Domo Ndikpep Mbufa N̄kpọ Ini Ekpepde Ikọ Abasi

Ima iyom ndikpep Ikọ Abasi, imekeme ndibụp idem nnyịn ite, ‘Nso ke ndori enyịn ndikpep nto se nyomde ndikpep emi?’ Edi ana ikpeme man se ikerede ndikpep idikịm nnyịn enyịn, nnyịn ikwe mbufa n̄kpọ emi Jehovah oyomde ikpep. Ikpanam nso man ikeme ndidomo ndikpep mbufa n̄kpọ ima ikpep Ikọ Abasi?

Bọn̄ akam ben̄e Abasi ọniọn̄. Dọhọ Jehovah an̄wam fi, atat fi enyịn okụt se enye oyomde fi ekpep ke ebe oro. (Jas. 1:5) Kûsịn ekikere kpọt ke se ama ọkọdọdiọn̄ọ.​—N̄ke 3:5, 6.

Yak odudu emi odude ke Ikọ Abasi okpụhọde fi. “Ikọ Abasi enyene uwem.” (Heb. 4:12) “Ikọ” Abasi emi edide odu-uwem ikọ ekeme ndikpụhọde nnyịn ini ekededi emi ikpepde Bible. Edi editịbe ntre n̄kukụre edieke itatde esịt nnyịn inyịme se ikpepde ke Ikọ Abasi.

Ma kpukpru se Jehovah adade ekpep nnyịn n̄kpọ. Ikọ Abasi emi Jehovah ekpepde nnyịn etie nte “usọrọ udia emi enyenede isek.” (Isa. 25:6) Kûdọhọ ke imọ ididiaha enye emi m̀mê enye oko, ke etie nte idinemke imọ. Ama adia kpukpru se Jehovah ọnọde nnyịn, ayadia ufọn etieti, oyonyụn̄ enem fi!