Enye Ama Ekpep N̄kpọ Oto Mbon N̄kpọkọbi

Ete kiet ama efehe ọkpọn̄ Eritrea ke ntak afanikọn̄ do edi Norway ke 2011. Ini Mme Ntiense Jehovah ẹkenemede ikọ Abasi ye enye, enye ama ọdọhọ ke ima isikụt Mme Ntiense Jehovah ke edem mmimọ. Enye ama ọdọhọ ke ini imọ ikedide owoekọn̄ ke ima isikụt Mme Ntiense Jehovah emi ẹkemụmde ẹdidọn̄ ke ufọk-n̄kpọkọbi, ke mmọ ikamaha ndidụk ekọn̄ kpa ye ofụri ufen emi ẹkemiade mmọ ẹnyụn̄ ẹnyịkde mmọ ẹtiene ẹdụk.

N̄kpọ ama ọtọ etịmede, ntre ẹma ẹtiene ẹmụm ete oro ẹsịn ke ufọk-n̄kpọkọbi. Do ke enye okokụt Ntiense Jehovah ita—Paulos Eyasu, Negede Teklemariam, ye Isaac Mogos. Ntiense ita oro ẹdu ke ufọk-n̄kpọkọbi tọn̄ọ 1994 ke ntak n̄kpọ Abasi.

Ini ete oro osụk odude ke ufọk-n̄kpọkọbi, enye ama okụt ke Mme Ntiense Jehovah ẹsinam se mmọ ẹsikpepde mme owo ke Bible. Enye ama okụt ke mmọ ẹdi mbon akpanikọ, ke mmọ ẹsinyụn̄ ẹbuana udia mmọ ẹdia ye mbon n̄kpọkọbi eken. Enye ama okụt ke Mme Ntiense Jehovah ẹsitie kiet ke ufọk-n̄kpọkọbi oro ẹkpep Bible, ẹnyụn̄ ẹdọhọ mbon en̄wen ẹditiene ẹkpep. Ini ẹkedọhọde mmọ ẹsịn ubọk ke n̄wed ẹdọhọ ke mmimọ idịghe aba Mme Ntiense Jehovah man ẹsana mmọ ẹyak, mmọ ikenyịmeke.

Se iketịbede oro ama enen̄ede otụk ete oro, ntre ke enye ama ekedidụn̄ ke Norway, enye ama oyom ndifiọk se inamde Mme Ntiense Jehovah ẹnyene utọ mbuọtidem oro. Emi akanam ke ini Mme Ntiense Jehovah ẹkenemede ikọ Abasi ye enye, enye ama ọsọsọp enyịme ndikpep Bible onyụn̄ ọtọn̄ọ ndidụk mme mbono esop mmọ.

Ke September 2018, ete oro ama ana baptism nte Ntiense Jehovah. Idahaemi enye esida ifet ekededi oro enye enyenede ọkwọrọ ikọ ọnọ mbon Eritrea ye Sudan, onyụn̄ ọdọhọ mmọ ẹsịn idem ẹkpep Bible man ẹnen̄ede ẹnyene mbuọtidem.