“Ẹnyene Ima Ẹnọ Ofụri Otu Nditọete”
Ẹkewet ikọ eke odudu spirit oro ẹdade ibuotikọ emi ẹto ke n̄kpọ nte isua 2,000 emi ẹkebede. (1 Pet. 2:17) Edi oyom nnyịn inanam ikọ emi idahaemi ikan nte akanam edide! Didie ke ikeme ndima nditọete oro ẹwakde ntem ke ofụri ererimbot? Ke ererimbot usua emi, ikpanam nso mbak ima nnyịn edibịt? (Matt. 24:12) Se m̀mê emekeme ndibọrọ mme mbụme oro ẹtienede mi ke adan̄aemi esede vidio Ofụri Otu Nditọete Nnyịn.
(1) Ini ewe ke ikakabade idi ubak otu nditọete Christian emi? (2) Nso edinam ita ke itiene nditọete nnyịn ke ofụri ererimbot inam? (3) Didie ke nditọete nnyịn ẹnam n̄kpọ ndiwụt ubiere mmọ ndika iso n̄kwọrọ ikọ ke (a) wilderness Alaska, (b) akwa esụkmbehe Europe, ye (c) nsesịre akai ikọt Peru? (4) Ntak emi nnyịn mîkpekereke ke ukwọrọikọ onyụn̄ edi utom oro anade inam? (5) Nọ mme uwụtn̄kpọ ndiwụt nte Mme Ntiense Jehovah ẹken̄wamde ẹnyụn̄ ẹdọn̄de kiet eken esịt ke (a) unyekisọn̄, (b) akwa oyobio, ye (c) ekọn̄ ẹma ẹketre? (6) Ke mme usụn̄ ewe ke kpukpru nnyịn ikeme ndiwụt ke imenyene n̄kpọ oro ẹdade ẹdiọn̄ọ mme Christian? (John 13:35) (7) Mme ufọn ewe ke isibọ ke ndidiana kiet mbọp mme Ufọkmbono Obio Ubọn̄ nnyịn? (8) Didie ke nditọete nnyịn ke Edem Usiahautịn Europe ye Russia ẹkesinyene udia eke spirit ke ini ẹkekpande utom mmọ? (9) Nso n̄wọrọnda ukeme ke ediwak Mme Ntiense ẹkesisịn man ẹdụk mme mbono district, ndien ntak-a? (10) Didie ke vidio emi ọsọn̄ọ ubiere fo (a) ndidiana kiet ye nditọete fo ntuak ibuot nnọ Jehovah ke mme mbono esop Christian, (b) ndin̄wam mme owo ke ini afanikọn̄, ye (c) ndisọn̄ọ nda n̄kwọrọ ikọ ini ekededi ye nte ekekeme? (11) Ini ewe, ndien didie ke ikeme ndiwụt mme owo vidio emi ke an̄wautom?
Ima oro imade Jehovah edi akpan ntak oro anamde idi ubak otu nditọete Christian emi. Ntre nnyịn imama ndikpep n̄kpọ mban̄a enye nnyụn̄ n̄kpep mbon en̄wen n̄kpọ mban̄a enye. Imonyụn̄ ima mbon oro Jehovah amade. Ke ini in̄wamde mmọ ke ini unana, nnyịn iyomke Abasi ọkọm nnyịn, utu ke oro, nnyịn ikam ikọm enye koro nditọete oro Jehovah ọnọde nnyịn mi ẹdi ata eti enọ. Nte mme akpatre usen ererimbot usua emi ẹsan̄ade ẹsịm utịt, nnyịn ikpakam ika iso ndiwụt ima oro inyenede inọ ofụri otu nditọete!