Nso ke N̄kpa Jesus Ọwọrọ Ọnọ Fi?
“KPUKPRU mbonekọn̄ oro akanam ẹdude, kpukpru mme an̄wana-ekọn̄-mmọn̄ oro akanam ẹtịmde, kpukpru mme aka ufọkmbet oro akanam ẹsopde idem, kpukpru ndidem oro akanam ẹkarade, ke ẹtan̄de ẹdian ọtọkiet, akananam itụkke uwem owo ke isọn̄ emi ke usụn̄ enyenede odudu nte anana-mbiet owo kiet emi.” Ntre ke ewetn̄wed oro James A. Francis, ekewet aban̄a Jesus Christ.
Mme owo ẹse Jesus ke nsio nsio usụn̄, edi Bible anam ẹdiọn̄ọ enye nte Eyen Abasi ye owo emi enyenede ima n̄waidem. Jesus ama asiak akpan usụn̄ kiet emi enye okowụtde ima oro ke ini enye eketịn̄de aban̄a idemesie ete: ‘Eyen Owo ikedịghe, man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.’—Matthew 20:28.
Nso idi ufọn ufak emi? Ntak ẹkeyomde enye? Anie ke ẹkefak? Ke nditịm ntịn̄, nso ke n̄kpa Jesus ọwọrọ ọnọ fi?
Nso ke Enye Edi?
Ufak edi n̄kpọ oro ọnọde ubọhọ. Ndifak owo ọwọrọ ndinyan̄a enye nsio ke ukat m̀mê ufen ke ndikpe ekọmurua. Ke ekikere eke spirit, ‘ndifak’ ọwọrọ ndinyan̄a nsio ke idiọkn̄kpọ ye isop esie. Ntak edi oro Jesus akakpade. Nte Christian apostle Paul ekewetde ete: “N̄kpọ eyenutom idiọkn̄kpọ edi n̄kpa, edi enọ Abasi edi nsinsi uwem ke Christ Jesus Ọbọn̄ nnyịn.”—Rome 6:23.
Nte ekemde ye N̄wed Abasi, ekọmurua edinyan̄a nsio ke idiọkn̄kpọ abuana edikpe ufak. Psalm 49:6-9 ọdọhọ ete: “Mmọ eke ẹbuọtde idemmọ ke nsọn̄ mmọ, ẹnyụn̄ ẹbụrede mbụre ke akwa inyene mmọ; baba owo kiet ikemeke ndifak eyenete, inyụn̄ ikemeke ndinọ Abasi n̄kpo usio-isop esie: (ndien ufak ibuot mmọ ọsọn̄ onyụn̄ etre ke nsinsi:) man enye osụk odu uwem ke nsinsi, okûnyụn̄ okụt mbiara.” Ufak edi edinyan̄a emi Abasi ọnọde, idịghe eke anana mfọnmma owo ekededi.
Ntak Ẹyomde-e?
Ẹyom ufak koro akpa ete nnyịn, Adam, ama anam idiọkn̄kpọ. Enye ke ntre ama ataba anana-utịt mfọnmma uwem, ẹma ẹbiere ikpe n̄kpa ẹnọ enye nte enende, ndien enye ama akpa ke akpatre. (Genesis 2:15-17; 3:1-7, 17-19; 5:5) Nte nditọ esie, nnyịn ima ida idiọkn̄kpọ ye n̄kpa imana. Paul ekewet ete: “Mmọdo, nte idiọkn̄kpọ okotode owo kiet odụk ke ererimbot, n̄kpa onyụn̄ otode ke idiọkn̄kpọ oro odụk; n̄kpa onyụn̄ ebe osịm kpukpru owo, koro kpukpru owo ẹma ẹnam idiọkn̄kpọ.” (Rome 5:12) Ih, ‘ke Adam ke kpukpru owo ẹkpan̄a.’ (1 Corinth 15:22) Nte enende David, andiwet Psalm, ọkọdọhọ ete: “Sese, n̄kamana ke ukwan̄; eka mi okonyụn̄ oyomo mi ke idiọk.”—Psalm 51:5.
Ndinyan̄a nsio ke ubiomikpe idiọkn̄kpọ ye n̄kpa edi akpan n̄kpọ edieke anade nte anamidiọk eyen Adam ekededi enyene nsinsi uwem. Ke adan̄aemi mme anana mfọnmma owo mîkemeke ndinọ ufak emi, Jehovah ke ima anam emi ebe ke Jesus Christ. Edi, nso ke ẹkeda ufak oro ẹdep? Ọfọn, ke Adam ama akanam idiọkn̄kpọ, enye ama ọduọk nsinsi mfọnmma uwem eke owo, ye kpukpru unen ye idotenyịn esie. Ntre, ẹma ẹda uwa ufak Jesus ẹfak kpa n̄kpọ emi.
Se Ufak Anamde Ekeme Nditịbe
Ẹma ẹkpe unenikpe ke ubonowo ndikpa n̄kpa, kpa utịp idiọkn̄kpọ. Ntre ufak edi edinam mbọm ye ima mfọnido Abasi. Sia owo mîkanamke Jesus eset nte owo eke obụk ye iyịp, edi nte edibotn̄kpọ eke spirit oro mîkemeke ndikpa, ẹma ẹnọ mfọnmma uwem esie nte owo ye kpukpru unen ye idotenyịn uwem emi ke n̄kpa, enye inyụn̄ itọn̄ọke ntak ibọ aba inyene. (1 Corinth 15:50; 1 Peter 3:18) Uwem Jesus Christ nte owo, oro ẹkewade ke ntre ama akaiso ndinyene odudu edinyan̄a m̀mê edifak.
Nte owo oro mîkanamke idiọkn̄kpọ, Jesus okodu ke idaha ebietde enyeoro mfọnmma Adam okodude ke akpa. Ke ntak okosụkde ibuot ọnọ Abasi tutu osịm n̄kpa, ẹma ẹnam Jesus edi Akwa Oku, ndien enye ama ọnọ ufọn mfọnmma uwa esie nte owo ke heaven. (Mme Hebrew 9:24-26) Sia Abasi ama okonyịme ekọmurua ufak emi, Jesus ekeme ndifak nditọ Adam ẹmi ẹnịmde ke akpanikọ nsio ke idiọkn̄kpọ ye n̄kpa ke ndida ufọn uwa esie nnam n̄kpọ ke ibuot mmọ. (1 Corinth 6:20; 7:23; 1 John 2:1, 2) Jesus ke ntre ama “akabade edi ntak nsinsi edinyan̄a ọnọ kpukpru mmọemi ẹkopde uyo Esie.” (Mme Hebrew 5:8, 9) Emi anam emem utom ọnọ mmọ ndinyene edinen idaha ke iso Abasi ebe ke Eyen esie.
Anie ke Ẹfak?
Mmanie, ndien, ẹbọ ufọn ẹto ufak emi? Mme owo oro ẹnyenede mbuọtidem ke ndutịm emi ndien ke ntre ẹdide ẹdidu ke n̄kemuyo ye Abasi. Ke ndinam n̄kpọ esie ke esịt akpanikọ, ẹkeme ndinyan̄a mmọ nsio ke idiọkn̄kpọ ye isop esie edide n̄kpa, ẹnyụn̄ ẹnyene nsinsi uwem.—John 17:3.
Akpa owo oro ama ebiere m̀mê imọ iyekop uyo inọ Abasi m̀mê idikopke. Enye ama emek unana n̄kopitem. “Idịghe Adam ke ẹkebian̄a,” edi enye akakpa nte enyeemi okoide-koi anam idiọkn̄kpọ. (1 Timothy 2:14) Edi, nso kaban̄a nditọ Adam? Mmọ ẹyemek edide edinam n̄kpọ Abasi ke ofụri ukeme mmọ nte mme anana mfọnmma owo m̀mê ndisọn̄ ibuot ye Andibot mmọ.—Joshua 24:15.
Jesus ekedi man “ọnọ uwem Esie ndifak ediwak owo.” (Mark 10:45) Edi mmanie ẹdi “ediwak owo” ẹmi? Nte an̄wan̄ade, Adam isịneke koro enye ekedide mfọnmma owo emi okokoide-koi emek nsọn̄ibuot ye Abasi onyụn̄ akpa nte anamidiọk ke n̄koinnam, emi mîkabakede esịt. Edi nso kaban̄a akamba ubon esie, emi ibat edide ke ediwak tọsịn million? Ye n̄kem n̄kem ekọmurua, Jesus Christ amabiat ndammana ubiomikpe oro odorode ubon Adam ke idem. (Men 1 Timothy 2:5, 6 domo.) Ke ibuot “ediwak owo” ẹmi ẹnịmde ke akpanikọ, Jesus amada ufọn ekọmurua ufak esie anam n̄kpọ.
Mme andinịm ke akpanikọ oro ẹfakde ẹsịne mme Jew ye mme Gentile, m̀mê mme idụt. Paul ọkọdọhọ ete: “Mmọdo ndien, nte otode ke ndudue kiet ke ẹbiom kpukpru owo ikpe; kpa ntre n̄ko oto ke utom edinen ido kiet ke ẹnọ mfọn osịm kpukpru owo, ẹtebe mmọ ikpe ke uwem.” (Rome 5:18) Ke ndikpa ke eto, “Christ akafak [mme Jew] osio ke isụn̄i ibet emi odorode [mmọ], sia Enye amakabade edi n̄kpọ isụn̄i ke ibuot [mmọ]; koro ẹwetde ẹte, owo eke ẹyịrede ke eto edi n̄kpọ isụn̄i.” (Galatia 3:13; Deuteronomy 21:23) N̄wed Mbon Rome 4:11 etịn̄ aban̄a mme Gentile ke ini ọdọhọde ete ke adan̄aemi Abraham, eteete mme Jew, mîka-inaha mbobi kan̄a, enye ama akabade edi “ete kpukpru mmọemi ẹbuọtde idem, okposụkedi nte mmọ mînaha mbobi.” Ntre, ndien, uwa ufak Jesus enyene ufọn ọnọ mme Jew ye mme Gentile ẹmi ẹnịmde ke akpanikọ.
Usụn̄uwem oro owo kiet kiet etienede ebiere m̀mê enye eyebọ ufọn oto uwa Jesus. Nte Adam, mbon oro ẹkoide-koi ẹnam idiọkn̄kpọ ibọhọ ufọn ufak ye nsinsi uwem. Nte Christ ọkọdọhọde ete: “Owo eke ọbuọtde ye Eyen enyene nsinsi uwem, edi owo eke mîbuọtke idem ye Eyen idikwe uwem, edi iyatesịt Abasi osụk ọkọbọ enye.” (John 3:36) Ufak n̄ko anam ediset ke n̄kpa edi mmemmem n̄kpọ ọnọ mme akpan̄kpa ẹmi ẹdude Abasi ke ekikere. (John 5:28, 29) Edieke mmọ ẹwụtde n̄kopitem ye esịtekọm, edida mme ufọn ufak nnam n̄kpọ ye mmọ ọwọrọ ete ke mmọ ẹyedu uwem ke nsinsi. Edi mbon oro ẹdude uwem ke “akpatre usen” ẹmi, mmọ ẹkeme ndidu ke nsinsi ye unana edikpa n̄kpa.—2 Timothy 3:1-5; Matthew 24:3-14, 21, 34; John 11:25, 26.
Mme Ntak Ndiwụt Esịtekọm
Ana owo ekededi oro oyomde ndibọ ufọn nto ufak emi enyene ntotụn̄ọ esịtekọm aban̄a enye. Ndien utọ esịtekọm oro odot didie ntem! Kamse, ufak emi owụt uwak ima oro Abasi ye Christ ẹnyenede.
Jehovah Abasi ama owụt akwa ima ke ndinọ ufak ebe ke n̄kpa Eyen esie. Jesus ọkọdọhọ ete: “Abasi akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem. Abasi ikọdọn̄ke Eyen Esie ke ererimbot ete ekpe ikpe ererimbot, edi ọkọdọn̄, man ẹnyan̄a ererimbot oto ke Enye.” (John 3:16, 17) Nte afo ukpadarake ediwụt ima Abasi emi?
Fiak kere ban̄a nte ima Jehovah otụn̄ọde ke ndinam ndutịm nnọ ufak emi. Mbemiso ẹkenọde Eyen Abasi edi isọn̄ edidu uwem nnyụn̄ n̄kpa nte mfọnmma owo, enye ama ododu uwem mbemiso edide owo. Enye ekedi ‘akpa ke otu kpukpru edibotn̄kpọ,’ ke enye ke “ẹkebot kpukpru n̄kpọ ke enyọn̄ ye ke isọn̄, ye se enyịn okụtde ye se enyịn mîkwe.” (Colossae 1:13-16) Didie ke Jehovah akama Eyen esie ntem! Edi, Abasi ikakam isioho angel ekededi ke otu million mme angel idọn̄ edi isọn̄. Ima oro enye amade ubonowo ama otịm okpon tutu enye ọkọnọ akpa edibon Eyen esie edi.
Kere, n̄ko, ban̄a ntotụn̄ọ ima oro Jesus okowụtde ke se iban̄ade ufak oro. Nte edibotn̄kpọ eke spirit ke heaven, enye ekedi ‘akpan anamutom’ Abasi. Ke akpanikọ, ‘mme n̄kpọ oro [Eyen Abasi] akadatde esịt aban̄a ẹkedu ye nditọ owo’ (Mme N̄ke 8:22-31) Kpa ye oro, ikememke utom inọ enye ndikpọn̄ heaven, ye mme idaha heaven ẹtịmde ẹfọn ke ebuana oro enye ekenyenede ye Ete esie ye ata ediwak ndinen angel. Ke heaven emi enye ekemede ndida n̄kụt n̄kpọ ọfọn, Eyen Abasi ekpekeme ndikụt ndiọi idaha eke isọn̄ ye odudu nsobo oro idiọkn̄kpọ ye n̄kpa ẹnyenede ke idem ubonowo. Enye ama ọfiọk n̄ko ete ke ndinọ ufak eyeyom imọ ikpa. Kpa ye oro, enye ama “ada mbiet ofụn, owụt idem nte owo, . . . Enye osụhọde idem, akabade osụk ibuot tutu osụn̄ọ ke n̄kpa.” Ke ntak utọ edinam akpanikọ oro, ẹma ẹmenede Jesus ebe odụk ubọn̄ ubọn̄ uwem eke heaven. (Philippi 2:5-11) Nso ima ke enye okowụt ntem ke se iban̄ade ufak! Nte afo omowụt esịtekọm ke se Jesus akanamde?
Nso ke Afo Edinam?
Richard eke Chichester, owo Mbakara emi edide etubom ufọkederi (c 1198-1253), ama ọbọn̄ akam inikiet ete irenowo ye iban ẹkpekam ẹdi “ẹdidiọn̄ọ Christ ọfọn akan, ẹma enye otụn̄ọ akan, ẹnyụn̄ ẹtiene enye ekpere akan.” Uwa ufak Jesus enen̄ede ọnọ eti ntak ndidiọn̄ọ, ndima, nnyụn̄ ntiene enye.
Ke mîkpedịghe ufak oro, nte mme anamidiọk, nnyịn ikpakpan̄a ye unana idotenyịn koro “ifọt n̄kpa edi idiọkn̄kpọ.” (1 Corinth 15:56) Ntem, man ẹnyan̄a fi ẹsio ke n̄kpa emi ekemede nditịbe mi oto ntak idiọkn̄kpọ ọkọnọmọde fi, do, nso ke ana afo anam? Oyom afo ekpep aban̄a ndutịm oro Abasi anamde kaban̄a edinyan̄a ebe ke Jesus Christ. Adan̄aoro ana afo ananam owụt nte ke imenyene mbuọtidem ke ufak emi. Didie? Ke ndiwụt ntotụn̄ọ esịtekọm ke ufak emi, ayakde idemfo ọnọ Abasi, onyụn̄ asiande mmọ en̄wen aban̄a utịbe utịbe enọ emi kaban̄a edinyana.
Usụn̄uwem emi ekeme ndisịn fi ke otu “akwa otuowo” ẹmi “ẹketode ke akwa ukụt ẹwọn̄ọ, ẹkenyụn̄ ẹyetde ọfọn̄idem mmọ ẹnam afia ke iyịp Eyenerọn̄,” Jesus Christ. (Ediyarade 7:9, 14) Udeme mmọ edi idotenyịn nsinsi uwem ke paradise isọn̄. (Luke 23:43) Ih, afo emekeme ndibuana ke idara idara akwa udịmowo oro, edieke n̄kpa Jesus enen̄erede edi n̄kpọ eke ọsọn̄de urua ke enyịn fo.
[Ndise ke page 4]
Jesus emi mîkanamke idiọkn̄kpọ okodu ke idaha ebietde enyeoro mfọnmma Adam okodude ke akpa
[Ndise ke page 6]
Nte afo ọmọfiọk ata n̄kpọ oro n̄kpa Jesus ọwọrọde?