Ekebe Mbụme

◼ Edumbet Bible ewe ke ikpetiene ke ini ikamade fon ika mme mbono esop ye an̄wautom?

“Ẹmenịm Ini Ẹnọ Kpukpru N̄kpọ” (Eccl. 3:1): Imekeme ndida fon nnọ owo etop mîdịghe itịn̄ ikọ ye owo ini ekededi. Edi odu mme ini emi mme Christian mîkpayakke fon mmọ ọwọn̄ọde mmọ ntịn̄enyịn. Ke uwụtn̄kpọ, isika mbono esop man ikatuak ibuot inọ Jehovah, ibọ ukpep ke Ikọ Abasi, ibọ nsịnudọn̄, inyụn̄ isịn udọn̄ inọ kiet eken. (Deut. 31:12; Ps. 22:22; Rome 1:11, 12) Ndi imekeme ndinịme fon nnyịn ke ini isịmde Ufọkmbono Obio Ubọn̄ inyụn̄ ikot etop oro ibọde ke mbono esop ama akasuana? Edieke nnyịn mîkemeke ndinịme fon nnyịn ke ntak emi idoride enyịn ke ẹyekot nnyịn ke ini mbabuat n̄kpọntịbe, imekeme ndisụhọde uyo mbak enye editịmede mbon en̄wen.

‘Nam Kpukpru N̄kpọ Kaban̄a Eti Mbụk’ (1 Cor. 9:23): Ndusụk ini imesinyene eti ntak ndikama fon n̄ka ukwọrọikọ. Ke uwụtn̄kpọ, eyenete emi adade usụn̄ ke an̄wautom ekeme ndida fon n̄kot mbon eken emi ẹkwọrọde ikọ ke efakutom en̄wen. Ndusụk ini, mme asuanetop ẹsida fon ẹkot owo emi enyenede udọn̄ m̀mê eyen ukpepn̄kpọ mmọ mbemiso ẹkade ẹbịne enye, akpan akpan edieke ebiet oro enye odude oyomde usụn̄. Edieke ikamade fon, ana ikpeme mbak enye editịmede nnyịn ke ini inemede nneme ye enyeneufọk. (2 Cor. 6:3) Ke adan̄aemi ibetde mme asuanetop eken, ọkpọfọn ikere iban̄a utom ukwọrọikọ ye mbon oro isan̄ade kiet utu ke ndida ini oro n̄kot ufan nnyịn m̀mê ndinọ mmọ etop.

Kere Ban̄a Mbon En̄wen (1 Cor. 10:24; Phil. 2:4): Ọkpọfọn isibak idi mbono an̄wautom utu ke ndidi ke idiọk ini sia ikerede ke imekeme ndikot owo mîdịghe inọ enye etop ini ekededi man ifiọk ebiet emi otu an̄wautom nnyịn ẹkwọrọde ikọ. Edieke idide ke idiọk ini, ẹsiwak ndikpụhọde ndutịm oro ẹkenamde. Imọfiọk ke ndusụk ini, n̄kpọ ekeme nditịbe emi anamde nnyịn ika n̄kpọ ke idiọk ini. Edi edieke inamde edi ido nnyịn ndisika n̄kpọ ke ini, nnyịn iwụt ke imokpono ndutịm oro Jehovah anamde, ikere iban̄a eyenete oro adade usụn̄, ye mme asuanetop eken.