Nịm ke Jehovah Ayanyan̄a Nnyịn Ini Enye Edisobode Idiọk Ererimbot Emi

Ke mîbịghike, Jehovah idimehe aba se mme owo ẹnamde ke idiọk ererimbot emi. Ẹyesobo mme nsunsu ufọkabasi, mme idụt ẹyediana kiet ẹdi en̄wan ye ikọt Abasi, ndien Jehovah oyosobo ndiọi owo ke Armageddon. Mme Christian ẹtetie ẹbet ndikụt nte mme n̄kpọ emi ẹtịbede.

Nnyịn idiọn̄ọke kpukpru se iditịbede ke ini akwa ukụt. Ke uwụtn̄kpọ, nnyịn idiọn̄ọke ata nnennen ini emi akwa ukụt editọn̄ọde. Nnyịn idiọn̄ọke se idinamde ukara ẹtọn̄ọ en̄wan ye mme nsunsu ufọkabasi. Nnyịn idiọn̄ọke nte en̄wan emi ukara ẹdin̄wanade ye ikọt Abasi edibịghide iketre ye nte n̄kpọ editiede. Nnyịn inyụn̄ idiọn̄ọke ata akpan n̄kpọ emi Abasi edidade isobo mme idiọkowo ke ekọn̄ Armageddon.

Edi, Bible etịn̄ se idin̄wamde nnyịn inyene uko iyọ kpukpru se iditịbede. Ke uwụtn̄kpọ, imọdiọn̄ọ ke idu uwem ke utịt “mme akpatre usen.” (2Ti 3:1) Imọdiọn̄ọ ke Jehovah idiyakke ukara ẹn̄wana ye nsunsu ufọkabasi ebịghi, man owo ididue isobo ata mme Christian. (Mt 24:22) Nnyịn imọdiọn̄ọ ke Jehovah ayanyan̄a ikọt esie. (2Pe 2:9) Imonyụn̄ idiọn̄ọ ke Jesus emi Jehovah emekde ndida nsobo mme idiọkowo nnyụn̄ nnyan̄a ikọt esie ke Armageddon, okop odudu onyụn̄ ọfọn ama.​—Edi 19:11, 15, 16.

Mme n̄kpọ emi ẹditịbede ke ini iso ayanam “idem eyemede” mme owo. Edi, edieke ikotde inyụn̄ itiede ikere nte Jehovah ekesinyan̄ade ikọt esie ke eset, ye se enye aduakde ndinam ke ini iso, ndịk idinamke nnyịn sia imọdiọn̄ọ ke ‘edinyan̄a nnyịn ke asan̄a ekpere.’​—Lu 21:26, 28.