Ekebe Mbụme
◼ Nso ke ikpenyene ke ekikere edieke iyomde esop Jehovah ada ndusụk m̀mê ofụri inyene nnyịn ke ikpade?
Ke ini mme owo ẹkpade, inyene mmọ isịneke mmọ aba ke ubọk. (Eccl. 9:5, 6) Ntre ediwak owo ẹsinam n̄wed nte ekemde ye ibet, emi anamde an̄wan̄a nte mmọ ẹkpeyomde ẹdeme m̀mê ẹse ẹban̄a inyene mmọ, mbemiso mmọ ẹkpade. (2 Ndi. 20:1) Nte ido edide, n̄wed emi esiwụt n̄ko owo emi ẹdọhọde ese aban̄a m̀mê edeme inyene oro. Ke ediwak idụt, ukara ẹsibiere nte ẹdidemede inyene akpan̄kpa edieke owo mîkanamke n̄wed. Mmọdo, edieke inyenede san̄asan̄a n̄kpọ oro iyomde ẹnam ye inyene nnyịn, utọ nte esop Jehovah ndida ndusụk m̀mê ofụri inyene nnyịn, oyom inam n̄wed oro ekemde ye ibet emi owụtde nte edinamde emi inyụn̄ itịn̄ enyịn imek owo oro iyomde ese aban̄a m̀mê edeme inyene nnyịn.
Owo oro edisede aban̄a m̀mê edeme inyene emi enyene akamba mbiomo. Etiene nte inyene awakde, nditịm nnyụn̄ ndeme mmọ ekeme ndisịne utom nnyụn̄ nda ini. Ke adianade do, ukara ẹsinyene mme ndausụn̄ oro anade ẹtiene. Idịghe kpukpru owo ke esop ẹdot ndidi mme andise mban̄a m̀mê mme edeme-inyene. Owo oro imekde ekpenyene ndidi owo emi idiọn̄ọde ite ke odot, edi se ẹkemede ndiberi edem, onyụn̄ enyịme ndinam se iyomde.—Se ibuotikọ oro “The Wisdom and Benefits of Estate Planning,” ke nsiondi Awake! eke December 8, 1998.
Edieke Owo Ọdọhọde Fi Ese Aban̄a M̀mê Edeme Inyene Imọ: Edieke owo ọdọhọde m̀mê akpama ndise mban̄a inyene imọ ke ima ikpa, kụt ete ke emebem iso abat se iditakde onyụn̄ ọbọn̄ akam aban̄a n̄kpọ emi man ese m̀mê eyekeme ndinam. (Luke 14:28-32) Owo oro ama akpa, oyom afo anam kpukpru mbon oro ẹdidiade ufọn inyene oro ẹdiọn̄ọ ẹban̄a. Ndien ama ekem ini ndideme inyene emi, afo enyene ndideme enye nte ibet enyịmede ye nte ẹtemede ke n̄wed oro akpan̄kpa akanamde. Owo oro esede aban̄a m̀mê edemede inyene ekpenyene ndifiọk nte ke imọ inyeneke ndifụmi n̄kpọ ndomokiet oro ẹkewetde ke n̄wed, edide inyene oro awak m̀mê iwakke. Enọ ekededi oro ẹnọde n̄ka oro ibet enyịmede emi Mme Ntiense Jehovah ẹdade ẹnam n̄kpọ edi enọ oro ẹnọde Abasi onyụn̄ enyene esop Jehovah.—Luke 16:10; 21:1-4.