Domo Ndikụt Se Iketịbede ke Mme Mbụk Bible

Ediwak mbụkeset emi ẹkemede ndikpep nnyịn mme akpan n̄kpọ ẹdọdọn̄ọ ẹyọhọ Bible. Edieke idomode ndikụt se iketịbede ke mme mbụk oro, se ikotde eyenen̄ede an̄wan̄a nnyịn, iyonyụn̄ itetịm idia ufọn. Se n̄kpọ ifan̄ emi ẹkemede ndin̄wam fi okokụt se okotde ke mme mbụk Bible mi.

• Kot yak uyo ọwọrọ. Edieke okotde Bible uyo ọwọrọ, enye oro ekeme ndin̄wam fi etetịm okụt se iketịbede ke mbụk oro. Ke ini ẹkotde Bible nte ubon, man etie mbufo nte ke ẹma ẹdu ini n̄kpọ oro eketịbede, emekeme ndidọhọ yak owo kiet kiet okot uyo nsio nsio owo ke mbụk oro.

• Domo ndikụt nsio nsio n̄kpọ emi ẹketịbede. Domo ndidiọn̄ọ se mbon emi afo okotde aban̄a do ẹkekerede ye nte eketiede mmọ ke idem. Ke uwụtn̄kpọ, bụp idemfo: ‘Nso ikanam owo oro etịn̄ ikọ ntre m̀mê anam n̄kpọ ntre? Ekpedi ami ke utọ n̄kpọ oro eketịbe ọnọ, nso ke n̄kpekekere, okpokonyụn̄ etie mi didie ke idem?’

• Domo ndidrọ se itịbede ke mbụk emi okotde do. Ama odomo ndidrọ nsio nsio n̄kpọ emi ẹketịbede ke mme mbụk ke Bible, ekpededi unen̄ekede udiọn̄ọ ndidrọ n̄kpọ, enye oro ekeme ndin̄wam fi ekeme ndikụt se idude ke mme mbụk oro onyụn̄ esiti.