Ndikwọrọ Ikọ Nnyụn̄ Nnọ Ukpep ke Ofụri Isọn̄

Maine ke U.S.A.: Nditọete nnyịn ẹkpebe uwụtn̄kpọ Jesus, ẹnyụn̄ ẹdi “mme ọkọ owo”

KE OFỤRI ERERIMBOT

• IDỤT 239

• MME ASUANETOP 7,782,346

• OFỤRI IBAT HOUR ORO ẸKENAMDE UTOM UKWỌRỌIKỌ 1,748,697,447

• UKPEPN̄KPỌ BIBLE 8,759,988

Africa

• IDỤT 58

• IBATOWO 968,989,710

• MME ASUANETOP 1,312,429

• UKPEPN̄KPỌ BIBLE 2,999,639

Enye Ikosion̄oke Idịbi Aba

Enyene-ufọkurua kiet emi ekerede Saba odụn̄ ke Addis Ababa, ibuot obio Ethiopia. Usen kiet, nditọete iban iba ẹma ẹda Ẹdemede! oro eketịn̄de n̄kpọ aban̄a usion̄o idịbi ẹsọk enye. Saba ama ada mmọ odụk ufọk, onyụn̄ ọdọhọ mmọ ke imọ imoyom ndision̄o idịbi, etịn̄ atua. Nte mmọ ẹkesụk ẹnemede n̄kpọ emi, mmọ mbita ikekemeke ndimụm idem n̄kama, edi ẹma ẹtọn̄ọ nditua. Saba ama ebiere usen oro ke imọ idision̄oke idịbi oro aba onyụn̄ asian ebe esie ntak emi imọ ibierede ntre. Nte ini akakade, enye ama aman ediye eyenan̄wan. Enye n̄ko ama ọtọn̄ọ ndikpep Bible, ndien ekem ana baptism. Enye okop inemesịt idahaemi ndinam utom usiakusụn̄. Ebe esie n̄ko ama ekpep Bible onyụn̄ akabade edi eyenete nnyịn, ndien ke April 2012, iba ke otu nditọ mmọ ẹma ẹna baptism.

‘Ndi Imekeme Ndinyene Nneme ye Enye?’

Esenyịn circuit kiet ke Ethiopia ama asan̄a ye eyenete en̄wen ọkwọrọ ikọ ke ufọk ke ufọk. Ke ufọk kiet, mmọ ẹma ẹsobo ye eyenan̄wan kiet emi edide eyenufọk owo ẹnyụn̄ ẹbụp enye m̀mê imekeme ndinyene nneme ye eteufọk esie. Enye ama ọbọrọ ihih. Mmọ ẹma ẹbụp enye m̀mê imekeme ndinọ eteufọk esie n̄wed okot. Eyenan̄wan oro ama odụk ufọk ndikobụp eteufọk esie, onyụn̄ afiak edidọhọ ke enye ọdọhọ imọ ibọ n̄wed oro idi man imọ ise nte etiede.

Ntre nditọete oro ẹma ẹnọ enye magazine okowụt eteufọk esie. Ke minit ifan̄ ẹma ẹkebe, eyenan̄wan oro ama afiak edidọhọ ke eteufọk imọ enyịme ndikot. Do, kiet ke otu nditọete oro ama obụp enye ete: “Edieke enye mîkemeke ndiwọrọ ndi, ndi imekeme ndidụk ndinyene nneme ye enye?” Eyenan̄wan oro ama afiak odụk okobụp eteufọk esie. Isan̄ emi, enye ama esịne ebighi akan nte ekebịghide akpa, ndien nditọete oro ẹma ẹkere m̀mê enye ayakam afiak ọwọrọ edi aba. Ke akpatre, enye ama ọwọrọ edidọhọ mmọ ẹdụk ẹdi. Nditọete oro ẹma ẹdifiọk ke Yirgu, ete enyeneufọk oro, edi akanieren emi ọdọn̄ọde ana ke ufọk ke isua duop, ikemeke ndidaha nda ke bed, inyụn̄ ikemeke nditetie. Se ikanamde eyenan̄wan oro ebịghi ntre edi ke enye akan̄wana ndin̄wam ọbọn̄ oro esịne ọfọn̄, nnyụn̄ nnam ubet ọbọn̄ oro asana.

Nditọete oro ẹma ẹkwọrọ ikọ ẹnọ ọbọn̄ oro. Se Yirgu okokopde ama enem enye tutu enye enyịme ẹsikpep imọ Bible. Nte ukpepn̄kpọ akakade iso, idem ama ọtọn̄ọ ndisọn̄ enye. Nte ini akakade, enye ama ekeme ndidaha nda ke bed onyụn̄ awat ke n̄kpọitie mbon n̄kpọnnam akanade. Ikebig̣hịke, enye ama ọtọn̄ọ ndidụk mme mbono esop onyụn̄ ana baptism ke mbono district ndondo emi.

Ufọkabasi Emi Enyenede N̄wed Ete Esie

Calvin emi odụn̄de ke Zimbabwe ekedi isua inan̄ ke ini ete esie akakpade ọkpọn̄ sụk ekpat emi ọdọn̄ọde Edikabade Eke Obufa Ererimbot ye n̄wed Ntịn̄nnịm Ikọ Isaiah—Un̄wana Ofụri Ubonowo, Eboho 1 ọnọ enye. Ete esie ọkọdọhọ enye ete: “Kûkpọn̄ ufọkabasi emi enyenede mme n̄wed emi. Mmọ ẹkpep owo akpanikọ.”

Ke eka Calvin ama akakpa, ekaeka Calvin ama emen enye akama. Ke ofụri isua usụkkiet, Calvin ikesimaha nditiene ekaeka esie n̄ka ufọkabasi esie. Enye ọkọdọhọ ke usen kiet iyokụt mbon ufọkabasi oro ẹnyenede n̄wed oro ete imọ ọkọnọde imọ.

Usen kiet, ekaeka esie ama osobo ye eyenete nnyịn an̄wan kiet, ifiọkke ke enye edi Ntiense, onyụn̄ ọdọhọ ke eyeyen imọ ọsọn̄ ibuot etieti inyụn̄ imaha ndisitiene imọ n̄ka ufọkabasi. Utu ke oro, ke esitie ke ufọk ke Sunday okot n̄wed kiet emi ete esie akakpade ọkpọn̄ ọnọ enye. Eyenete an̄wan oro ama obụp m̀mê n̄wed oro ekere didie. Ekaeka esie ama ọbọrọ ke ikere ke edi “kiet ke otu ntaha n̄wed n̄ka Enyọn̄-Ukpeme.”

Eyenete an̄wan oro ama ọdọhọ ke ikpama ndisobo ye eyen oro. Ke ini mmọ ẹkesobode, esịt ama enem Calvin etieti. Eyenete an̄wan oro ama ada n̄wed Nso ke Bible Enen̄ede Ekpep? ọtọn̄ọ ukpepn̄kpọ ye enye ke ebe oro, ndien Calvin ama ọtọn̄ọ ndisidụk mme mbono esop kpa ye oro ekaeka esie mîkenyịmeke. Calvin enen̄ede ebiere ke imọ idikpọn̄ke akpanikọ onyụn̄ odori enyịn ke iyokụt ete ye eka imọ ke ini oro ẹdinamde mme akpan̄kpa ẹset. Enye ama ana baptism ke August 2012.

“Abasi Fo Edi Ọkpọsọn̄ Abasi”

Caro odụn̄ ke Uganda. Ọfiọn̄ kiet kpọt ke enye ama ọkọtọn̄ọ ndikpep Bible, Martin ebe esie emi ekesibrede ifọt ama ọtọn̄ọ ndibiọn̄ọ enye. Enye ọkọdọhọ ete: “Mme n̄wed fo emi iyakke mme ete ete nnyịn ẹdụk ufọk emi aba.” Enye ama ọtọn̄ọ ndifiomo n̄wan esie onyụn̄ ọdọhọ ke iyowot enye edieke enye mîtreke ndikpep Bible. Enye ama etre n̄ko ndise mban̄a ubon mmọ. Caro ikayakke oro afịna imọ, edi ama ada se enye ọkọtọde ke in̄wan̄ ese aban̄a ubon mmọ, onyụn̄ aka iso ekpep n̄kpọ man enyene nnennen ifiọk. Nte ini akakade, Caro ama efehe ọkpọn̄ ufọk ke ini okokụtde ke ẹkeme ndiwot imọ. Enye ama aka iso an̄wana n̄kpọ man enyene se adade ese aban̄a idemesie. Kpa ye oro, ke ini enye okokopde ke idem isọn̄ke nditọ imọ, enye ama ada ekpri okụk oro enye akan̄wanade edep ibọk ọnọ esọk mmọ.

Ke ndusụk ini ama ekebe, ebe Caro ama okot enye ke fon onyụn̄ ọdọhọ ete: “Mbọk mmoyom afiak ọnyọn̄ edi ufọk. Mmokụt ke Abasi fo edi ọkpọsọn̄ Abasi, ke enye inyụn̄ ikpọn̄ke fi. Mbọk dọhọ mbon oro ẹsikpepde fi n̄kpọ ẹtiene ẹdikpep mi n̄ko. Mmenen̄ede nyom ndikpụhọde.” Martin ikanamke mbubru. Ubon mmọ ẹdiana kiet idahaemi ẹnyụn̄ ẹkop inemesịt. Martin ye Caro ẹkena baptism usen kiet ke mbono district ke August 2012.

Owo Emi Akasan̄ade Ikpọn̄ Ọkwọrọ Ikọ ke Nsannsan Obio

Ke ini David okodụn̄de ke obio emi oyomde usụn̄ ọkpọn̄ edem mmọ ke Kenya, enye ama ọtọn̄ọ ndikpep Bible ye Mme Ntiense Jehovah. Edi ikebịghike, enye ama ebiere ndinyọn̄ Lokichar, obio emana esie emi odude ke edere edere n̄kan̄ usoputịn Kenya. Esop oro ekekperede obio esie akan okodu ke Lodwar, emi ẹsisan̄ade n̄kpọ nte kilomita 165 ẹto Lokichar ẹka. Ke ofụri isua inan̄, David ikesiwakke ndisobo ye Mme Ntiense, edi enye ama esikwọrọ ikọ ọnọ mme mbọhọidụn̄ ye iman esie, asian mmọ se enye ọkọfiọkde ke ekpri ini oro enye ekekpepde Bible. Ndusụk owo ẹma ẹnyịme ndikpan̄ utọn̄, ndien ikebịg̣hike, enye ama enyene ediwak ukpepn̄kpọ Bible. Ke 2007, enye ama esisan̄a ke ọkpọkkpọk moto, taksi, ye ekpri bọs aka Lodwar ikaba ke ọfiọn̄ man nditọete do ẹkekpep enye n̄kpọ.

Nte ifiọk David okokponde, ntre n̄ko ke enye ekesịn ifịk anam utom ukwọrọikọ. Kpa ye oro enye mîkanaha baptism kan̄a, enye ama ada ntan ọbọp ekpri “Ufọkmbono Obio Ubọn̄” ekpere ufọk esie, onyụn̄ ọkọn̄ n̄kanya. Do ke enye ekesinịm mbono esop ye mbon oro ẹnyenede udọn̄. Edi idịghe kpukpru owo ke obio ẹkenem esịt ẹban̄a utom ukwọrọikọ esie, ndien ke ufan̄ isua iba, mmọ ẹma ẹsisụn̄i ẹnyụn̄ ẹfiomo enye. Isan̄ kiet, ndusụk owo ke obio ẹma ẹtịm enye ẹkpere ndiwot, ẹnyụn̄ ẹdọhọ ke enye esịn udọn̄ ọnọ mme owo ke obio ẹtuak ibuot ẹnọ Devil. Edi ke David ama eketịn̄ n̄kpọ emi ọnọ akamba owo ukara kiet, owo ikesịnke ntịme aba ye enye, ndien enye ama aka iso ọkwọrọ ikọ. David ọkọdọhọ ete: “Nda akpanikọ ndu uwem. Ndiyakke ubiọn̄ọ ndomokiet akpan mi.”

David ama ana baptism ke 2009, onyụn̄ edi asan̄autom unamutom ye asiakusụn̄ ofụri ini idahaemi. Enye ye eyen esie eren emi edide isua 15 ẹdi n̄kukụre mme asuanetop ke obio oro, edi ke April 2012, n̄kpọ nte owo 60 ẹkedụk Editi n̄kpa Christ oro ẹkenịmde ke ekpri ufọkmbono oro.

“Da N̄wed Abasi Wụt ke Enye Inenke”

Janet emi edide asiakusụn̄ ofụri ini ke Ghana okokot n̄wed Bible Ekpep ke ini okodụkde bọs aka anyan isan̄. Ọkwọrọikọ ufọkabasi kiet ama odụk bọs oro edikwọrọ ikọ, ekem ọdọhọ mme akaisan̄ oro ẹtịp okụk ẹnọ imọ ke ukwọrọikọ imọ. Janet ama ọdọhọ enye ete: “Afo ọdọhọ ke kpa Jesus edi Abasi. Anie ndien eketịn̄ ikọ ye Jesus ke ini enye akanade baptism?”

Ọkwọrọikọ oro ama ọbọrọ ete: “Ndịben̄kpọ edi oro.”

Janet ama okụbọde ibuot 4 ke n̄wed Bible Ekpep, asiak mme itie N̄wed Abasi ifan̄, onyụn̄ ọdọhọ ndusụk mme akaisan̄ oro ẹkot. Enye ama anam an̄wan̄a ke idịghe Jesus edi Jehovah, Ata Ọkpọsọn̄ Abasi.

Ọkwọrọikọ oro ama ọdọhọ enye ete: “Afo edi ifọt.”

Mme akaisan̄ eken ẹma ẹdọn̄ uyo ẹsua ẹnọ enye ete: “Da N̄wed Abasi wụt ke enye inenke utu ke ndikot enye ifọt.” Ọkwọrọikọ oro ama ayat esịt ọwọrọ ke ini bọs afiakde atuak ada. N̄kaiferi kiet emi eketiede ekpere Janet ama ọdọhọ enye ete: “N̄kesikere ke Jehovah edi enyịn̄ ufọkabasi Mme Ntiense. N̄kọfiọkke ke edi enyịn̄ Abasi; nneme fo ye ọkwọrọikọ oro anam mfiọk.”

Mmọ ẹma ẹka iso ẹneme nneme, ndien Janet ama ọbọ n̄kaiferi oro nọmba fon esie onyụn̄ ọdọhọ ke iyokot enye. Ke ini eyenan̄wan oro ekesịmde ufọk, enye ama obụk se iketịbede ọnọ ekaeka esie. Idem ama akpa ekaeka esie n̄ko ndikop ke Abasi ekere Jehovah. Nte ini akakade, Janet ama anam ndutịm man Ntiense ifan̄ ẹsika ẹkenyene nneme ye eyenan̄wan oro ye ekaeka esie. Mmọ mbiba ke ẹdụk mme mbono esop idahaemi.

AMERICA

• IDỤT 57

• IBATOWO 946,087,916

• MME ASUANETOP 3,861,145

• UKPEPN̄KPỌ BIBLE 4,196,922

Ẹkekpep Enye Akpanikọ ke Ebiet Emi Enye Mîkekereke

Mme ekpeme ufọk-n̄kpọkọbi ke Bolivia ẹma ẹdụri Andrea emi edide isua 20 ẹsịn ke okụre ufọk-n̄kpọkọbi ke adan̄aemi enye okosụn̄ide mmọ ọdọhọ ke imọn̄ inam mmọ n̄kpọ. Eyenan̄wan emi okop odudu, etie afai afai, esinyụn̄ anam mme owo ndịk. Edi ndịk esie ikanamke Leidy, owo Ntiense Jehovah emi ẹkedoride ikọ ẹnyụn̄ ẹkọbi; utu ke oro, mbọm Andrea akakam ananam enye. Kpukpru usenubọk, Leidy ama esima ndikot ikọ ikwọ ke n̄wedikwọ nnyịn uyo ọwọrọ. Ke ini Andrea okokopde emi, enye ama obụp, “Ndi edi Ntiense Jehovah?”

Ke ini Leidy ọkọbọrọde ih, Andrea ama ọdọhọ ete: “Eka mi edi Ntiense Jehovah, ndien mma nsitiene enye ndụk mme mbono esop. Enye ama esikpep mi Bible.” Andrea ama ọtọn̄ọ nditua. Ke usen ifan̄ oro ẹketienede, Leidy ama esineme mme ntọtụn̄ọ n̄kpọ Abasi ye Andrea, ndien ke ini ẹkeyomde ndikpe ikpe Andrea, mmọ ẹma ẹbọn̄ akam ẹyom un̄wam ye ndausụn̄ Jehovah. Ẹma ẹsio Andrea ke ufọk-n̄kpọkọbi, ndien enye ama aka iso ekpep n̄kpọ aban̄a Jehovah. Enye ama ọsọsọp odot ndidi asuanetop oro mînaha baptism, ndien idahaemi ke eben̄e idem ndina baptism.

Ẹkedodori Leidy ikọ ẹnọ aka n̄kpọkọbi, edi enye ama ọtọn̄ọ ukpepn̄kpọ Bible ye owo 21 mbemiso ẹkesiode enye. Idahaemi, enye esifiak aka ufọk-n̄kpọkọbi ikata ke urua man akan̄wam mbon oro ẹkenyenede udọn̄.

Ikpehe Intanet www.jw.org

Sunday kiet ke ini utọ 2011, ebe ye n̄wan emi ẹkerede Marc-Andre ye Josée ẹma ẹsịne n̄kpọ ediye ediye ẹsan̄a ye nditọ mmọ iba ẹdụk Ufọkmbono Obio Ubọn̄ kiet ke Canada. Kpukpru owo do ẹkekere ke mmọ ẹdi Mme Ntiense Jehovah emi ẹtode ebiet en̄wen ẹdi. Dominic emi edide asan̄autom unamutom ke esop oro ama ọsọsọp ọdiọn̄ọ Marc-Andre. Dominic ama ekpep enye Bible ke n̄kpọ nte isua 17 emi ẹkebede. Ke isua iba emi ẹbede Marc-Andre ye Josée ẹsision̄o Enyọn̄-Ukpeme ye Ẹdemede! ke ikpehe Intanet www.jw.org ẹkot, ẹnyụn̄ ẹdifiọk ke akpana ofụri ubon mmimọ ẹka Ufọkmbono Obio Ubọn̄. Ẹma ẹsọsọp ẹtọn̄ọ ukpepn̄kpọ Bible ye mmọ, ndien ubon oro ẹma ẹtọn̄ọ ndisidụk kpukpru mbono esop. Ke ubon oro ẹma ẹkekpep Bible ke ọfiọn̄ iba kpọt, mmọ ẹma ẹtọn̄ọ ndisinịm mbubreyo Utuakibuot Ubon kpukpru urua. Mmọ ke ẹka iso ẹnam n̄kọri, ndien Josée ama anam n̄kpọ ke akpa ini ke Ufọkn̄wed Utom Ukara Abasi ke May 2012.

‘Enye Ama Ọnọ Mi Udia Uwemeyo ye Itam Esie’

Ke ini Marcelo emi edide isua duop okodụkde mbono district 2010 ke Chile, enye ama okụt ke akparawa kiet emi eketiede ekpere enye ikakamake n̄wed ndomokiet.

Ntre enye ama esịn eka esie inua ke utọn̄ ete: “Mama, owo emi ikamake Bible.”

Eka esie ama ọdọhọ enye ete: “Nam enye etiene ese okwo.” Ntre Marcelo ama esịk eketie ye owo oro ekekerede Victor do abuana Bible esie ye enye onyụn̄ anam enye etiene ese itie N̄wed Abasi kiet kiet oro ẹsiakde. Ke ini nduọkodudu uwemeyo, Marcelo ama afiak ọkọdọhọ eka esie ete: “Victor ikamake udia.” Eka esie ama ọdọhọ enye abuana udia esie ye Victor. Ntre, Marcelo ama ọnọ Victor bred ye kọp ufiop tea. Nte Victor akadiade udia emi, Marcelo ama owụt enye kpukpru itie Bible oro enye eketide.

Ke uwemeyo, utịn ama ọfọp mmọ. Ntre, Marcelo ama afiak ọkọdọhọ eka esie ete: “Enye inyeneke itam.”

Eka esie ama ọbọrọ enye ete: “Nọ enye okwo.” Marcelo ama anam ntre. Ke mbono oro ama akasuana, Marcelo ye Victor ẹma ẹkọm kiet eken unyọn̄.

Ke mbono district isua oro eketienede, Marcelo ama asan̄a oyom Victor. Enye ama enem esịt ndikụt Victor, edi isan̄ emi Victor ama esịn urụkitọn̄! Ke Victor ama okokụt Marcelo, enye ama asian mme owo do ete: “Ekpri ufan emi anam mi ndu mi mfịn! Isua oko, ẹma ẹnọ mi ikot ẹte ndi mbono, ndien mma ndi. Ufan emi ama abuana Bible esie ye ami onyụn̄ ọnọ mi udia uwemeyo ye itam esie. Ke n̄kpep Bible idahaemi!” Victor edi asuanetop oro mînaha baptism.

Ọkọmbụk N̄kpọntịbe Ama Otoro Enye

Ọwọrọetop ọkọmbụk n̄kpọntịbe kiet ke Venezuela emi enyenede san̄asan̄a ikpehe oro enye esiwetde n̄kpọ ke n̄wedmbụk n̄kpọntịbe ama etịn̄ se iketịbede ke ini enye okokotde itieutom telefon oyom un̄wam. Owo oro ọkọbọrọde eketịn̄ ikọ isa isa, utu ke ndin̄wan̄wam enye. Ke ini enye akafiakde okot, owo en̄wen oro ọkọbọrọde ọkọdọhọ ke ikere “Misael,” etịn̄ ikọ ukpono ukpono, onyụn̄ an̄wam enye ke mfịna esie. Ọkọmbụk oro ekewet ete: “Akanam n̄kwe owo ọfọnde ido, okponode owo, enyịmede ndin̄wam owo nte akparawa oro ke ofụri ini oro enye akan̄wamde mi. Enye ama an̄wam mi ke mfịna oro n̄kenyenede onyụn̄ owụt mi se n̄kpanamde edieke mfiakde nnyene ukem mfịna oro.”

Ke ini ọkọmbụk oro okotorode enye, akparawa oro ama ọdọhọ ke imọ idi kiet ke otu Mme Ntiense Jehovah, ke isidomo ndinam n̄kpọ ye mbọhọidụn̄ imọ nte Jesus eketemede. Ọkọmbụk oro ama enyene nneme ye eteutom Misael. Enye ama otoro eti utom oro Misael akanamde. Ke ikpehe esie ke n̄wedmbụk n̄kpọntịbe, enye ama etịn̄ ke Misael edi eti eyen Venezuela ye kiet ke otu Mme Ntiense Jehovah. Enye ọkọdọhọ ke utịt mbụk esie ete: “Mme owo ntem ẹkpenam utom ke ebiet emi ẹn̄wamde mme owo.”

“Ẹkûsọn̄ Ibuot!”

Idem ama aduai Gabriela, eyenan̄wan isua 15 emi edide inan, ke ini enye akanade baptism ke October 2011 ke mbono district usem idiọn̄ọ ke Ecuador. Ke ini enye akakade ufọkn̄wed ke Monday, nduaidem oro ama anam enye obụp andikpep mmọ m̀mê imekeme ndisian mbon ubet ukpepn̄kpọ mmọ n̄kpọ. Andikpep ama enyịme, ntre Gabriela ama adaha akada ke iso nditọ ubet ukpepn̄kpọ mmọ onyụn̄ ada usem idiọn̄ọ etịn̄ ye nduaidem ete: “N̄kpama ndisian mbufo ke mma ndụk mbono district ke Friday, Saturday, ye Sunday, nnyụn̄ nna baptism n̄kabade ndi kiet ke otu Mme Ntiense Jehovah. Nyom ndisian mbufo ke editịm n̄kpọ emi ekpere utịt. Ini oro osụhọde ikponke aba! Mbọk ẹsọsọp ẹnam ukpụhọde. Ẹkûsọn̄ ibuot. Ẹbak Abasi!” Esịt ama enem nditọ ubet ukpepn̄kpọ mmọ.

Ke ini ẹkewọrọde mbre udia usen oro, Katty, inan en̄wen emi edide Ntiense oro mîwọrọke an̄wautom aba, ama aka ebịne Gabriela okobụp aban̄a mbono oro. Gabriela ama ọbọrọ enye in̄wan̄-in̄wan̄ ete: “Ama enem! Ke emi mma n̄kana baptism mi, nyom ndika iso nnam akpanikọ nnọ Jehovah. Ntre nyom ndisian fi ke ndikemeke ndidi ufan fo aba ke ntak oburobụt uwem fo. Ndika iso nnam ufan ye afo ekeme ndinam Abasi etre ndima mi. Kpụhọde uwem fo. Ọfọn esibọn̄ akam ọnọ Jehovah onyụn̄ etịn̄ se esinamde ọnọ mbiowo. Mmọfiọk ke oyokpụhọde.” Ama ọfọn nte Gabriela ọkọnọde enye ima ima ye in̄wan̄-in̄wan̄ item emi, sia Katty ama aka ekenyene nneme ye mbiowo, ọbọ un̄wam, onyụn̄ afiak ọtọn̄ọ ndiwọrọ an̄wautom.

Enye Akakama Ekpri Kọmputa Andikpep

Ke United States, ofụri nditọ ubet ukpepn̄kpọ eyenete an̄wan kiet emi edide isua 16 ẹma ẹbụp enye mbụme ẹban̄a ido ukpono esie, edi enye ikakamake n̄wed ndomokiet, ikonyụn̄ ikamake Bible. Sia okoyomde ndida Bible mbọrọ mbụme oro, enye ama eben̄e andikpep mmọ ekpri kọmputa man ada odụk ikpehe Intanet www.jw.org. Emi ama anam enye ekeme ndibọrọ kpukpru mbụme oro ẹkebụpde enye, onyụn̄ owụt mmọ nte ẹkpenamde ndụn̄ọde ke ikpehe Intanet oro. Enye ama asian mmọ ke mmọ ẹkeme ndika ikpehe Intanet emi ke idemmọ ini ekededi n̄koyom ibọrọ ke mme mbụme Bible edieke Ntiense mîdụhe ndin̄wam mmọ. Ke urua oro, enye ama okụt ke mbon ubet ukpepn̄kpọ imọ ikobụpke imọ mbụme nte ẹsibụpde. Ke ini enye okobụpde mmọ ntak, ndusụk ẹkedọhọ ke imesiwak ndikama fon mmimọ n̄kot n̄kpọ ke ikpehe Intanet nnyịn. Idem andikpep esie esinam emi n̄ko!

ASIA YE UFỌT UFỌT EDEM USIAHAUTỊN

• IDỤT 48

• IBATOWO 4,222,869,785

• MME ASUANETOP 674,608

• UKPEPN̄KPỌ BIBLE 662,736

Mmọ Ikakaha Aba En̄wan

Otu Mme Ntiense ẹma ẹsan̄a ekpri obio-in̄wan̄ kiet ke Indonesia ẹbe man ẹkedụk edinam ubụkowo. Asiakusụn̄ kiet ama okụt n̄kparawa ẹdade ke mbenusụn̄. Enye ama enyene nneme ye mmọ onyụn̄ ọnọ mmọ ediye uduot ekpri n̄wed Kpan̄ Utọn̄ Nọ Abasi Nyụn̄ Du Uwem ke Nsinsi. Nte ini akakade, eyenete an̄wan kiet ama asan̄a usụn̄ oro ọnyọn̄ n̄kpọ. Ete kiet emi akakamade ediye uduot ekpri n̄wed oro ama asan̄a ọkọkọm enye ke ndikọnọ nditọiren imọ n̄wed oro. Enye ọkọdọhọ ete: “N̄wed emi anyan̄a nditọ mi!” Sia eyenete an̄wan oro mîkọfiọkke nneme oro ẹkenyenede ye nditọ oro, enye ama obụp se iketịbede. Ete oro ama etịn̄ ke nditọ imọ ẹkeyom ndika en̄wan ke obio-in̄wan̄ kiet n̄kosio usiene nnọ ufan mmọ oro ẹkenọmọde, nte ẹkam ẹsinamde ke obio mmimọ. Edi ke ini nditọ imọ ẹkekotde ediye uduot ekpri n̄wed oro, mmọ ẹma ẹdifiọk ke mbon oro ẹsin̄wanade en̄wan ididụkke Paradise. Ntre mmọ ẹma ẹsụhọde esịt, ẹsion̄o idem ẹkpọn̄, ẹnyụn̄ ẹnyọn̄ ufọk. Etop Bible ke ediye uduot ekpri n̄wed oro ama anam mmọ ẹtre ndika en̄wan emi akpakadade owo ibuot.

Eren Emi Ekesikamade Idem Nte N̄wan Anam Ukpụhọde

Rek oto eti ufọk ke Cambodia, edi toto ke ata ekpri, eyeneren emi ye amanamba eyeneka esie eren ẹkekere ke mmimọ idi iban. Mmọ ẹma ẹsibre mbre ye eyen ọkpọ, ẹnyụn̄ ẹma ndisịne ọfọn̄ iban. Bụt ama esinam eka mmọ, enye ikonyụn̄ ifiọkke se akpanamde man etre mmọ. Mmọ ẹma ẹsisịne ọfọn̄ irenowo ẹwọrọ ke ufọk, edi ẹsọsọp ẹkpụhọ ẹsịne ọfọn̄ iban ndondo oro ẹsịmde ufọkn̄wed. Ke ini ẹkesịmde isua 16, amanamba emi ẹma ẹtiene mbon oro ẹketiede nte mmọ ẹdụk mbuba oro ẹsidade ẹfiọk mbon emi ẹyede ẹkan, ndien mme anam edinam ekebe ndise ẹma ẹnyene udọn̄ ke idemmọ. Ẹma ẹsida mmọ ẹnam mme edinam ekebe ndise ye idọkọ. Ikebịghike, Rek ama ọtọn̄ọ ndidu uwem nte adan̄ ukemuduot, onyụn̄ odụk ndụk ye n̄kparawa eken oro ẹkesimade ndikama idem nte iban.

Eka Rek ama ọtọn̄ọ ndisika ufọkabasi, onyụn̄ ada Rek aka. Okposụkedi Rek ekenyịmede ndisịne ọfọn̄ irenowo, enye ikenyịmeke ndifat anyan idet esie. Pastọ ama esiwak nditịn̄ ikọ nsuene Rek onyụn̄ asak enye ke utọ uwem oro enye okodude. Kpa ye oro, Rek ama ebiere ndisika ufọkabasi n̄kekpep Bible. Ke akpa urua, enye ama abak edemede onyụn̄ awat enan̄ukwak ke ediwak kilomita aka ufọkabasi, edi pastọ ama ọdọhọ ke imọ idikpepke enye Bible usen oro. Esịt ama ayat Rek ke ini Pastọ mîkakam iwọrọke-wọrọ idi ke ọyọhọ urua iba.

Ke ini Rek ekesịmde ufọk, amanamba eyeneka esie ama ọdọhọ enye ke n̄wan kiet ama edi edidọhọ ke iyesidikpep imọ Bible ke mfọn. N̄wan oro ama ọnọ enye n̄wed Nso ke Bible Enen̄ede Ekpep? Eyenete an̄wan oro ama esisan̄a ye ebe esie ẹdikpep amanamba emi n̄kpọ. Ke ọfiọn̄ itiokiet ẹma ẹkebe, eyeneka Rek ama ekere ke imọ idikemeke ndinam ukpụhọde, onyụn̄ etre ndikpep Bible. Edi 1 Corinth 6:9, 10, ama enen̄ede otụk Rek, onyụn̄ anam enye okụt in̄wan̄-in̄wan̄ se anade inam. Enye ama esin idem ekpep n̄kpọ, okot Bible, ọbọn̄ akam, onyụn̄ esidụk mme mbono esop, ndien mme n̄kpọ emi ẹma ẹn̄wam enye okpụhọde usụn̄uwem esie. Eka Rek ke ekpep Bible n̄ko, ke onyụn̄ anam n̄kọri. Ke ini Rek akanade baptism, eka esie ama etịn̄ ye mmọn̄eyet idatesịt ete: “Esịt enen̄ede enem mi ndikụt eyen mi anade baptism nte erenowo.” Rek edi asiakusụn̄ ofụri ini idahaemi.

Abiaibọk Okpụhọde Usụn̄uwem Esie

Or-Ya ekedi abiaibọk, abiausọbọ, ọnọitem, ye etịn̄ ini iso. Ebe ye n̄wan emi ẹdide mme akpan asiakusụn̄ ke Haifa ke Israel, ẹma ẹsobo ye enye ke ini ẹkwọrọde ikọ ke ufọk ke ufọk. Enye ama ọkọm mmọ ete: “Ekpedi se ẹyomde nditịn̄ aban̄a Abasi, ẹdụk ẹdi-o!” N̄kpoduoho ibọk ye eke ndedịbe odudu ẹkeyọyọhọ ufọk esie. Enye ọkọdọhọ ke Abasi esitobo imọ etop, ndusụk ini ada “spirit” rabbi emi ama akakpa otobo imọ.

Enye ama enyịme ẹda n̄wed Bible Ekpep ẹkpep imọ n̄kpọ. Usen iba mbemiso ebe ye n̄wan oro ẹkedide ufọk esie, enye ama ọbọn̄ akam eben̄e Abasi ete ọnọ owo emi mîdikabakede Bible nte mme rabbi edikpep imọ Bible. Ke ẹma ẹkekpep enye n̄kpọ ke ọfiọn̄ kiet, enye ama obụp ete: “Ndi mbon en̄wen ẹdu emi ẹsitienede ẹkpep ukem n̄kpọ emi?” Enye ama odụk mbono esop, ama onyụn̄ enem enye ndikụt nte mme owo ẹdarade enye ẹnyụn̄ ẹwụtde enye ima. Toto ke ini oro, enye esidụk mbono esop kpukpru ini.

Ke ama ekekpep n̄kpọ ọfiọn̄ iba, Or-Ya ama obụp aban̄a mbono oro ẹkeyomde ndinịm, ete: “N̄kọ ẹsinịm owo baptism ke mbono? Ke edide ntre, ọwọrọ ẹnyene ọfiọn̄ iba ndida n̄n̄wam mi mben̄e idem nnọ baptism!” Akpa kan̄a, enye ama ọduọn̄ọ kpukpru ọsọn̄urua n̄kpoduoho ibọk esie. Enye ama etre ndikọk ibọk, ọtọn̄ọ ndikwọrọ ikọ nnọ mbon en̄wen, onyụn̄ esinọ mbon oro enye ekesisọbọde idem ye mbon oro ẹkesidide ẹdiyom un̄wam esie n̄wed Bible Ekpep ye mme magazine. Ke ini enye ọdọn̄ọde idahaemi, enye idaha aba usụn̄ oro enye ekesisọbọde idem isọbọ idem. Nditre ukọk ibọk ama anam enye ebuene ke ufan̄ ọfiọn̄ inan̄. Kpa ye oro, enye ama ebiere ke imọ idinamke utom ekededi oro edidade ikan usen inan̄ ke urua, hour itiokiet ke usen, man enyene ini ada anam n̄kpọ Abasi. Ke akpatre, enye ama okụt eti utom. Ekem, anyam akamba ufọk esie, ọbọ ekpri ufọk ke ukpeokụk.

Nte ini akakade, Or-Ya ama odot ndina baptism, edi urua kiet mbemiso mbono oro, enye ama obụn̄ ukot. Enye ikayakke oro akpan imọ, edi ama ọbọbọ n̄kpọ ke ukot akana baptism. Mfịn, Or-Ya edi ifịk ifịk asuanetop, esinyụn̄ ọkwọrọ ikọ ọnọ mbon oro enye ekesisọbọde idem ye mbon oro ẹkesidide ẹdiyom un̄wam esie onyụn̄ ekpep mmọ Bible.

Owo Ndedịbe N̄ka Ekpep Akpanikọ

Ẹma ẹtọn̄ọ ukpepn̄kpọ Bible ye amanamba emi ẹdide inan ke obot obot ikpehe kiet ke Philippines. Mmọ mbiba ẹma ẹdụk ndedịbe n̄ka emi ẹkenịmde ke n̄kpọ ndomokiet idinamke mbon mmimọ adan̄a nte mmọ ẹbọbọde san̄asan̄a n̄kpọ n̄kpemeidem. Ẹma ẹkpep mmọ ndida ikwa, ofụt, ye ikan̄ n̄n̄wana en̄wan, mmọ ẹma ẹsinyụn̄ ẹtiene ẹn̄wana ye n̄ka en̄wen ke obot kiet. N̄ka mmọ ama enyịme mmọ ẹkpep Bible sia ẹkekerede ke Mme Ntiense idinyịkke mmọ ẹkpọn̄ n̄ka mmimọ.

Edi nditọete ẹkedọhọ amanamba oro ke mmọ ẹnyene ndinam ubiere idemmọ etiene se mmọ ẹkpepde ke Bible. Kiet ke otu mmọ ama ebiere ke imọ idikemeke ndinam mme ukpụhọde oro ẹyomde man inam n̄kpọ Abasi. Edi enye eken ama aka iso ekpep n̄kpọ. Eyenete oro ekekpepde enye n̄kpọ ama an̄wam enye, okûbọde Bible usen kiet onyụn̄ ada usem idiọn̄ọ ọdọhọ enye ete: “Enyịn̄ fo, Samuel, mmọdo ke Bible. Samuel emi enyịn̄ esie odude ke Bible ama anam n̄kpọ ata Abasi, Jehovah, tutu ini usọn̄ esie. Afo n̄ko emekeme ndisọn̄ọ nda nnam n̄kpọ Jehovah.” N̄kpọ emi ama otụk Samuel. Enye ama ekere ete: “Edieke enyịn̄ mi odude ke Bible, ọwọrọ ana nnam n̄kpọ Jehovah.” Enye ama asian mbon ndedịbe n̄ka mmọ ke imọ idịghe owo mmọ aba, ọfọp kpukpru n̄kpọ n̄kpemeidem ye n̄kpọ ibọk esie, onyụn̄ aka iso anam n̄kọri. Enye idahaemi edi asan̄autom Jehovah oro ama akana baptism, ke onyụn̄ esịn idem an̄wam mme inan en̄wen ẹkpep Bible.

Eyenọwọn̄ Oro Ẹkekọbọde

Rajiv odụn̄ ke nsannsan obio-in̄wan̄ kiet ke edere edere India. Ke ini enye ekedide isua usụkkiet, Ntiense Jehovah kiet emi ẹkedide andikpep mmọ ke ufọkn̄wed ama ada n̄wed Kpep N̄kpọ to Akwa Andikpep ekpep nditọwọn̄ nti ido uwem. Rajiv ama ama ukpepn̄kpọ emi onyụn̄ otọn̄ọ ndida oro ndu uwem. Enye ama asian andikpep mmọ ke imọ isụhu nsu aba, in̄wanake en̄wan aba ye nditọ ufọkn̄wed mmimọ, ke imesinyụn̄ ibuana udia uwemeyo imọ ye mbon oro mînyeneke.

Nte enye okosụk ekpepde n̄kpọ aban̄a Paradise oro Abasi ọn̄wọn̄ọde, enye ama ọtọn̄ọ ndibuana eti mbụk emi ye mbon obio-in̄wan̄ mmọ, ọkọrọ ye mbon oro enye okosobode ke ini akade isan̄ ke tren. Ete ye eka esie ẹma ẹyat esịt, ẹdọhọ ke enye esuene mmimọ. Mmọ ẹma ẹdọhọ enye etre nditịn̄ n̄kpọ mban̄a Jehovah ye Jesus. Sia enye mîketreke, mmọ ẹma ẹsitịm enye, eka esie ama esinyụn̄ atan̄ ọfọn̄ esie edịp ke ini n̄wed asuanade mbak enye edisịne ọwọrọ eketịn̄ obufa idotenyịn esie ọnọ mbon en̄wen. Ete ye eka esie ikesiyakke enye ana ke bed esie aba, ikonyụn̄ inọhọ enye udia nte ẹkesinọde. Ke ini ofụri emi mîkakpanke Rajiv, mmọ ẹma ẹkot oku edinam eyen mmimọ okpụhọde nte ekerede n̄kpọ.

Oku oro ama edidu ke ufọk mmọ ke ediwak usen onyụn̄ odomo ndinyịk Rajiv ọnụhọ ọnọ edisọi mbiet. Ke ini Rajiv ọkọdọhọde ke mbiet oro edi ikpîkpu itiat, oku oro ama ọdọhọ enye okûse mbiet oro enyọn̄ enyọn̄, edi etehede idem ese, ke ọmọn̄ “okụt” ke edi abasi. Rajiv ama ada ekpri babru ewet “100 rupee” emi edide okụk India. Enye ama ayak babru oro ọnọ oku oro ete ekedep chocolate, onyụn̄ ọbọ ndian̄ade edi. Oku oro ama ọdọhọ ke imọ idịghe ndisịme; ke idịghe okụk edi oro, ke edi ikpîkpu babru. Rajiv ama ọbọrọ enye ete: “Edieke eteherede idem ese babru emi, oyokụt ke ata okụk ke edi, idịghe ikpîkpu babru.” Oku oro ama ayat esịt omụm enye ibuot onụk ọnọ mbiet oro. Rajiv ama ọdọhọ enye ete: “Omomụm mi ibuot onụk ọnọ mbiet emi, edi tutu amama udukemeke ndinam mi n̄kokoi ntuak ibuot nnọ enye.” Ke akpatre, oku oro ama ọnyọn̄, ọdọhọ ke owo idikemeke ndinam eyen oro okpụhọde, n̄ko ke edieke imọ ikade iso idu do, ke imọ ke idem imọ imekeme ndikpọn̄ ido ukpono imọ. Ete ye eka Rajiv ẹma ẹsio enye ẹka ufọkn̄wed en̄wen. Edi Rajiv itreke ndisian kpukpru mbon oro ẹnyịmede ndikpan̄ utọn̄ nnọ enye n̄kpọ mban̄a Jehovah ye un̄wọn̄ọ Paradise. Enye edi isua duop idahaemi, ndien ke aka iso odori enyịn ke Jehovah ayan̄wam imọ isọn̄ọ ida ke mbuọtidem.

Enye Ama Okụt Bible Oro Enye Okoyomde

Ke ini Larisa ọkọkwọrọde ikọ ọnọ eyenan̄wan kiet ke ufọk unyam n̄wed ke Armenia, n̄wan kiet ama odụk edibụp eyenan̄wan oro m̀mê mmọ ẹnyene Bible “Obufa Ererimbot.” Eyenan̄wan oro ama ọdọhọ ke imọ inyeneke utọ Bible oro, ke inyene Bible usem Armenian. N̄wan oro ama obụp enye ete: “Ndi esisọp an̄wan̄a owo?” Eyenan̄wan oro ama okot ufan̄ikọ ifan̄ onyụn̄ ọdọhọ ete, “Etie nte an̄wan̄a owo.” N̄wan oro ikenịmke edi okosụk eyịre ete ẹnọ imọ Bible “Obufa Ererimbot.” Larisa ama editi ndien ke imakama Bible emi ke usem Armenian ke ekpat imọ. Enye ama osio owụt n̄wan oro onyụn̄ ọdọhọ enye okot enyịn̄ Bible oro. N̄wan oro ama okot, “Edikabade Eke Obufa Ererimbot.” Bible emi ke enye okoyom!

N̄wan oro ama ọdọhọ ke eyen imọ ye ebe esie ke Greece ẹtọn̄ọ ndikpep Bible ye Mme Ntiense Jehovah. Edi sia mmọ mîfiọkke kan̄a usem Greek, mmọ ẹma ẹdọhọ enye ada Edikabade Eke Obufa Ererimbot usem Armenian ọsọk mmimọ ama afiak edi. Eyenete nnyịn an̄wan ama ọnọ n̄wan oro Bible oro onyụn̄ ọdọhọ ete: “Mbọk, nọ mmọ Bible emi nyụn̄ dọhọ ke Jehovah ọnọ mmọ.” N̄wan oro ama enem esịt etieti ke ini Larisa ọkọdọhọde n̄ko ke ikpama ndisikpep Bible ye enye. Mmọ ẹma ẹnọ kiet eken nọmba fon mmọ man ẹkpesikpep Bible ke ndondo oro n̄wan oro otode Greece edi.

EUROPE

• IDỤT 47

• IBATOWO 738,679,198

• MME ASUANETOP 1,595,888

• UKPEPN̄KPỌ BIBLE 841,260

Enye Ama Ọkpọn̄ Ekpatokụk Oro Ọnọ

Nina, eyenete an̄wan emi edide asiakusụn̄ ke Bosnia esikpep Bible ye ubon kiet emi ẹdide mbon Roma. Ke ini ekpri eyenan̄wan isua duop ke ubon oro akasan̄ade ke usụn̄ usen kiet, enye ama okụt ekpat ye okụk ke esịt, ye kad emi ẹsidade ẹdep n̄kpọ ke isọn, ye mme akpan n̄wed eken. Mbemiso mmọ ẹkekpepde akpanikọ, ekeme ndidi enye akpakada oro nte efiọhọ, edi ke ama okobụp eka esie, enye ama ebiere ndimen ekpatokụk oro nsọk mme bodisi. Oro ekedi ata eti ubiere okposụkedi ubon mmọ ẹkedide ubuene, mîkonyụn̄ inyeneke okụk ndidep ọkpọkọm bred. Idem ama akpa bodisi oro enye akayakde ekpatokụk oro ọnọ. Ke n̄kpọ nte hour iba ẹma ẹkebe, ẹma ẹkot mmọ ẹte ẹfiak ẹdi ufọkutom mme bodisi. Enyene-ekpatokụk oro ke eketie ebet mmọ man ọkọm onyụn̄ ọnọ mmọ enọ. Enye ama ọnọ mmọ n̄kpọ nte dollar (U.S.) 30 [₦4,650], emi edide okụk utom usen iba ke edem mmọ.

Enye Ama Ama Ibuotikọ Oro

Nihad emi odụn̄de ke Bosnia ama okụre ukwọrọikọ usen kiet. Nte enye akasan̄ade ekpere moto esie, enye ama okụt eren kiet adade ekpere moto oro. Ke ini Nihad ọkọkọmde enye, eren oro ama ọdọhọ ete: “Ete mbọk, n̄kokụt magazine ke moto fo emi ibuotikọ kiet ọdọhọde, ‘Se Owo Akpanamde man Edi Eti Ete.’ N̄kpama ndinyene kiet. Mmebet fi mi n̄kpere hour kiet. Mbọk nọ mi kiet!” Nihad ama okop inemesịt ndinọ enye magazine oro, onyụn̄ ada ifet oro ọkwọrọ ikọ ọnọ enye.

Ẹdọn̄ Mme Anamutom Nsụn̄ikan̄ Esịt

Ke ini ebe ye n̄wan kiet ẹkekwọrọde ikọ ke esụkmbehe Rotterdam ke Netherlands, mmọ ẹma ẹdụk nsụn̄ikan̄ kiet ẹkesobo mme anamutom oro ẹketiede mfụhọ mfụhọ. Etubom mme ọdiọn̄ nsụn̄ikan̄ oro ama ọdọhọ mmọ ye mmọn̄eyet ke enyịn ke nsụn̄ikan̄ mmimọ enyene nsio nsio mfịna, ke ayak nsịn̄ ọkpọkọtọ n̄kpọ en̄wen, ye nte ke ndusụk n̄kpọ ẹbiara. Ntre enye ama ọdọhọ mmọ ete: “Mbọk, ẹbọn̄ akam ẹnọ nnyịn!” Ebe ye n̄wan oro ẹma ẹdọhọ mmọ ke ikpama ndida Bible nnọ utịn̄ikọ nsịn udọn̄ nnọ mmọ. Ke n̄kanika itiaba mbubreyo edem usen, ebe ye n̄wan oro ẹma ẹsan̄a ye mme asuanetop inan̄ en̄wen ẹdi, ndien mbon nsụn̄ikan̄ oro ẹma ẹda mmọ ẹdụk esịt nsụn̄ikan̄. Owo 15 ke otu owo 16 emi ẹnamde utom ke nsụn̄ikan̄ oro ẹma ẹsop idem. Ke ẹma ẹkebọn̄ akam, eyenete kiet ama ọnọ utịn̄ikọ ke ibuotikọ emi, “Ndi Abasi Esidi Ntak Afanikọn̄?” Mme anamutom nsụn̄ikan̄ oro ẹma ẹkeme ndikot mme itie Bible oro ẹkesiakde sia mme asuanetop oro ẹma ẹkama Bible ifan̄ en̄wen ẹnyụn̄ ẹn̄wam kpukpru owo ẹkụbọde ẹka mme itie oro ẹkekotde. Ke ẹma ẹkebọn̄ akam ediberi, kpukpru mmọ ẹma ẹsụhọde ẹtetie ye nditọete oro ẹneme nneme. Emi ama anam idem enem mme awat nsụn̄ikan̄ oro, mmọ ẹma ẹnyụn̄ ẹkọm nditọete. Owo mmọ kiet ọkọdọhọ ete: “Ibọrọ akam nnyịn edi emi.” Mme anamutom nsụn̄ikan̄ oro ẹma ẹbọ n̄wed 20, ẹbọ Bible ye mme n̄kpọ eken, ekem etubom nsụn̄ikan̄ oro ama ọnọ mme asuanetop oro efọkn̄wed emi ẹkesịnde dollar (U.S.) 200 [₦31,000] ke n̄wed oro mmọ ẹkebọde.

Enye Ama Ọbọn̄ Akam Oyom Ndin̄wam

Irene emi odụn̄de ke Sweden ekewet ete: “Ndi isua 80, ndien ubiak iyakke n̄wọrọ an̄wautom aba. Mma mbọn̄ akam mben̄e Jehovah nte anam mi n̄n̄wam kiet ke otu mbon oro n̄kakade n̄kese anyan ini ko enyịme ẹdise imọ m̀mê ẹnyene nneme ye imọ idahaemi.

“Owo ama okot nnyịn ke telefon usen kiet, ndien ebe mi ọkọbọrọ ikot oro. N̄wan emi okokotde ọkọdọhọ enye ete: ‘Mbọk, mbufo ikpọn̄ ke n̄keme nditi, enye anam n̄kot. Mbọk, yak n̄wan fo esidineme Ikọ Abasi ye ami. Mma n̄kpep Bible ke isua 15 m̀mê isua 20 emi ẹbede, edi ebe mi emi akakpade ama esibiọn̄ọ mi, mmọdo mma ntre.’

“Mma nti ke mma nsan̄a ye eyenete an̄wan emi ekesikpepde enye Bible n̄ka edem esie. Idem ama akpa mi ndifiọk ke enye okosụk eteti mi. Esịt ama adat mi, ntre mma ndiomi ndika n̄kese enye. Toto ke ini oro, imesikpep n̄kpọ ini kiet ke urua. Enye ama odụk Editi ye akpan utịn̄ikọ an̄wa, ke onyụn̄ odụk mme mbono esop. Mmesikọm Jehovah kpukpru usen ke ndikọbọrọ akam mi.”

Owo Isisịnke Chocolate ke Ekebe Etịbe

Sergio edi isua itiaita, onyụn̄ odụn̄ ke Italy. Enye okoyom ndiwụt mbiowo ke imọ imodot ndidi asuanetop oro mînaha baptism. Usen kiet, enye ama asan̄a ye ete esie aka ndikọdiọn̄ ukpọhọde ufọk nnọ akanieren ebe ye n̄wan emi ẹbede isua 70. Sergio ama emen magazine ifan̄ esịn ke ekpat. Enye ọdọhọ ete: “Ke ini ete mi okosụk anamde utom, mma nnọ ọbọn̄ oro mme magazine oro, idem ama akpa enye tutu enye okot n̄wan esie owụt. Mma mbụp mmọ enyịn̄ mmọ, adres, ye nọmba fon mmọ, nnyụn̄ n̄wet nnịm man n̄kpafiak n̄kese mmọ. N̄wan esie akasian mi mme n̄kpọ emi kiet kiet onyụn̄ ọnọ mi akamba chocolate.” Ke usen ifan̄ ẹbede, Sergio ama asan̄a ye ebiowo kiet afiak aka ndise mmọ. Enye akamia n̄kanika, ndien ke ini n̄wan ọbọn̄ oro ọbọrọde, enye ama ọdọhọ ke ida n̄wed Nso ke Bible Enen̄ede Ekpep? isọk mmọ. Esịt ama enem n̄wan oro ndibọ. Enye ama ọnọ Sergio akamba chocolate en̄wen. Sergio ọdọhọ ete: “Sia owo mîsisịnke chocolate ke ekebe etịbe, mma mmen ndia.” Enye adian do ete: “Mbiowo ẹfiọk ndien ke mmenen̄ede nyom ndidi asuanetop oro mînaha baptism.”

Pastọ Ama Oyom Ndikpep N̄kpọ Efen Efen

Simeon ekedi pastọ ufọkabasi ke Gurkovo, obio emi Ntiense ndomokiet mîdụhe ke Bulgaria. Enye ama ekpep Bible ke idemesie onyụn̄ edikụt ke se Bible ekpepde okpụhọde ye se ufọkabasi ekpepde. Ke ini enye okodụkde tren aka isan̄ usen kiet, ẹma ẹnọ enye magazine nnyịn ifan̄. Idem ama aduai Simeon ndikpep nte ke Jehovah edi ata Abasi ye nte ke ukpepn̄kpọ Abasi-Ita-ke-Kiet edi nsu. Sia ọkọdọn̄de enye ndikpep n̄kpọ efen efen, enye ama ewet n̄wed ọnọ n̄kọk itieutom onyụn̄ ewet ọnọ kpukpru ufọkabasi emi enye ọkọdiọn̄ọde. Ufọkabasi kiet kpọt ẹkebọrọ enye, ẹte okûfịna idemesie ye “utọ ndisịme oro.” Edi n̄kọk itieutom ẹma ẹdọn̄ Ntiense iba ẹto Kazanlŭk emi oyomde usụn̄ ke n̄kpọ nte kilomita 35 ẹkese enye. Mmọ ẹma ẹtọn̄ọ ukpepn̄kpọ Bible ye Simeon ye mbonubon esie. Simeon ama ama se enye ekekpepde, onyụn̄ okot mme mbọhọidụn̄ ye mme ufan esie ẹtiene ẹdikpep. Ikebịghike, owo 25 ẹkesidụk ukpepn̄kpọ Bible oro ẹkenịmde kpukpru urua do. Ke akpa usen emi mbọhọidụn̄ esie emi edide isua 75 eketienede etie ke ini ẹnemede Bible, enye ama etịn̄ ye mmọn̄eyet idatesịt ete: “Se n̄kpepde ke hour kiet an̄wan̄a mi akan se n̄kesikpepde ke ofụri isua 30 oro n̄kade ufọkabasi.” N̄kpọ nte owo 60 ẹsidụk mbono esop oro nditọete ẹsitode Kazanlŭk ẹdinịm ke Gurkovo kpukpru ọfiọn̄, ndien owo 79 ẹkedụk Editi.

“Mbọk, Ka Iso ke Eti Edu Fo”

Valya, eyenete an̄wan emi edide isua 15 ke Ukraine ama okụt andikpep mmọ esịnede obubịt ọfọn̄ edi ufọkn̄wed onyụn̄ okụt enye atuade. Ke Valya ama ọkọfiọk ke eka andikpep oro ama akpa, enye ama ebiere ndida se N̄wed Abasi etịn̄de aban̄a ediset ke n̄kpa ndọn̄ enye esịt. Valya ama emen Bible ye ndiye uduot n̄kpri n̄wed iba, Nso Itịbe inọ Nnyịn ke Ini Nnyịn Ikpade? ye Ke Ini Owo Oro Afo Amade Akpade, onyụn̄ aka ebịne andikpep mmọ ke n̄wed ama akasuana. Enye ọdọhọ ete: “Idem ama enyek mi ke ini n̄kadade ke enyịnusụn̄ ọfis esie, ntre mma mbọn̄ akam nte Jehovah an̄wam mi.”

Ke ini Valya okodụkde ọfis andikpep mmọ, andikpep ama obụp enye ete: “Oyom nso?”

Valya ama ọbọrọ ete: “Ndi ndidọn̄ fi esịt sia mmọfiọk nte etiede fi ke idem. Ete eka mi ama akpa n̄ko ke isua ifan̄ emi ẹbede.”

Edinam Valya emi ama otụk andikpep mmọ. Enye ama etịn̄ mbọm mbọm ke iman ye nsan̄autom imọ ikọdọn̄ke imọ esịt ntre. Valya ama okot n̄wed Ediyarade 21:3, 4, onyụn̄ anam an̄wan̄a enye, ekem ọnọ enye ndiye uduot n̄kpri n̄wed oro. Andikpep oro ama ọdọhọ enye ete: “Afo omokpụhọde ye nditọ ufọkn̄wed eken.”

Valya ama ọdọhọ enye ete: “Mmesisịn idem n̄kot Bible nnyụn̄ ndomo ndidu uwem nte Bible etemede, mmesinyụn̄ n̄kop uyo nnọ ete ye eka mi.”

Andikpep oro ama ọdọhọ Valya ada Bible ye n̄wed Bible Ekpep ọsọk imọ; Valya ama anam ntre. Enye ama afiak ọkọm Valya onyụn̄ ọdọhọ enye ete: “Ido ukpono mbufo edi ido ukpono akpanikọ, afo omonyụn̄ enyene eti ete ye eka emi ẹkpepde fi se inende. Mbọk, ka iso ke eti edu fo.”

Enye Ekedue Okot Nọmba En̄wen

Ke akpa usen mbono district 2011 oro ẹkenịmde ke Malakasa ke Greece, Natalie okoyom ndikot ete esie ke fon man obụp aban̄a bọs oro ẹdidụkde ẹka itie mbono. Edi enye ekedue okot nọmba en̄wen; owo ikọbọrọke. Ke esisịt ini ẹbede, owo oro enye ekeduede okot do ama okụt nọmba oro onyụn̄ okot man ọfiọk m̀mê anie ke ekedi. Edi ẹma ẹtọtọn̄ọ mbono, ndien okposụkedi Natalie okoyomde ndifịk fon nnịme, enye ama edue efịk ebiet oro ẹsidade ẹbọrọ ikot. Enye ikọfiọkke ke imanam owo oro okop utịn̄ikọ etieibuot okpokoro, ndien owo oro ama ama se enye okokopde.

Ekem, owo oro ama ọnọ Natalie etop, ete: “Afo edi anie? Ndi edi oku?” Ke edinam usenubọk ama akasuana, Natalie ama okụt etop oro onyụn̄ ọbọrọ enye ete: “Ndịghe oku. Ndi Ntiense Jehovah, ndien ndụk mbono district nnyịn.”

Ọbọn̄ oro ama afiak okot ke Saturday obụp m̀mê ke ẹnenịm mbono oro. Ete Natalie ama ọkwọrọ ikọ ọnọ enye, ndien ọbọn̄ oro ama ọdọhọ ete: “Utịn̄ikọ oro n̄kokopde ke minit ifan̄ ama anam mfiọk ediwak n̄kpọ oro ẹsifịnade mi.” Mme demon ẹsifịna ubon ọbọn̄ oro, edi mmọ ikọfiọkke m̀mê mme demon emi ẹdi mmanie ye ntak emi ẹsifịnade mmọ. Ọbọn̄ oro ama ọdọhọ ete: “Akananam nnyịmeke Mme Ntiense Jehovah ẹnyene nneme ye ami, edi n̄kpama ndinyene nneme ye owo oro ọkọnọde utịn̄ikọ oro.”

Ẹma ẹnam enye enyene nneme ye etịn̄ikọ oro. Enye ama edi mbono ke Sunday, idem ama onyụn̄ akpa enye ke se enye okokụtde—mme ubon oro ẹsịnede n̄kpọ ndiye ndiye ẹnyụn̄ ẹkopde inemesịt. Owo ikọduọn̄ọke mbio ntịme ntịme, owo isụn̄ike owo, owo in̄wọn̄ke sika. Ọbọn̄ oro ama ọdọhọ ete: “N̄kọfiọkke ke owo nte mbufo mmọdo ke ererimbot emi! Etie mi nte ndu ke ererimbot en̄wen.” Ete Natalie ama ada enye aka ọfis etieibuot okpokoro, ndien enye ama enyene nneme ye etieibuot okpokoro. Se ẹkenemede ke mbono oro ye ibọrọ oro ẹkenọde enye ama enen̄ede enem enye. Enye ama ọbọ n̄wed Bible Ekpep, ọbọ Bible, ye magazine ifan̄, ẹma ẹnyụn̄ ẹnam ndutịm man ẹkese enye.

OCEANIA

• IDỤT 29

• IBATOWO 38,495,300

• MME ASUANETOP 94,924

• UKPEPN̄KPỌ BIBLE 59,431

“Akanam N̄kopke Ikwọ Oro Enemde Ntem!”

Ke Savaii emi odude ke Samoa, kpukpru owo ke ufọkn̄wed ẹsisop idem ẹkwọ ikwọ mbemiso ẹtọn̄ọde ukpepn̄kpọ kpukpru usen. Edi Celina emi edide isua ition, ye Levaai emi edide isua itiokiet, ẹma ẹdọhọ etubom ufọkn̄wed ke mmimọ idikemeke nditiene n̄kwọ sia mmimọ idide Mme Ntiense Jehovah. Nditre nditiene n̄kwọ ikwọ ekeme ndinam ẹnọ owo ufen. Edi etubom ufọkn̄wed ama ekere ke imekeme ndisuene mmọ nnam mmọ ẹtiene ẹkwọ, ntre enye ama ọdọhọ mmọ ete: “Ọfọn, edieke mbufo mîkemeke ndikwọ ikwọ nnyịn, ẹkwọ eke mbufo nan̄a.” Celina ye Levaai ẹma ẹkwọ ọyọhọ ikwọ 111, “Enye Oyokot,” emi mmọ ẹkekpepde ndondo emi ke mbubreyo Utuakibuot Ubon mmọ. Ke mmọ ẹma ẹkekwọ ẹma, mmọn̄eyet idatesịt ama asiaha etubom ufọkn̄wed ke enyịn. Enye ama ọdọhọ ete: “Akanam n̄kopke ikwọ oro enemde ntem! Mbọk ẹfiak ẹkwọ.” Mmọ ẹma ẹfiak ẹkwọ. Enye ama ọdọhọ mmọ ete: “Ọtọn̄ọde ke emi, ndisidọhọ mbufo ẹkwọ ikwọ mbufọ, idịghe eke nnyịn.”

Enye Ekesibọn̄ Akam Ọnọ Jesus

Eren kiet ke Fiji emi ekedide pastọ ufọkabasi ama ebiere nditiene ntie ke ini ẹkekpepde owo en̄wen Bible. Do, enye ama okop ke Jesus idịghe Abasi. N̄kpọ oro ama afịna enye etieti, iyakke enye ede. Ke n̄wan esie ama okokụt ke n̄kpọ emi afịna ebe imọ, enye ama ọdọhọ enye ete: “Kûfiak ukûtie ukpan̄ utọn̄ unọ mbon oro aba!” Edi enye okosụk ekekere aban̄a n̄kpọ emi. Ke urua oro eketienede, enye ama afiak eketie ke itie ukpepn̄kpọ Bible oro. Ke usen ifan̄ ẹma ẹkebe, okposụkedi emi owo mîkọtọn̄ọke ndikpep enye Bible kan̄a, enye ama aka ufọkabasi mmọ ọkọdọhọ ke imọ iyomke ndidi pastọ aba. N̄kpọ emi ama enen̄ede akpa iman ye mbon ufọkabasi esie idem, mmọ ẹma ẹnyụn̄ ẹyat esịt. Enye ama ọkpọn̄ ufọkabasi oro onyụn̄ etre utom pastọ oro ẹkesikpede enye ata ediwak okụk. Ndikpep Bible ama anam enye ọfiọk owo emi Jesus edide, edi enye ikekemeke ndibọn̄ akam nnọ Jehovah sia enye ekesibọn̄de akam ọnọ Jesus. Ke ediwak ọfiọn̄ ẹma ẹkebe, enye ama ekeme ndien ndisibọn̄ akam nnọ Jehovah. Idahaemi, enye ke ọkwọrọ eti mbụk ọnọ mbon en̄wen, an̄wam mmọ ẹfiọk ẹnyụn̄ ẹma Jehovah.

Mme Owo ke Ekpri Obio Kiet Ẹma Akpanikọ

Owo 62 kpọt ẹdụn̄ ke isuo Makatea emi odude ke Edem Usụk Pacific. Esop Mme Ntiense Jehovah kiet ke Tahiti ke ẹkpep mme owo do ikọ Abasi. Ke ẹda telefon ẹnịm ukpepn̄kpọ Bible ye owo usụkkiet ke obio oro. N̄kpọ nte owo 15 ẹsisop idem ke ufọk eyen ukpepn̄kpọ Bible kiet ẹnyụn̄ ẹkpan̄ utọn̄ ẹkop se ẹnemede ke mbono esop emi ẹsinịmde ke Tahiti. Kiet ke otu mbon oro ẹkpepde Bible idahaemi edi eyenan̄wan kiet emi ekedide akwaowo ke ufọkabasi mmọ, oro ẹkeyomde ndimek deacon. Ọfiọn̄ ifan̄ ko, enye ama aka ufọkabasi mmọ akasian mmọ ntak emi imọ mîsidụkke ederi do aba. Enye ama ada Bible owụt mmọ ntak emi mîkpanaha n̄wan ẹkpep esop n̄kpọ. Enye ama anam an̄wan̄a n̄ko utom oro ẹnọde Jesus Christ, se Udia Ọbọn̄ adade aban̄a, ye nte ke ẹkpesinịm enye ini kiet ke isua idịghe kpukpru Sunday. Ke adianade do, enye ama owụt ke owo 144,000 kpọt ẹdidu ye Christ ke heaven, n̄ko ke mmọ kpọt ẹnyene ndidia mme n̄kpọ idiọn̄ọ Editi. Uwụtn̄kpọ esie ama anam n̄wan en̄wen ọkpọn̄ ufọkabasi oro, onyụn̄ ọtọn̄ọ ndikpep Bible idahaemi ye Mme Ntiense.

Ubon Oro Ẹma Ẹnyịme Ikot Oro Ẹkenọde Mmọ

Mbiowo iba ke Solomon Islands ẹma ẹsịn ukeme ẹkot mbon oro mîsọn̄ke idem aba ẹdidụk Editi n̄kpa Christ, ẹma ẹnyụn̄ ẹkot Joshua emi mîkodụkke aba mbono esop toto ke 1998. Joshua ye owo 20 ke ubon mmọ ẹma ẹsan̄a ke ofụri hour iba ẹdidụk Editi. Ima ima usụn̄ oro esop ẹkedarade mmọ ama anam mmọn̄eyet asiaha Joshua ke enyịn. Ediwak owo ke ubon mme Joshua ẹma ẹtiene n̄ko ẹdi akpan utịn̄ikọ, ekem ẹdọhọ mbiowo ke ikpama ẹdikpep mmimọ Bible. Ẹma ẹnam ndutịm man ẹkpep owo 15 ke otu mmọ Bible.

Enye Ama Ọfiọk Ibọrọ

Ke otu se ibede mme isuo 1,000 emi n̄kọk itieutom Guam ẹsede enyịn, se ibede 100 kpọt ke mme owo ẹdụn̄. Isuo 13 kpọt ke otu emi ẹdu ẹkpere esop. Sia Mme Ntiense Jehovah akanam mîkaha ikese ediwak ke otu mme isuo emi, nditọete ke ẹka iso ẹyom usụn̄ ndika n̄kese mmọ. Ke April 2012, otu mme asuanetop ẹma ẹsan̄a ke ubom afara ẹka Polowat, kiet ke otu mme isuo emi odude ata nsannsan. Mme owo ke Polowat ifiọkke se ikade iso ke mme ikpehe ererimbot en̄wen. Irenowo ke ẹkekụne mkpịn, ẹtụn̄ ubom, ẹnyụn̄ ẹnam utom in̄wan̄.

Kiet ke otu mme asuanetop emi akakade obio emi ama obụp akparawa kiet ete: “Nso isitịbe ke ini mme owo ẹkpade?”

Akparawa oro ama ọbọrọ ete: “Mmọfiọk ibọrọ!” Ekem adaha ada osio n̄wed Afo Emekeme Ndidu Uwem ke Nsinsi ke Paradise ke Isọn̄ ke usem Chuukese ke n̄kpọ udọn̄ n̄wed esie, okụbọde aka Se Isịnede, owụt ibuot 8 emi ibuotikọ edide, “Nso Itịbe ke N̄kpa?” onyụn̄ etịn̄ se enye ekekpepde ke n̄wed oro.

Enye akanam didie enyene n̄wed emi? Ke 2009, mme asuanetop ẹma ẹkekwọrọ ikọ ke itiembehe nsụn̄ikan̄ Isuo Chuuk ẹnọ mme aka isan̄ emi ẹkeyomde ndika mme isuo en̄wen ẹnyụn̄ ẹnọ mmọ n̄wed Ndidu Uwem ke Nsinsi. Owo kiet emi okoyomde ndika Polowat ama enyịme ndibọ mmọ ekebe oro ẹkedọn̄de n̄wed nnyịn n̄kedeme nnọ mme mbọhọidụn̄ esie, ndien akparawa emi ekedi kiet ke otu mbọhọidụn̄ owo oro.

Mbemiso nditọete ẹkekpọn̄de Polowat, mmọ ẹma ẹfiak ẹkesịn udọn̄ ẹnọ akparawa emi ediwak ini ẹnyụn̄ ẹwụt enye nte enye ekemede ndikpep n̄wed emi ke idemesie. Mmọ ẹma ẹwụt enye n̄ko nte enye ekemede ndikot mme itie N̄wed Abasi oro ẹdude ke n̄wed oro ẹnyụn̄ ẹdọhọ enye ewet mme akpan n̄kpọ oro enye ekpepde ke mben n̄wed esie.

Enem didie ntem ndifiọk ke idem ke mme isuo emi ẹdude ata nsannsan, emi ekebe ndise, ekebe ukopikọ, n̄wedmbụk n̄kpọntịbe, m̀mê Intanet mîdụhe, ke n̄wed nnyịn ke an̄wam mme owo ẹkpep akpanikọ ke usem emana mmọ!

Itiat Ikan̄ Ita, Ntak Ita

Anna ama ebe isua 20 okonyụn̄ edi asuanetop oro mînaha baptism ke ini ekọn̄ mbio obio Bougainville ekenen̄erede ọsọn̄ ubọk ke Papua New Guinea. Ke 1991, enye ama esịne ke otu Mme Ntiense emi ẹkedide ikpọ owo itiokiet, nditọwọn̄ itiaba ke Esop Arawa, emi ẹkenyịkde ẹfen̄e ẹdọn̄ọ ikọt ye n̄kpọ ifan̄ kpọt. Ke ofụri isua iba, mmọ ẹkedụn̄ọ ke ntan̄wan̄ ufọk, ẹkesinyụn̄ ẹdụk ikọt ẹkeyom se ẹdidiade. N̄wed iba kpọt oro mmọ ẹkenyenede ke ẹkesida ẹnịm mme mbono esop, oro edi, Bible Anna ye n̄wed Ndidiana Kiet ke Utuakibuot Ata Abasi Kierakiet. Mmọ ẹma ẹsibọn̄ akam, ẹkwọ ikwọ Obio Ubọn̄, ẹnyụn̄ ẹkwọrọ ikọ ẹnọ mbon oro mmọ ẹkesobode.

Mbonekọn̄ oro ẹken̄wanade ye ukara ẹma ẹkụt mmọ ẹnyụn̄ ẹyom ndida nditọete iren iba ke otu mmọ nsịn ke ekọn̄. Nte ededi, mmọ ẹma ẹkpono Mme Ntiense sia mmọ ẹkedade san̄asan̄a. Isan̄ kiet, owoekọn̄ ama owụt Anna itiat ikan̄ ita onyụn̄ ọdọhọ enye ete: “Nyịme ndidọ mi mîdịghe mmọn̄ n̄wot fi.” Anna ama ọnọ enye ntak ita emi imọ mîdidọhọ enye—ntak kiet ke itiat ikan̄ kiet—ata akpan ntak ekedi nte ke Bible ọdọhọ ẹdọ ndọ “ke Ọbọn̄ ikpọn̄-ikpọn̄.” (1 Cor. 7:39) Owoekọn̄ oro ama ọwọn̄ọde iso asan̄a adaha.

Ke 2012, ke ama okokop ke ẹnen̄ede ẹyom mme asuanetop Obio Ubọn̄ ke Arawa, Anna emi edide asiakusụn̄ ofụri ini idahaemi, ama asan̄a ye eyenete an̄wan en̄wen afiak aka do man akan̄wam ọtọn̄ọ ekpri otu do. Ẹma ẹbụp enye m̀mê ifịnake enye ndifiak n̄ka ebiet emi enye ọkọbọde ufen okonyụn̄ okụtde nte ẹwotde owo ntịme ntịme ke ini ekọn̄. Enye ama ọbọrọ ete: “Akakam enenem mi ndifiak ndi mi. N̄kpọ ndomokiet ikemeke ndikpan utom Jehovah, ọkpọkọm ekọn̄ mbio obio.”