Obufa Vidio Ndida Ntọn̄ọ Ukpepn̄kpọ Bible
Ata ediwak owo ẹsika jw.org ẹkese ekpri vidio emi ibuotikọ edide Ntak Emi Ekpekpepde Bible? Ẹnam vidio emi man an̄wam mbon oro ẹnyenede udọn̄ ẹnyịme ukpepn̄kpọ Bible oro isikpepde mme owo ke mfọn. Ẹkeme ndikụt ebiet emi ke ndika isọn̄ isọn̄ akpa page n̄kefịk “N̄kpama Edikpep Mi Bible,” mîdịghe ẹda code emi odude ke edem mbufa tract kiet kiet ẹdụk. Ndusụk usụn̄ oro ikemede ndida vidio emi nnam n̄kpọ ẹdi emi:
Ke ini anamde mfiakn̄ka, bụp enyeneufọk ete: “Ndi akpama ndise vidio oro owụtde nte Bible ekemede ndibọrọ mme mbụme fo?” Edieke enye enyịmede, da n̄kpọ oro afo esikamade odụk Intanet, mîdịghe da kọmputa esie wụt enye vidio oro.
Edieke inịmde kiet ke otu mbufa tract oro ye owo ke ini inamde ukwọrọikọ ido nneme m̀mê an̄wan̄wa unọ ikọ ntiense, wụt enye code emi odude ke edem tract oro nyụn̄ dọhọ enye ada n̄kpọ emi enye esidade odụk Intanet odụk. Sia edide ke ediwak usem code emi esida owo nnennen nnennen aka vidio emi ke ikpehe Intanet nnyịn, afo emekeme ndida n̄kpọ oro afo esidade odụk Intanet ebre vidio emi owụt enyeneufọk.
Sian mbon itieutom mbufo, nditọ ufọkn̄wed mbufo, mme iman fo, ye mme ọdiọn̄ọ fo, nyụn̄ wụt mmọ vidio emi. Mîdịghe wet nte ẹkemede ndikụt vidio emi ke Intanet nọ ẹsọk mmọ ke e-mail fo, nyụn̄ dọhọ mmọ ẹse ke ini idemmọ.
Edieke iwụtde mme owo obufa video emi, nnyịn imekeme nditọn̄ọ ukpepn̄kpọ Bible efen efen, inyụn̄ in̄wam ‘mbon oro ẹnyenede eti esịt oro ẹdinamde ẹnyene nsinsi uwem.’—Utom 13:48.