Ibuot 30

Ndibọrọ Mme Andidori Enye Ikọ

KE INI mme adaiso ido ukpono mme Jew ẹdoride Jesus ikọ ẹte ke abiat Sabbath, enye ọbọrọ ete: “Ete Mi ke ananam utom tutu osịm emi, Ami ke nnyụn̄ nnam.”

Kpa ye edori ikọ mme Pharisee oro, utom Jesus idịghe orụk oro ibet Sabbath akpande. Utom edikwọrọ ye edikọk udọn̄ọ oro enye anamde edi utom emi Abasi ọnọde enye ete anam, ndien ke ndikpebe uwụtn̄kpọ Abasi, enye akaiso ndinam emi kpukpru usen. Nte ededi, ibọrọ esie akam anam mme Jew ẹyat esịt ẹkan nte ẹkeyatde ke mbemiso, ndien mmọ ẹyom ndiwot enye. Ntak-a?

Edi koro idahaemi ikụreke ke mmọ ndinịm nte ke Jesus amabiat Sabbath, edi mmọ ẹnịm n̄ko ẹte ke enye ndidọhọ ke idi ata Eyen Abasi edi ndisuene Abasi. Nte ededi, Jesus ifeheke ndịk ndien akaiso ndibọrọ mbụme mmọ oro aban̄ade eti itie ebuana esie ye Abasi. Enye ọdọhọ ete, “Ete amama Eyen, omonyụn̄ owụt Enye kpukpru n̄kpọ eke Enye ke Idem Esie anamde.”

Jesus akaiso ete: “Koro nte Ete anamde mme akpan̄kpa ẹset ọnọ mmọ uwem, kpa ntre ke Eyen anam owo eke Enye amade odu uwem.” Ke akpanikọ, Eyen ke ananam mme akpan̄kpa ẹset ke n̄kan̄ eke spirit! Jesus ọdọhọ ete, “Owo eke okopde uyo Mi, onyụn̄ ọbuọtde idem ke Enyeemi ọkọdọn̄de Mi, . . . ama oto ke n̄kpa ebe odụk ke uwem.” Ih, enye akaiso ete: Ini ke edi, onyụn̄ ededi ama, eke mme akpan̄kpa ẹdikopde uyo Eyen Abasi, ndien mmọemi ẹkopde ẹyedu uwem.”

Okposụkedi n̄wetnnịm n̄kpọ baba kiet mîdụhe kan̄a nte ke Jesus amanam owo ekededi eset ata ediseset, enye ọdọhọ mme andidori enye ikọ ete ke utọ ata ediset mme akpan̄kpa oro eyetịbe. Enye ọdọhọ ete, “Ẹkûyịk n̄kpọ emi, koro ini ke edi eke kpukpru mme andidu ke udi ẹdikopde Enye uyo ẹwọn̄ọ ẹdi.”

Tutu osịm emi, Jesus nte an̄wan̄ade akanam itịn̄ke an̄wan̄wa iban̄a akpan utom esie ke uduak Abasi ke utọ in̄wan̄în̄wan̄ ye n̄wọrọnda usụn̄ ntre. Edi mme andidori Jesus ikọ ẹmekụt n̄kpọ ntiense efen ke ebede eke Jesus kaban̄a mme n̄kpọ ẹmi. Jesus eti mmọ ete, “Mbufo ẹkedọn̄ ẹka ke ọtọ John, enye ama onyụn̄ etie ntiense aban̄a akpanikọ.”

N̄kpasịp isua iba ke mbemiso, John Andinịm owo baptism ama etịn̄ ọnọ mme adaiso ido ukpono mme Jew ẹmi aban̄a Enyeemi editienede imọ ke edem. Ke nditi mmọ mban̄a n̄kokon̄ ukpono oro mmọ inikiet ẹkenọde John emi ẹsịnde ke ufọk-n̄kpọkọbi idahaemi, Jesus ọdọhọ ete: “Mbufo ẹma ẹnyụn̄ ẹnyịme ndidara ke un̄wana esie ke ekpri ibio ini.” Jesus anam mmọ ẹti n̄kpọ ẹmi ye idotenyịn ndin̄wam, ih, ndinyan̄a mmọ. Kpa ye oro enye isọn̄ọke iyịre ke ikọ ntiense eke John.

“Utom emi nnanam [oro esịnede utịben̄kpọ oro enye osụkanamde ndondo emi], mmọ ẹnyụn̄ ẹdi ntiense ẹnọ Mi, ẹte, Ete okosio Mi ọdọn̄.” Edi ke ẹsiode oro ẹfep, Jesus akaiso ete: “Ete emi ọkọdọn̄de Mi, Enye omonyụn̄ edi ntiense ọnọ Mi.” Abasi ama etie ntiense ọnọ Jesus, ke uwụtn̄kpọ, ke baptism esie ọdọhọde ete: “Emi edi edima Eyen Mi, emi esịt enemde Mi etieti ye Enye.”

Ke akpanikọ, mme andidori Jesus ikọ inyeneke n̄kpọ nditịn̄ nnyan̄a idem ke mmọ ndisịn enye. Idem N̄wed Abasi oro mmọ ẹdọhọde nte idụn̄ọrede ẹtie ntiense ẹban̄a enye! Jesus eberi ete, “Edieke mbufo ẹkpenịmde Moses ke akpanikọ, mbufo ẹkpenịm Mi ke akpanikọ; koro enye ekewetde aban̄a Mi. Edi edieke mbufo mînịmke se enye ewetde ke akpanikọ, mbufo ẹdinam didie ẹnịm ikọ Mi ke akpanikọ?” John 5:​17-47; 1:​19-27; Matthew 3:17.

▪ Ntak emi utom Jesus mîdịghe edibiat Sabbath?

▪ Didie ke Jesus etịn̄ aban̄a akpan utom esie ke uduak Abasi?

▪ Man ẹwụt ke imọ idi Eyen Abasi, ikọ ntiense anie ke Jesus anyan ubọk owụt?