Iko Abasi Edi Akpanikọ
“Da akpanikọ Fo dianade mmọ nịm nọ Idemfo: ikọ Fo edi akpanikọ.”—JOHN 17:17.
1. Didie ke andiwet Psalm emi edide owo Hebrew ekese Bible, edi didie ke ediwak owo ẹse enye mfịn?
“IKỌ fo edi utuenikan̄ ukot mi, ye un̄wana usụn̄ mi.” (Psalm 119:105) Ntem ke andiwet Psalm emi edide owo Hebrew ọkọdọhọ. Ibat ibat owo mfịn ẹnyene ukem ukpono ntre ẹnọ Ikọ Abasi. Ke ọyọhọ isua ikie-20 emi, Ikọ Abasi odu ke uduot oro ẹwetde-wet nte Edisana Bible. Ẹma ẹkabade enye ẹsịn ke ediwak usem ẹnyụn̄ ẹsuan atara akan n̄wed efen ekededi ke mbụk. Edi, ediwak owo ẹsịn ndida enye nte utuenikan̄ ukot mmọ. Idem mbon oro ẹdọhọde ke idi Christian ẹmek, ke ediwak ikpehe, nditiene mme ekikere idemmọ utu ke ndiyak Bible edi un̄wana usụn̄ mmọ.—2 Timothy 3:5.
2, 3. Didie ke Mme Ntiense Jehovah ẹse Bible, ndien nso mme edidiọn̄ ke emi ada ọsọk mmọ?
2 Ke edide ata isio ye oro, nnyịn ẹmi idide Mme Ntiense Jehovah imonyịme ye andiwet Psalm oro. Ye nnyịn, Bible edi ndausụn̄ oro Abasi ọnọde. Nnyịn imọdiọn̄ọ ke “kpukpru n̄wed, eke ẹdade odudu spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido.” (2 Timothy 3:16) Ke mîbietke ediwak owo mfịn, nnyịn iyomke ndidodomo mme n̄kpọ ẹban̄ade eti ido uwem ye edu nse. Nnyịn imọdiọn̄ọ se inende koro Bible etịn̄ ọnọ nnyịn.
3 Emi amada mme akwa edidiọn̄ ọsọk nnyịn. Nnyịn imedidiọn̄ọ Jehovah, imonyụn̄ ifiọk iban̄a ikpọ uduak esie kaban̄a isọn̄ ye ubonowo, ntre nnyịn imenyene mbuọtidem nte ke nyayama ini iso odu ọnọ nnyịn ye ubon nnyịn. Nnyịn ke ofụri esịt imonyịme ye andiwet Psalm oro ọkọdọhọde ete: “Mmama ido fo didie! Enye ke ntie n̄kere ofụri usen. Ibet fo ẹnam mi mfiọk n̄kpọ n̄kan mme asua mi: koro enye edide okịm ke nsinsi.”—Psalm 119:97, 98.
Ndinọ Ikọ Ntiense Ebe ke Eti Edu
4. Ndida Bible nte Ikọ Abasi odori nnyịn nso mbiomo?
4 Nnyịn, ke ntre, imenyene kpukpru ntak ndinyịme ikọ oro Jesus eketịn̄de ọnọ Ete esie ete: “Ikọ Fo edi akpanikọ.” (John 17:17) Edi ndidiọn̄ọ akpanikọ emi odori nnyịn mbiomo ke idem. Ana nnyịn in̄wam mbon en̄wen ndifiọk nte ke Ikọ Abasi edi akpanikọ. Ke usụn̄ emi mmọ n̄ko ẹyekeme ndibọ mme edidiọn̄ oro nnyịn ibọde. Didie ke nnyịn ikeme ndin̄wam mmọ ke usụn̄ oro? Akpa kan̄a, ana nnyịn isịn ofụri ukeme ke ndida mme edumbet Bible nsịn ke edinam ke uwem ofụri usen nnyịn. Ke usụn̄ emi, mbon oro ẹnyenede esịt akpanikọ ẹyekụt ẹte ke usụn̄ edinam Bible edi mfọn n̄kan.
5 Nso item ke Peter ọkọnọ aban̄a nnyịn ndinọ ikọ ntiense ebe ke eti edu?
5 Emi ekedi ọkpọ-ikọ ke item oro apostle Peter ọkọnọde iban ẹdide Christian ẹmi mme ebe mmọ mîkedịghe mme andinịm ke akpanikọ. Enye akasian mmọ ete: “Mbufo iban, ẹsụk idem ẹnọ ẹbe eke mbufo, man edieke ndusụk mmọ mînịmke ikọ Abasi ke akpanikọ, ẹkpedudi mmọ eda, itoho ke ukwọrọikọ, edi oto ke edu iban mmọ.” (1 Peter 3:1) Emi n̄ko ekedi edumbet emi akarade item oro enye ọnọde kpukpru Christian—irenowo, iban, ye nditọn̄wọn̄—ke ini enye ọkọdọhọde ete: “Ẹkama idem nte odotde ke iso mme Gentile, man ke nde eke mmọ ẹtịn̄de n̄kpọ ẹbiat mbufo ẹte ẹdi mme anamidiọk, mmọ ẹkpeda nti ido mbufo, emi ẹdikụtde ke ini eke ẹdide ndidomo mbufo nse, ẹnọ Abasi ubọn̄.”—1 Peter 2:12; 3:16.
Mfọn N̄kan Eti Ibuot Bible
6 Didie ke Peter an̄wam nnyịn ndikụt ke ikpenyene ndin̄wam mbon en̄wen ndikpep Bible?
6 N̄ko-n̄ko, mme Christian ẹkeme ndin̄wam mbon efen ndikpep Bible edieke mmọ n̄ko ẹnamde nte Peter etemede ete: “Eten̄e Christ ke esịt mbufo nte Ọbọn̄. Kpukpru ini ẹben̄e idem ndibọrọ kpukpru owo eke ẹdibụpde mbufo ntak idotenyịn emi mbufo ẹnyenede; edi ẹkpeme ndibọrọ ke sụn̄sụn̄ ido ye ke ido uten̄e.” (1 Peter 3:15) Mme asan̄autom ẹdide Christian ẹkpenyene ndikeme ndida nnọ Bible nnyụn̄ nnam an̄wan̄a mbon en̄wen nte ke enye edi Ikọ Abasi. Didie ke mmọ ẹkeme ndinam oro?
7. Ewe akpanikọ oro aban̄ade Bible owụt ke anaedi enye edi Ikọ Abasi?
7 Ekụt mbukpek mbukpek usụn̄ n̄kọkibuot kiet ke n̄wed Mme N̄ke. Do nnyịn ikot: “Eyen mi, afo ama ọbọ ikọ mi, onyụn̄ onịm mbet mi ke idemfo; onyụn̄ akpan̄ utọn̄ fo ke eti ibuot, . . . afo [eye]nyụn̄ osịme ifiọk Abasi. Koro Jehovah enyene eti ibuot; ifiọk ye mbufiọk ẹto enye ke inua.” (Mme N̄ke 2:1-6) Ekụt eti ibuot emi otode Abasi ke mme ikọn̄n̄wed Bible. Ke ini owo emi enyenede esịt akpanikọ okụtde ntotụn̄ọ eti ibuot oro, enye iditreke ndifiọk nte ke Bible okpon akan ikpîkpu ikọ owo.
8, 9. Didie ke ẹwụt ke item Bible kaban̄a edinyene ekikere oro adade ukem ukem ke ndikọ inyene enen?
8 Kere ban̄a uwụtn̄kpọ ifan̄. Mfịn, ẹwak ndibat unen oro owo okụtde ke uwem ke okụk. Nte okụk oro owo adiade awakde, ntre ke ẹkere ke enye okụt unen. Bible, nte ededi, odụri owo utọn̄ ọbiọn̄ọ edidori nsọn̄uyo ke mme n̄kpọ obụkidem n̄kaha. Apostle Paul ekewet ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọkudọn̄, eke ẹdụdide owo ẹsụhọde ke nditaha ye nsobo. Koro itọn̄ inyene edi orụn̄ kpukpru orụk mme idiọkn̄kpọ; ndien ke edinyanade mbịne enye, ndusụk owo ẹma ẹyo ẹkpọn̄ mbuọtidem, ẹnyụn̄ ẹda ediwak mfụhọ ẹnọ idemmọ unan.”—1 Timothy 6:9, 10; men Matthew 6:24 domo.
9 Ifiọk n̄kpọntịbe omowụt nte ntọt emi enende. Abia ibọkusọbọ ekikere kiet ọkọdọhọ ete: “Ndikabade ndi Akpa ye owo inyene inamke fi okop uyụhọ, okop inemesịt, ọbọ ata ukpono m̀mê ima.” Ih, mbon oro ẹsisịnde ofụri odudu mmọ ke ndibịne inyene ẹsiwak ndikụt ubiak ye edikpu ke akpatre. N̄wed Abasi, ke adan̄aemi etịn̄de aban̄a ufọn oro okụk enyenede, anyan ubọk owụt n̄kpọ oro otịmde edi akpan n̄kpọ akan ete: “Eti ibuot [edi] se ikpemede, inyene onyụn̄ edi se ikpemede, edi ata ifiọk ye eti ibuot ẹyenam mme andinyene enye ẹdu uwem.”—Ecclesiastes 7:12.
10 Ntak emi nnyịn ikpanamde item Bible oro ọdọhọde ikpeme nsan̄a nnyịn-e?
10 Bible ọdọn̄ọ ediwak item ntre. Efen edi emi: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme eyediọn̄ ọdiọk.” (Mme N̄ke 13:20) Ifiọk n̄kpọntịbe owụt emi n̄ko nte edide akpanikọ. Mfịghe otode ubọkn̄ka omonụk n̄kparawa owo esịn ke ukpa mmịn, uda n̄kpọsọn̄ ibọk ke idiọk usụn̄, ye obukpo ido uwem. Owo ekededi oro abuakde idem ye mme etịn̄ ndedehe ikọ ke akpatre esikụt idemmọ nte ẹtịn̄de utọ mbubiam ikọ ntre. Ediwak owo ẹsiyịp mme eteutom mmọ sia ‘kpukpru owo ẹnamde ntre.’ Ke akpanikọ, nte Bible n̄ko ọdọhọde: “Idiọk nsan̄a ababiat eti ido.”—1 Corinth 15:33.
11 Didie ke ndụn̄ọde oro ẹnamde ẹban̄a ekikere owụt eti ibuot oro odude ke nditiene Mfọnmma Ibet?
11 Kiet ke otu item oro ẹtịmde ẹdiọn̄ọ ẹkan ke Bible edi enye oro ẹkotde Mfọnmma Ibet: “Ntre sededi mbufo ẹyomde owo ẹnam ye mbufo, ẹnam kpa ntre ye mmọ.” (Matthew 7:12) Edieke ubonowo etienede ibet emi, ererimbot nte an̄wan̄ade ekpedi ata eti ebiet. Edi ọkpọkọm mme owo ke ofụri ofụri itieneke ibet emi, enye edi se ifọnde afo ke idemfo ndinam ntre. Ntak-a? Koro ẹkenam nnyịn ndinọ mbon enwen ntịn̄enyịn nnyụn̄ n̄kere mban̄a mmọ. (Utom 20:35) Ndụn̄ọde kiet emi ẹkenamde ẹban̄a ekikere owo ke United States man ẹdụn̄ọ ẹfiọk nte esitiede mme owo ke idem ke ini mmọ ẹn̄wamde mbon en̄wen ama osịm ubiere emi: “Do, etie nte ẹdinọ mbon en̄wen ntịn̄enyịn edi oto obot n̄kpọ ukem nte edinọ idem nnyịn ntịn̄enyịn edide.”—Matthew 22:39.
Item Bible—N̄wọrọnda Eti Ibuot
12 Nso idi n̄kpọ kiet emi anamde Bible edi n̄wọrọnda?
12 Mfịn, nte ededi, ediwak itie unọ-item ẹdu ẹmi ẹwọrọde ẹkpọn̄ Bible. Mme n̄wedmbụk n̄kpọntịbe ẹsinyene ikpehe unọ-item, ndien n̄wed ẹmi ẹnọde owo un̄wam ẹyọyọhọ mme ufọk unyam n̄wed. Adianade do, mme ekpepn̄kpọ mban̄a ekikere, mme ọnọ-item, ye mbon en̄wen ẹmi ẹsinọde item ke nsio nsio afan̄ ẹdu. Edi Bible edi n̄wọrọnda ke nsụhọde n̄kaha ke afan̄ ita. Akpa, item esie esinyene ufọn kpukpru ini. Enye akananam idịghe ikpîkpu ekikere owo, ndien akananam enye inọhọ nnyịn unan. Owo ekededi oro etienede item Bible enyene ndinyịme ye andiwet Psalm ke ini enye eketịn̄de ọnọ Abasi ke akam ete: “Mbet fo ẹsọn̄ọ ẹda.”—Psalm 93:5.
13 Nso iwụt ke Bible ke akamba udomo ọfọn akan eti ibuot oro otode owo?
13 Ọyọhọ iba, Bible emebe udomo eke ini. (1 Peter 1:25; Isaiah 40:8) Item emi otode owo ẹsikpụhọde ofụri ofụri, ndien se ẹmade ke isua kiet edi se ẹsiwakde ndikpụhọ ke isua efen. Edi, okposụkedi nte ẹkekụrede ediwet Bible ke se ikperede ndidi isua 2,000 ẹmi ẹkebede, enye osụk ọdọdọn̄ọ item oro esịnede eti ibuot akan, ndien ẹkeme ndida mme ikọ esie nnam n̄kpọ ke ofụri ererimbot. Mmọ ẹnyene ukem odudu edide nnyịn idụn̄ ke Africa, ke Asia, ke N̄kan̄ Edem Usụk m̀mê Edem Edere America, ke Europe, m̀mê ke mme isuo inyan̄ibom.
14 Ke ewe usụn̄ ke item Ikọ Abasi ọfọn akan?
14 Nte akpatre, ntatara item Bible inyeneke mbiet. N̄ke Bible kiet ọdọhọ ete: “Jehovah enyene eti ibuot,” ndien inamke n̄kpọ m̀mê nso mfịna m̀mê ubiere ke nnyịn isobo, eti ibuot odu ke Bible oro an̄wamde nnyịn ndikan enye. (Mme N̄ke 2:6) Nditọn̄wọn̄, n̄kparawa owo, mme ete ye eka, ikpọ owo, mme anam utom, mme eteutom, mme andikara, kpukpru mmọ ẹmekụt ke eti ibuot oro odude ke Bible otụk mmimọ. (Mme N̄ke 4:11) Idem ke ini nnyịn isobode mme n̄kpọ ẹmi owo mîkọdiọn̄ọke ke eyo Jesus ye mme apostle esie, Bible ọmọnọ nnyịn item oro enyenede ufọn. Ke uwụtn̄kpọ, ke edem ko ke akpa isua ikie, owo ikenyeneke ifiọk iban̄a un̄wọn̄ sika ke Middle East. Mfịn, enye atara asuana. Edi, owo ekededi oro okopde item Bible oro ọdọhọde ete owo okûyak “n̄kpọ ekededi akara” enye ye enye oro ọdọhọde iyet “kpukpru se isabarede obụkidem ye spirit ifep” ke idem eyetre edu emi, oro ọnọde owo mbumehe onyụn̄ abiatde nsọn̄idem.—1 Corinth 6:12; 2 Corinth 7:1.
Kaban̄a Nsinsi Ufọn Nnyịn
15. Ntak emi ediwak owo ẹdọhọde ke Bible edi n̄kpọ eset-e?
15 Edi akpanikọ, ediwak owo ẹdọhọ ke Bible edi n̄kpọ eset n̄ko ke inyeneke ufọn ke ọyọhọ isua ikie-20 emi. Nte ededi, anaedi ntak edi nte ke Bible isitịn̄ke se mmọ ẹyomde ndikop. Nditiene item N̄wed Abasi enyene nsinsi ufọn ọnọ nnyịn, edi enye esiwak ndiyom ime, ntụnọ, ye ntụkidem—kpa edu oro owo mîmaha ke ererimbot oro esịnde udọn̄ ọnọ nnyịn ndiyom inemesịt idahaemi.—Mme N̄ke 1:1-3.
16, 17. Mme n̄kokon̄ edumbet ewe ẹmi ẹban̄ade eti ido idan̄ ke Bible onịm, ndien didie ke ẹfụmi mmọ ke eyomfịn?
16 Da ke uwụtn̄kpọ eti ido idan̄. Mme edumbet N̄wed Abasi ẹnen̄ede enyene iwụk. N̄kukụre itie ndinyene ebuana idan̄ edi ke ndọ, ndien ẹmekpan kpukpru utọ ebuana ntre ke ọwọrọde ọkpọn̄ ndọ. Nnyịn ikot ite: “Mbon use, m̀mê mme okpono ndem, m̀mê mme esịn efịbe, m̀mê mme owo oro ẹnamde se owo mîkobotke mmọ inọ, m̀mê irenowo ẹmi ẹdan̄de ye irenowo, ididaha Obio Ubọn̄ Abasi inyene.” (1 Corinth 6:9, 10, NW) Akande oro, ye mme Christian Bible oyom ẹnyene nsan̄andọ kiet, ebe enyene n̄wan kiet. (1 Timothy 3:2) Ndien ke adan̄aemi n̄kpọsọn̄ mfịna ẹdude oro ẹkemede ndinyịme usiondọ m̀mê ẹdianade etie, Bible ọdọhọ ke mbọbọ ndọ ke ofụri ofụri edi n̄kpọ eyo uwem. Jesus ke idemesie ọkọdọhọ ete: “Enyeemi okobotde mmọ obot mmọ eren ye n̄wan toto ke editọn̄ọ. N̄ko, ke ntak emi owo eyekpọn̄ ete ye eka esie akadiana ye n̄wan esie, ndien mmọ mbiba ẹyekabade edi obụk kiet. Ntre ke mmọ idịghe aba owo iba, edi ẹdi obụk kiet. Mmọdo se Abasi ama akadian, yak owo okûdianade.”—Matthew 19:4-6, 9; 1 Corinth 7:12-16.
17 Mfịn, ẹmefụmi mme edumbet emi ntatara ntatara. Ẹmenyịme mbukpo ido idan̄. Ẹse ebuana idan̄ ke ufọt mme uyen oro ẹwọrọde an̄wa nte ndammana ido. Ẹmenyịme edidụn̄ ọtọkiet ye unana edidọ ndọ. Ke otu mme ọdọ-ndọ, nsan̄andọ ekededi ndinam idan̄ oro ibet mînyịmeke edi ọsọ n̄kpọ. Ndien usiondọ amatara asuana ke ererimbot eyomfịn. Ndiọi edinam ẹmi, nte ededi, idaha inemesịt idi. Ndiọi utịp ẹmi ẹmewụt ẹte ke Bible ama enen ke ofụri ofụri ke ndisọn̄ọ nyịre ke mme edumbet nti ido uwem ẹmi ẹnyenede iwụk.
18, 19. Nso isụn̄ọ ito ntatara edifụmi mme edumbet Jehovah kaban̄a ido uwem?
18 Ladies’ Home Journal ọkọdọhọ ete: “Nsọn̄uyo oro ẹkedoride ke idan̄ emi okonịmde mme iduọk isua [1960] ye [1970] idiọn̄ọ amada ikpọ afanikọn̄ ọsọk ubonowo utu ke inemesịt eke ebịghide.” “Ikpọ afanikọn̄” ẹmi ẹtịn̄de ẹtụk mi esịne iduọesịt oro nditọ ẹkopde ke ntak usiondọ mme ete ye eka mmọ ye ikpọ owo ndikop ọkpọsọn̄ editịmede esịt. Enye n̄ko esịne n̄kọri ke ibat mme ubon oro ete m̀mê eka kpọt esede enyịn ye n̄kọri ke ibat n̄kpri nditọiban ẹmi mîdọhọ ndọ ndinyene nditọ ke ini mmọ ke idemmọ ẹsụk ẹdude ke isua uyen. Akande oro, enye esịne n̄kọri ke mme udọn̄ọ oro ẹmende ẹto idan̄, utọ nte genital herpes, ikịm, akpasak, chlamydia, ye AIDS.
19 Ye kpukpru ẹmi ke ekikere, akwa ekpepn̄kpọ mban̄a ebuana n̄kaowo ọkọdọhọ ete: “Iso-ọfọn nnyịn imọkọri iwọrọ owo ndikere m̀mê idinọhọ kpukpru nnyịn ufọn ikan ndise editre ebuana idan̄ mbemiso ndọ nte usụn̄ edinam oro ekemde ye mme udọn̄ mbio obio nnyịn ye unen mmọ ndinyene ubọhọ: ubọhọ udọn̄ọ, ubọhọ uyomo-idịbi oro owo mîyomke.” Bible etịn̄ nte enende ete: “Ọfọfọn ọnọ owo eke onịmde Jehovah ke ibetesịt esie, ndien mîsehe mbon iseri, ye mmọ eke ẹwahade ẹtiene nsu.” (Psalm 40:4) Owo ibian̄ake mbon oro ẹbuọtde idem ke eti ibuot oro otode Bible ke nsu emi mbon ẹmiomde Bible ẹnyụn̄ ẹdọhode ke obukpo ido uwem amada inemesịt edi, ẹsude. Ọniọn̄ ọniọn̄ edumbet Bible, edieke ẹsọn̄ọde ẹmụm ẹkama, ẹfọn ẹkan.
N̄kpọsọn̄ Mfịna ke Uwem
20. Mme edumbet Bible ewe ẹdi n̄kpọ un̄wam inọ mbon oro ẹsobode ọkpọsọn̄ unana ke uwem?
20 Eti ibuot oro otode Bible n̄ko aman̄wam nnyịn ndiyọ n̄kpọsọn̄ mfịna ẹmi nnyịn isobode ke uwem. Ke uwụtn̄kpọ, ke ediwak idụt, mme Christian ẹdu ẹmi ẹdude ke ata ọkpọsọn̄ unana. Edi mmọ ẹmeyọ unana mmọ ndien kpa ye oro ke ẹkop inemesịt. Didie? Ke nditiene Ikọ Abasi eke odudu spirit. Mmọ ẹmeda mme ikọ ndọn̄esịt eke Psalm 55:22 ke akpan n̄kpọ: “Top mbiomo fo nọ Jehovah, ndien enye eyekama fi.” Mmọ ẹmeberi edem ke Abasi kaban̄a ukeme ndiyọ. Ndien mmọ ẹmeda mme edumbet Bible ẹsịn ke edinam ẹnyụn̄ ẹfep mme edu oro ọnọde unan oro edide eke ubiat-okụk, utọ nte edin̄wọn̄ sika ye ukpa mmịn. Mmọ ẹsịn ifịk ẹnam utom, nte Bible otorode, ndien ke ntre ẹsiwak ndikụt ke mmimọ imekeme ndinọ ubon mmimọ udia ke adan̄aemi mbon ifu m̀mê mme anana idotenyịn ẹkpude. (Mme N̄ke 6:6-11; 10:26) Akande oro, mmọ ẹmenam item Bible oro ọdọhọde ete: “Kûfụbe ufụp ye mme anamidiọk.” (Psalm 37:1) Mmọ isịnke idem ke ubre mbre mfọniso m̀mê ke mme edinam ubiatibet, utọ nte edinyam n̄kpọsọn̄ ibọk ke idiọk usụn̄. Mme n̄kpọ ẹmi ẹkeme ndinọ mme mfịna mmọ usọp usọp “ubọhọ,” edi utịp anyanini ababiak.
21, 22. (a) Didie ke Christian an̄wan kiet ọkọbọ un̄wam ye ndọn̄esịt oto Bible? (b) Nso n̄kaiso akpanikọ aban̄ade Bible an̄wam nnyịn ndidiọn̄ọ ke enye edi Ikọ Abasi?
21 Nte editiene ndausụn̄ Bible enen̄ede an̄wam mbon oro ẹdide ọkpọi-kpọi ubuene? Ih, nte ata ediwak ifiọk n̄kpọntịbe ẹwụtde. Christian an̄wan kiet emi edide ebeakpa ke Asia ewet ete: “Okposụkedi ndide ubuene, ami ntiehe utọk utọk m̀mê iyatesịt iyatesịt. Akpanikọ Bible amanam mi nyọhọ ye eti idotenyịn.” Enye obụk ete ke n̄wọrọnda un̄wọn̄ọ oro Jesus ọkọn̄wọn̄ọde omosu ọnọ imọ. Jesus ọkọdọhọ ete: “Ẹkam ebemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.” (Matthew 6:33) Enye ọsọn̄ọ etịn̄ ete ke imo ndinam n̄kpọ Abasi edi akpa ke uwem imọ, ke usụn̄ kiet m̀mê eken, imọ kpukpru ini imesibọ mme n̄kpọ oro uwem oyomde. Ndien utom Christian esie ọmọnọ enye uku ye utịt mbuba ke uwem oro anamde enye ọyọ ubuene esie.
22 Ke akpanikọ, ntotụn̄ọ eti ibuot oro odude ke Bible owụt ke Bible enen̄ede edi Ikọ Abasi. Idụhe n̄wed oro mme owo ikpọn̄îkpọn̄ ẹwetde oro ekemede ndineme ata ediwak nsio nsio n̄kpọ mban̄a uwem ntre nnyụn̄ ndọn̄ọ ata ntotụn̄ọ ifiọk ntre, nnyụn̄ ndu ke n̄kemuyo ntre. Edi odu akpan n̄kpọ efen aban̄ade Bible oro owụtde ke enye oto Abasi: Enye enyene odudu ndikpụhọde mme owo nnam ẹfọn. Nnyịn iyeneme iban̄a emi ke udiana ibuotikọ.
Nte Afo Emekeme Ndinam An̄wan̄a?
◻ Ke nso usụn̄ ke ẹdiọn̄ Mme Ntiense Jehovah ke mmọ ndinyịme Bible nte Ikọ Abasi?
◻ Nte mme andinịm Ikọ Abasi ke akpanikọ, nso mbiomo ke nnyịn inyene, ndien didie ke edu uwem nnyịn ekeme ndin̄wam nnyịn ndibiom mbiomo emi?
◻ Nso inam ọniọn̄ ọniọn̄ item Bible ọfọn akan ikpîkpu item owo?
◻ Mme uwụtn̄kpọ ewe ẹwụt ntotụn̄ọ eti ibuot oro odude ke Bible?