Ẹda Ẹn̄wam Mbon Oro Afanikọn̄ Esịmde

Ata ediwak afanikọn̄ ama etịbe ke isua 2020, isua oro n̄ko ke idiọk udọn̄ọ COVID-19 akatara asuana ke ofụri ererimbot. Nso ke Mme Ntiense Jehovah ẹkenam man ẹn̄wam mbon oro afanikọn̄ ekesịmde?

Ke isua utom 2020,a Kọmiti Mme Anam-Ndutịm Otu Emi Ẹsede Ẹban̄a Utom Nnyịn ẹma ẹnyịme ẹda n̄kpọ nte biliọn naira 11 ẹn̄wam mbon oro afanikọn̄ ẹsịmde. Ẹma ẹda okụk emi ẹn̄wam mbon emi se ibede afanikọn̄ 200 ẹkesịmde. Mme afanikọn̄ emi ẹsịne idiọk udọn̄ọ coronavirus, ediwak oyobio emi akabiatde mme n̄kpọ, ukwọ ke Africa, unana udia ke Venezuela, ye unana edịm ke Zimbabwe. Ẹma ẹda okụk emi ẹdep udia, mmọn̄, ye ọfọn̄ ẹnọ nditọete. Ẹma ẹnyụn̄ ẹda ẹnam itie emi mmọ ẹdidụn̄de, ẹda ẹdep ibọk, ẹda ẹdep mme n̄kpọ uyet-n̄kpọ, ẹda ẹdiọn̄ mme ufọk emi ẹkebiarade, mîdịghe ẹbọp en̄wen. Yak ineme ndusụk se ẹkenamde man ẹn̄wam mbon emi afanikọn̄ ekesịmde.

COVID-19. Idiọk udọn̄ọ emi ama omụm ndusụk nditọete nnyịn ke ofụri ekondo, anam esịt etịmede ndusụk, onyụn̄ anam n̄kpọ ọsọn̄ ye ata ediwak mmọ. Ke ofụri ererimbot, esop Abasi ẹma ẹtọn̄ọ se ibede Kọmiti Unọ Un̄wam ke Ini Afanikọn̄ 800 man ẹse ẹban̄a nditọete emi afanikọn̄ esịmde. Kọmiti emi ẹma ẹyom usụn̄ ẹdiọn̄ọ se nditọete ẹnanade, ẹnyụn̄ ẹsọsọp ẹnam Kọmiti Mme Anam-Ndutịm ẹdiọn̄ọ man ẹfiọk nte ẹkpen̄wamde mmọ.

Ke ofụri isua oro, Mme Kọmiti Unọ Un̄wam ẹma ẹn̄wam ediwak nditọete ẹnyene udia, mmọn̄, ibọk, ye mme n̄kpọ emi ẹdidade ẹnịm ebiet asana. Ke ndusụk itie, mbon kọmiti emi ẹma ẹdiana ye mbiowo ẹn̄wam nditọete ẹtiene ẹbọ se ukara ẹkenọde mbon emi afanikọn̄ esịmde.

Mbon emi mîdịghe Mme Ntiense Jehovah ẹma ẹtiene ẹkụt se nnyịn inamde man in̄wam nditọete nnyịn. Ke uwụtn̄kpọ, akwaowo ukara kiet emi ekerede Field Simwinga onyụn̄ esede aban̄a obio Nakonde ke Zambia, ọkọdọhọ nditọete nnyịn ete: “Imenen̄ede ikọm mbufo ke nte ẹkesọpde-sọp ẹn̄wam mme ubon oro afanikọn̄ ekesịmde.”

Unana Udia ke Angola. Idiọk udọn̄ọ coronavirus ama anam udia anana onyụn̄ enen̄ede ọsọn̄ urua ke Angola. Ekedi nte eyo esierede, ntre ke eketetịm ọsọn̄ ediwak nditọete nnyịn ndidep udia.

Ẹma ẹdọhọ n̄kọk itieutom Brazil ẹn̄wam ẹnọ udia ẹsọk nditọete nnyịn ke Angola. Nditọete ke n̄kọk itieutom Brazil ẹma ẹda ini ẹnam ndụn̄ọde man ẹdiọn̄ọ nte ẹdidepde udia ẹnyụn̄ ẹnọ ẹsọk nditọete ke Angola edi owo ibiatke okụk ikaha. Ẹkedep udia emi ke ekpat ke ekpat. Ekpat udia kiet ekedi n̄kpọ nte tọsịn naira 8,000. N̄kpọ nte edesi, ọkọti, ye aran mbansan̄ ẹkedọn̄ọ ke ekpat kiet kiet, ndien ekpat udia kiet ama ekpere ndidobi nte ibio ekpat simen. Tutu esịm mfịn emi, ẹnọ ekpat udia 33,544 ẹsọk nditọete nnyịn ke Angola. N̄kọk itieutom Angola ẹma ẹtiene ẹnọ n̄kpọ man ẹda ẹn̄wam nditọete, ndien ke ini ẹtọde kpukpru ẹdian, ẹma ẹkeme ndinọ se ibede owo 50,000 udia!

Nso ke nditọete ẹketịn̄ ẹban̄a un̄wam oro ẹkenọde mmọ mi? Alexandre emi odụn̄de ke ata esịt esịt Angola ọdọhọ ete: “Un̄wam emi anam n̄kụt ke Jehovah ama mi, n̄ko ke ndụhe ikpọn̄. Mmokụt ke esop Jehovah idaha mi ibre mbre!” Mariza emi ọbọkde nditọ ikpọn̄ ọdọhọ ete: “Jehovah okop akam mi. Mmọkọm Jehovah ye esop esie!”

Ẹma Ẹnọ Nditọete ke Zimbabwe Udia. Ke isua utom 2020, edịm ikedepke ke Zimbabwe ke ediwak ọfiọn̄, ndien oro ama anam ata ediwak owo ẹbọ ufen ọbiọn̄. Ata ediwak nditọete ke Zimbabwe ikenyeneke udia n̄ko.

Ẹma ẹtọn̄ọ mme Kọmiti Unọ Un̄wam ke Ini Afanikọn̄. Ẹketọn̄ọ otu kọmiti ition man ẹkeme ndin̄wam nditọete ẹnyene udia. Ediwak nditọete ẹma ẹn̄wam ẹbọp udia emi ke ekpat, ẹtan̄ ẹdọn̄ ke moto, mîdịghe ẹnọ moto mmọ ẹda ẹmen udia emi ẹsọk nditọete.b Ke isua utom 2020, ẹma ẹda se ibede miliọn naira 250 ẹdep udia ẹnọ se ibede owo 22,700!

Ndusụk ini, udia emi nditọete ẹkenyenede ama esikụre ọkpọn̄ mmọ mbemiso mmọ ẹbọde udia emi ẹkenọde ẹsọk mmọ. Nditọete nnyịn ẹma ẹkọm Jehovah ke ini mmọ ẹkebọde udia oro. Ndusụk mmọ ẹma ẹkam ẹtọn̄ọ ndikwọ ikwọ Obio Ubọn̄.

Ke obio kiet, Ntiense Jehovah iba emi ẹkedide mme ebeakpa ẹma ẹtiene ẹka mboho obio emi ẹkenemede nte ẹdisan̄ade ẹdeme udia emi mme owo ẹken̄wọn̄ọde ndinọ obio oro. Edi mboho oro ama akabade etie nte n̄kpọ mbubehe ukara, ntre nditọete nnyịn oro ẹma ẹbiere ke mmimọ idikemeke ndinam se ẹdọhọde ẹnam man ẹbọ udia oro. Ke ini mmọ ẹkewọrọde ke mboho oro, mbon eken ẹma ẹsak mmọ ẹnyụn̄ ẹdọhọ mmọ ẹkûdi ẹdiben̄e mmimọ udia. Edi ke urua iba kpọt ama ekebe, mbon kọmiti esop Abasi ẹma ẹdisịm obio oro ẹnyụn̄ ẹnọ nditọete nnyịn iban oro udia mbemiso mbon oro ẹken̄wọn̄ọde ndinọ obio oro udia ẹnọ udia mmọ edi!

Se ẹkenamde ẹnọ nditọete ke Zimbabwe ama onyụn̄ anam ẹnọ Jehovah ubọn̄. Da Prisca emi odụn̄de ke ekpri obio kiet ke uwụtn̄kpọ. Kpa ye oro n̄kpọ ekenen̄erede ọsọn̄ ke idụt oro ke ntak emi edịm mîkedepke ke ediwak ọfiọn̄, Prisca ama esika ukwọrọikọ kpukpru Wednesday ye Friday idem ke ini ẹtịmde isọn̄ man ẹtọ n̄kpọ. Mbon obio mmọ ẹma ẹsisak enye ẹnyụn̄ ẹdọhọ ke enye ye ubon esie ẹyekpa ọbiọn̄ ke ntak ukwọrọikọ. Prisca ekesidọhọ mmọ ete: “Akananam Jehovah ikpọn̄ke mme asan̄autom esie.” Ikebịghike, esop Abasi ẹma ẹdinọ enye udia. N̄kpọ oro ama enem ndusụk mbọhọidụn̄ esie, ndien mmọ ẹma ẹdọhọ Prisca ẹte: “Abasi fo ikpọn̄ke fi, nnyịn n̄ko imoyom ndinen̄ede ndiọn̄ọ enye.” Idahaemi, mbọhọidụn̄ esie itiaba ẹsitiene ẹkpan̄ utọn̄ ẹkop mbono esop ke radio.

Nte ererimbot emi enen̄erede ekpere utịt, afanikọn̄ nte unana udia, ndiọi udọn̄ọ, ye mme n̄kpọ ntre eyenen̄ede ọsọn̄ ubọk akan nte ekedide. (Matthew 24:​3, 7) Ntre, imenen̄ede ikọm mbufo nte ẹsikade donate.jw.org ẹkenọ okụk man ẹda ẹnam utom Abasi. Imesida okụk oro in̄wam mbon oro ẹnyenede mfịna.