade mme n̄kpọntịbe ẹmi ekeyịri ye uwat owo inan̄ oro ke enan̄-mbakara, oro ẹwụtde in̄wan̄în̄wan̄ ke n̄wed Bible eke Ediyarade, ibuot 6? Nte ekemde, Mme Ntiense Jehovah ke edinam akpanikọ ẹmenam ntre. Ntak-a? Ndiwụt nte ke edinọ nsinsi usọbọ ekededi okpon akan se owo ekemede ndinam. Emi iwọrọke ite ke mme Christian inyeneke udọn̄ ke se inọmọde ererimbot. N̄wan̄ansa-o. Mmọ ẹnyene esịtmbọm, ẹnyụn̄ ẹnam kpukpru se ẹkemede ndinam ndutụhọ etehede ubọk. Kpa ye oro, mmọ ẹnen̄ede ẹnyịme akpanikọ oro nte ke edieke Abasi mîsịnke ubọk, tutu amama owo idikọkke mme mfịna ererimbot. Nte ubuene, mfịna ẹmi ẹyekaiso ẹdu adan̄a ini nte ẹnyịmede Satan akaiso odu nte andikara ererimbot emi.—Mark 14:7; John 12:31.
Utom oro Ọnọde N̄kpon N̄kan Ufọn
13. Nso idi utom oro otịmde oyom ẹnam usọp usọp mfịn, ndien mmanie ẹnam enye?
13 Se ẹtịmde ẹyom ẹnam usọp usọp mfịn edi edikwọrọ eti mbụk oro nte ke Obio Ubọn̄ Jehovah Abasi eyesọp ndida itie kpukpru ukara ererimbot onyụn̄ ada ubọhọ emi mme abak-Abasi ẹtiede ẹbet edi. (Daniel 2:44; Matthew 24:14) Jesus Christ ama anam edikwọrọ Obio Ubọn̄ eke heaven edi akpan uduak esie ke uwem, okposụkedi ukwọrọikọ esie eketrede ke idụt Palestine kpọt. Mfịn, udomo oro ẹkwọrọde ikọ emi ẹsịm edi ofụri ererimbot, kpa nte Jesus ọkọdọhọde ke eyedi. (John 14:12; Utom 1:8) Ndinyene ebuana, idem ke ekpri udomo, ke utom Abasi, edi ifet oro mînyeneke mbiet. Iren ye iban, ikpọ ye n̄kpri ukem ukem, ẹmi inikiet mîkekereke ndidi mme ọkwọrọ eti mbụk ẹdu ke udịm iso ke utom ukwọrọikọ oro Mme Ntiense Jehovah ẹnamde mfịn. Ukem nte Noah ye ubon esie, mmọ ke edinam akpanikọ ke ẹnam utom Abasi ke ewụhọ otode Enye, ndien ke ntre ke odudu Esie, nte ebeiso n̄kpọ mbemiso utịt editịm n̄kpọ emi.—Philippi 4:13; Mme Hebrew 11:7.
14. Didie ke ukwọrọikọ edi utom unyan̄a uwem ndien ke ukem ini oro edi n̄kpọ ukpeme?
14 Utom unọ ikọ ntiense oro Mme Ntiense Jehovah ẹnamde ke ukperedem ini ẹmi edi utom unyan̄a uwem ọnọ mmọemi ẹkpan̄de utọn̄ ẹnyụn̄ ẹnamde n̄kpọ ẹtiene eti mbụk oro mmọ ẹkopde. (Rome 10:11-15) Enye n̄ko edi ukpeme ọnọ mmọemi ẹkwọrọde. Ke ndinyene udọn̄ esịt akpanikọ ndin̄wam mme owo oro ẹnyenede mfịna okponde akan eke nnyịn, etie nte nnyịn idikereke n̄kpọ ikaha iban̄a mme mfịna oro nnyịn ikemede ndinyene. Nnyịn ọmọdiọn̄ọ ite ke ererimbot emi mme edumbet ẹsụhọrede mi akpama ndinam nnyịn itiene mme usụn̄ esie. Ntre ndinam ibuot nnyịn ọyọhọ ye mme ekikere Abasi ke ini ukwọrọikọ isọn̄ọke mbuọtidem kpọt; enye anam nnyịn mfọn n̄kan ufọn. Nte owo Ntiense kiet ekesịnde enye: “Edieke ami mmendomoke ndikpụhọde mme owo oro ami nsobode, mmọ ẹkeme ndikpụhọde mi!”—Men 2 Peter 2:7-9 domo.
Ndinam Utom ye Esop
15. Mme mbiomo ewe idoro mme udiana ekpemerọn̄ ke idem mfịn, ndien didie ke irenowo ke esop ẹkpenam n̄kpọ ke ẹkerede ẹban̄a 1 Timothy 3:1?
15 Ke ini mbon oro ẹnyenede udọn̄ obufa ẹdide esop, mmọ ẹdidu ke idak ukpeme Akwa Ekpemerọn̄, Jehovah Abasi, ye Eti Ekpemerọn̄ esie, Jesus Christ. (Psalm 23:1; John 10:11) Mi ke isọn̄, mme anam-akpanikọ udiana ekpemerọn̄ oro ẹkpemede otuerọn̄, kpa irenowo oro ẹmekde ke mme esop ẹda ke ibuot Mme Ekpemerọn̄ eke heaven ẹmi. (1 Peter 5:2, 3) Edikama utọ itieutom oro edi ifet emi mînyeneke ekọmurua ke ukperedem usen ẹmi. Utom mme ekpemerọn̄ edi ndodobi utom, oro mîkụreke ke edida usụn̄ kpọt ke ndinọ ukpep ke esop ye edikwọrọ ikọ edi esịne n̄ko edikpeme otuerọn̄ nsio ke ubọk ndiọi unam eke spirit ye ndiọi odudu eke n̄kann̄kụk oro ebietde oyobio ke ererimbot emi nnyịn idụn̄de. Idụhe utom en̄wen oro odotde, emi irenowo ke esop ẹkpenyanade ẹbịne akan utom edin̄wam ndise mban̄a mfọnọ-n̄kpọ n̄kan̄ spirit eke mme andibuana ke esop Christian oro akade iso nditara.—1 Timothy 3:1; men Isaiah 32:1, 2 domo.
16. Mme usụn̄ ewe ke mme ekpemerọn̄ Christian ẹnam kiet eken ọyọhọ ekem?
16 Nte ededi, inaha nnyịn ifre nte ke mme utọ ekpemerọn̄ oro ẹdi owo, ye nsio nsio edu ye ndudue ukem nte mbon eken ke otuerọn̄. Ke adan̄aemi owo kiet ekemede ndinam ọfọn etieti ke akpan ikpehe utom ubọkerọn̄, mme enọ owo efen eyenọ esop ufọn ke isio isio usụn̄. Mme utom mmọ nte mbiowo Christian ẹnam kiet eken ọyọhọ ekem ndisọn̄ọ esop idem. (1 Corinth 12:4, 5) Edu ndomoidem ikpedehedei idụk ke otu mmọ. Mmọ ẹnam utom ọtọkiet ndikpeme nnyụn̄ nnam mme ufọn n̄kpọ Obio Ubọn̄ ẹkọri, “ẹmenede ndisana ubọk ke enyọn̄” ke ẹbọn̄ akam ẹnọ Jehovah, ẹyom edidiọn̄ ye ndausụn̄ esie ke kpukpru nneme ye ubiere mmọ.—1 Timothy 2:8.
17. (a) Nso mbiomo ke nnyịn inyene? (b) Mme n̄kpọ ewe ke oyom nnyịn ifep idem edieke anade ibiom mbiomo nnyịn nte odotde?
17 Idahaemi utom edikwọrọ ikọ ọdọdiọn̄ edi se ẹyomde ẹnam usọp usọp nte utịt ukara Satan asan̄ade ekpere. Sia inyenede akpanikọ eke Ikọ Jehovah Abasi, nte Mme Ntiense esie, nnyịn imenyene mbiomo ndisuan eti mbụk ke kpukpru ifet. Utom oro ikamade ke ubọk okpon ekem ndinam nnyịn iyọhọ ye utom, tutu osịm akpatre. Inaha nnyịn idedei iyak ẹda uwem uyom inem uwem, oburobụt ido ẹwọn̄ọde ntịn̄enyịn nnyịn m̀mê ndidi se uyom inyene obụkidem anamde esịt nnyịn odobi. Nnyịn ikpenyene ndisịn idem ke mme eyịghe eyịghe ekikere, inenide eneni iban̄a mme ikọ, koro emi ekeme ndidi se mîdorike udori ye se idiade ini. (2 Timothy 2:14; Titus 1:10; 3:9) Ke ini mme mbet ẹkebụpde Jesus ẹte, “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?” Jesus ama afiak ọwọn̄ọde ekikere mmọ owụt akpan utom ẹkamade ke ubọk, ọdọhọde ete: “Mbufo ẹyenyụn̄ ẹdi mme ntiense Mi ke Jerusalem, ye ke ofụri Judea ye Samaria, tutu osịm utịt ererimbot.” Ewụhọ oro odu edisịm mfịn emi.—Utom 1:6-8.
18. Ntak emi edinam utom ye Jehovah ọnọde utịp okponde ntre?
18 Ndinam utom ye Jehovah, ikwọrọde ikọ ye esop esie ke ofụri ererimbot mfịn, amada inemesịt, uyụhọ, ye ata uduak ọsọk uwem nnyịn. Edi ifet ọnọ owo kiet kiet oro amade Jehovah ndiwụt nsịnidem ye edinam akpanikọ nnọ enye. Tutu amama owo idifiakke inam utom emi ke ediwak ikpehe esie aba. Ye idotenyịn nsinsi uwem oro anade in̄wan̄în̄wan̄ ke iso, nnyịn ke edinam akpanikọ ikpakam ikaiso ‘ndinam edisana utom nnọ Abasi ke ukpono ye uten̄e,’ inọde enye itoro ke ntak edinyan̄a nnyịn.—Mme Hebrew 12:28.
Nso Idi Ibọrọ Fo?
◻ Utom ewe ke Jesus ekenyene idara ye uyụhọ?
◻ Mmanie ẹbiọn̄ọ utom Jehovah, ndien ntak-a?
◻ Didie ke “nti utom” ererimbot ye edikwọrọ eti mbụk Obio Ubọn̄ Abasi emen udomo?
[Ndise ke page 18]
Jesus ama ọnọ mme mbet esie ewụhọ ndikaiso n̄kwọrọ ikọ