Usụn̄ Ita Emi Ikpowụtde ke Imọbuọt Idem ye Jehovah

David ama akan Goliath ke ntak emi enye ọkọbuọtde idem ye Jehovah. (1Sa 17:45) Jehovah oyom ndida odudu esie n̄n̄wam kpukpru mme asan̄autom esie. (2Ch 16:9) Didie ke ikeme ndiwụt ke imoyom Jehovah an̄wam nnyịn utu ke ndiberi edem ke ifiọk idem nnyịn m̀mê ke odudu nnyịn? Yak ineme usụn̄ ita emi ikpanamde oro:

• Sibọn̄ akam kpukpru ini. Sibọn̄ akam ben̄e Jehovah efen ọnọ fi ke idiọkn̄kpọ oro akanamde, onyụn̄ an̄wam fi ke ini ẹdomode fi. (Mt 6:​12, 13) Bọn̄ akam ben̄e Jehovah ọnọ fi ọniọn̄ ye ifiọk man ekeme ndibiere n̄kpọ ọfọn, onyụn̄ an̄wam fi ekeme ndinam se ekebierede.​—Jas 1:5

• Sikot Bible nyụn̄ kpep n̄kpọ. Sikot Bible kpukpru usen. (Ps 1:2) Kpep ban̄a mbon oro ẹtịn̄de ẹban̄a ke Bible, nyụn̄ da se ekpepde du uwem. (Jas 1:​23-25) Siben̄e idem mbemiso akade ukwọrọikọ utu ke ndikere ke ọmọdọdiọn̄ọ se editịn̄de. Ben̄e idem n̄ko nọ mbono esop man se ẹdinemede enen̄ede an̄wan̄a fi

• Sinam se esop Jehovah ẹdọhọde. Diọn̄ọ nte esop Abasi ẹdọhọde inam n̄kpọ idahaemi nyụn̄ sọsọp nam se ẹdọhọde. (Nu 9:17) Nen̄ede kpan̄ utọn̄ ke ini mbiowo ẹnọde fi item m̀mê ẹtemede fi se akpanamde.​—Heb 13:17

ẸSE VIDIO ORO NTAK NNYỊN MÎKPAYAKKE NDỊK ANAM NNYỊN KE INI ẸKỌBỌDE NNYỊN, EKEM ẸBỌRỌ MME MBỤME EMI:

• Nso ikanam nditọete oro ndịk?

• Nso ikan̄wam mmọ ẹkûyak ndịk anam idem emem mmọ?