Ekebe Mbụme

◼ Nso ke ana nditọwọn̄ ẹkpep man mmọ ẹkọri ẹsịm ọyọho idaha ke n̄kan̄ eke spirit?

Mme ete ye eka emi ẹdide Christian ẹsikama nditọ mmọ ke “ntụnọ ye ke item Jehovah.” (Eph. 6:4) Ke uwụtn̄kpọ, mme ete ye eka ẹsikụt ke ọfọn ndineme itie N̄wed Abasi eke usen ke usen ye nditọ mmọ kpukpru usenubọk. Ke ini utuakibuot ubon ye ke mme ini en̄wen, ediwak ubon ẹkeme nditie ọtọkiet nse vidio nnyụn̄ nneme se mmọ ẹkụtde, ẹneme mme akpan n̄kpọ ke n̄wed N̄kparawa Owo Ẹbụp, ẹfiak ẹnam mme mbụk Bible ẹwụt, mîdịghe ẹnam se mmọ ẹkerede ke ekeme nditịbe ẹwụt. Edi man nditọ oro ‘ẹkọri ẹsịm ọyọhọ idaha,’ ẹnyene ndikpep mmọ ntotụn̄ọ akpanikọ Bible.—Heb. 6:1.

Kere se isikpepde mbon oro isikade ikọkwọrọ ikọ inọ. Imesidomo ndida n̄wed Nso ke Bible Enen̄ede Ekpep? ntọn̄ọ ukpepn̄kpọ Bible ke akpa ini oro iwahade m̀mê ke ini oro ifiakde ika. Ima ikpep n̄wed oro ima imesikpep mmọ “Ẹnịm Idem Mbufo ke Ima Abasi.” Ntak-a? N̄wed Bible Ekpep anam eyen ukpepn̄kpọ ọfiọk se isịnede ke Bible. Edi n̄wed “Ima Abasi” ekpep mmọ nte ẹkpedade mme edumbet Bible ẹsịn ke edinam ke ofụri ikpehe uwem mmọ. Ndikpep mbufa owo n̄wed iba emi an̄wam mmọ ẹkebade “ẹdọn̄ n̄kam” ke Christ ẹnyụn̄ “ẹsọn̄ọ ẹda ke mbuọtidem.” (Col. 2:6, 7) Ndi n̄wed emi ikpenyeneke ufọn inọ nditọ nnyịn n̄ko? Oyom ẹkpep mmọ n̄ko ẹban̄a ufak, Obio Ubọn̄, ye idaha mme akpan̄kpa. Oyom nditọwọn̄ n̄ko ẹdiọn̄ọ ntak emi Abasi ayakde mme owo ẹbọ ufen ye se ẹkpedade ẹdiọn̄ọ mme akpatre usen editịm n̄kpọ emi. Ana mmọ ẹnen̄ede ẹnịm nte ke Mme Ntiense Jehovah ẹkpep akpanikọ Bible. Oyom n̄kpri owo ẹdiọn̄ọ mme edumbet Bible ẹnyụn̄ ẹdiọn̄ọ nte ẹkpenọde “ukeme ufiọkn̄kpọ mmọ ukpep.” (Heb. 5:14) Edi akpanikọ nte ke ana mme ete ye eka ẹkere ẹban̄a isua emana nditọ mmọ ye se ikemede ndin̄wan̄a mmọ. Edi ediwak nditọ ẹkeme nditọn̄ọ n̄kpep ntotụn̄ọ akpanikọ Bible idem ke ini mmọ ẹdide ata n̄kpri.—Luke 2:42, 46, 47.