Nyene Uko Nyụn̄ Sọn̄ọ Da Nte Benaiah

Benaiah ekedi owo-ekọn̄ emi ekenyenede uko. Enye ama esin̄wana ọnọ Edidem David ye Edidem Solomon. Benaiah ekedi eyen oku, mme oku ikesinyụn̄ idịghe mbon emi ẹn̄wanade ekọn̄ edi Benaiah ama esitiene an̄wana ekọn̄ Jehovah. Enye ama enyene uko eti-eti. Ke uwụtn̄kpọ, enye ama owot ekpe ke esịt obube mmọn̄ onyụn̄ owot ata anyan owo-ekọn̄ emi akakamade n̄kpọ-ekọn̄. David ama enen̄ede eberi edem ke Benaiah tutu emek enye etubom mbon ukpeme esie.​—2 Sam. 23:20-23.

Benaiah ama aka iso ọsọn̄ọ ada ye David ini emi Absalom ye Adonijah ẹkesọn̄de ibuot. (2 Sam. 8:18; 15:18; 1 Ndi. 1:8) Ke ini emi David ọkọsọn̄de, Benaiah ama etiene an̄wam yak ẹmek Solomon edidem. (1 Ndi. 1:32-40) Benaiah ama ọsọn̄ọ ada ye Jehovah ye mbon emi Jehovah emekde, idem ke ini mbon en̄wen mîkanamke ntre.

Oyom nnyịn n̄ko inyene uko man ikeme ndin̄wana ye Satan asua nnyịn emi okopde odudu ye mbon emi ẹdade ye enye. Ndien akpana ibiere ndika iso ndu uwem nte Jehovah oyomde ẹdu. (Eph. 6:11; 1 Pet. 5:8, 9) Idem ekpededi ndusụk owo ẹmek ndikpọn̄ Jehovah, ẹyak nnyịn isọn̄ọ ida ye enye inyụn̄ inịm ke enye ọyọdiọn̄ nnyịn.​—2 Sam. 22:26.