“Ẹnyene Ima Ẹnọ Ofụri Otu Nditọete”

Ibuotikọ emi edi ikọ Bible. Ẹkewet enye n̄kpọ nte isua 2,000 emi ẹkebede. (1 Pet. 2:17) Edi idahaemi ke oyom nnyịn inanam ikọ emi ikan! Sia nditọete nnyịn ẹdude ke ofụri ererimbot, nnyịn idisan̄a didie ima kpukpru mmọ? N̄ko ke ererimbot emi mme owo mînyeneke ima mi, nso ke ikpanam mbak ima nnyịn edibịt? (Matt. 24:12) Se m̀mê emekeme ndibọrọ mme mbụme oro ẹtienede mi ke ama ekese vidio Ofụri Otu Nditọete Nnyịn. Ka jw.org/efi nyụn̄ se ke SE ẸDỌN̄DE > MME VIDIO.

(1) Ini ewe ke ikodụk otu nditọete ofụri ererimbot emi? (2) Nso n̄kpọ ita emi nditọete nnyịn ke ofụri ererimbot ẹsinamde ke nnyịn itiene inam? (3) Didie ke nditọete nnyịn ẹbiere ndika iso n̄kwọrọ ikọ ke (a) desat Alaska, (b) ikpọ esụkmbehe Europe, ye (c) nsesịre akai Peru? (4) Ntak emi nnyịn mîkpekereke ke ndikwọrọ ikọ onyụn̄ edi ndinam se ẹdọhọde inam? (5) Tịn̄ nte Mme Ntiense Jehovah ẹken̄wamde ẹnyụn̄ ẹdọn̄de nditọete mmọ esịt ke ini (a) unyekisọn̄, (b) akwa oyobio, ye (c) ekọn̄. (6) Didie ke kpukpru nnyịn ikeme ndiwụt ke imenyene ima oro ẹdade ẹdiọn̄ọ mme Christian? (John 13:35) (7) Ke ini idianade kiet ibọp Ufọkmbono Obio Ubọn̄ nnyịn, nso ufọn ke isinyene? (8) Ke ini ẹkekpande utom nnyịn ke Edem Usiahautịn Europe ye Russia, didie ke nditọete nnyịn do ẹkesikwọrọ ikọ, ẹdụk mbono esop, ẹnyụn̄ ẹnyene n̄wed ndida n̄kpep n̄kpọ? (9) Nso ukeme ke ediwak nditọete nnyịn ẹsisịn man ẹdụk akamba mbono ke ebiet emi enen̄erede oyom usụn̄? Ndien ntak emi mmọ ẹsinamde oro? (10) Didie ke vidio emi anam enen̄ede ọdọn̄ fi (a) ndidiana kiet ye nditọete fo ntoro Jehovah ke mme mbono esop Christian, (b) ndin̄wam mme owo ke ini afanikọn̄, ye (c) ndisịn ofụri ukeme fo n̄kwọrọ ikọ ini ekededi ye nte ekekeme? (11) Didie ke ikeme ndida vidio emi n̄kwọrọ ikọ?

Ima oro imade Jehovah edi akpan ntak oro anamde idi ubak otu nditọete Christian emi. Ntre esinenem nnyịn ndikpep n̄kpọ mban̄a enye nnyụn̄ n̄kpep mbon en̄wen n̄kpọ mban̄a enye. Imonyụn̄ ima mbon oro Jehovah amade. Ke ini in̄wamde mmọ ke ini unana, nnyịn iyomke Abasi ọkọm nnyịn. Utu ke oro, nnyịn ikam ikọm enye koro nditọete oro Jehovah ọnọde nnyịn mi ẹdi ata eti enọ. Nte mme akpatre usen ererimbot usua emi ẹsan̄ade ẹsịm utịt, nnyịn ikpakam ika iso ndiwụt ima oro inyenede inọ ofụri otu nditọete!