Mboho Mme Ntiense Jehovah Emi Ẹkewakde Ẹkan

KE Saturday, October 5, 2013, owo 257,294 ke idụt 21 ẹma ẹdụk mbono ofụri isua Watch Tower Bible and Tract Society of Pennsylvania. Ọyọhọ mbono 129 ekedi emi ndien ndusụk owo ẹkedụk ke itie emi ẹsinịmde mbono emi, mbon eken ẹdụk ke mme itie emi ẹdade Intanet ẹse ẹnyụn̄ ẹkop se ikade iso. Kpa ke utịturua oro, ẹma ẹfiak ẹbre se ẹkenamde ẹnọ Mme Ntiense en̄wen ẹse. Kpukpru owo emi ẹkesede ẹnyụn̄ ẹkopde edinam emi ẹkedi owo 1,413,676 ke idụt 31, ndien idụhe mboho Mme Ntiense Jehovah emi akanam ẹwakde ntem.

Ọtọn̄ọde ke n̄kpọ nte 1924, Mme Ntiense Jehovah ẹma ẹsida telefon ye radio ẹnam mme owo ke nsio nsio idụt ẹkop se ẹnamde ke akamba mbono mmọ. Idahaemi Intanet anam mme owo ẹkeme nditie ke ebiet ekededi ke ererimbot n̄kụt nnyụn̄ n̄kop se itịbede ke ebe oro mîdịghe esisịt ini ke oro ebede.

Ediwak nditọete nnyịn ke nsio nsio n̄kọk itieutom ẹma ẹda se ibede isua kiet ẹnam utom man mme owo ẹkpekeme nditie ke nsio nsio ebiet nse edinam emi ke Intanet. Ke utịturua emi ẹkenịmde mbono oro, mbon emi ẹkesede ẹban̄a ndutịm emi ẹma ẹtie ke Brooklyn ke New York, okoneyo ye uwemeyo ẹnam utom man ẹkụt ẹte ke ẹsio edinam emi ẹwụt mme owo ke nsio nsio ebiet oro ini n̄kanika mîdịghe ukem.