Nnyịn Ikwọkwọrọ Ikọ Kpukpru Ini
1. Isan̄a didie ifiọk ke mme ọkwọrọ eti mbụk akpa isua ikie ẹkesikwọkwọrọ ikọ kpukpru ini?
1 Ifịk ifịk mme ọkwọrọ eti mbụk akpa isua ikie ẹma ẹsitan̄a eti mbụk ke ebiet ekededi oro mmọ ẹkekụtde mme owo “ye unana edikpa mba.” (Utom 5:42) Ọsọsọn̄ ndikere ke mmọ ikesikwọrọke ikọ inọ mbon oro mmọ ẹkesikụtde ke usụn̄ ke ini mmọ ẹnamde utom eke ufọk ke ufọk. Mmọ ẹma ẹsida ifet oro ẹkebererede ke ẹma ẹkekụre utom eke ufọk ke ufọk ẹnọ ikọ ntiense ido nneme ke ini mmọ ẹdepde n̄kpọ ke urua. Ukem nte Jesus, mmọ ẹkesikwọkwọrọ ikọ kpukpru ini.—Mark 6:31-34.
2. Nso ke ndikere Mme Ntiense Jehovah abuana?
2 Ben̄e Idem Kpukpru Ini: Enyịn̄ nnyịn, Mme Ntiense Jehovah, inamke ẹdiọn̄ọ sụk se nnyịn inamde, edi anam ẹdiọn̄ọ n̄ko owo emi nnyịn idide. (Isa. 43:10-12) Ntre nnyịn imesiben̄e idem kpukpru ini nditịn̄ mban̄a idotenyịn nnyịn, idem ke ini nnyịn mîkwọrọke ikọ ke ufọk ke ufọk. (1 Pet. 3:15) Ndi emesikere aban̄a mme idaha oro afo ekemede ndinọ ikọ ntiense ido nneme ye se afo ekemede nditịn̄? Ndi emesikama mme n̄wed man ọnọ mbon oro ẹnyenede udọn̄? (N̄ke 21:5) Ndi esikwọrọ ikọ ke ufọk ke ufọk kpọt, mîdịghe ndi emesitan̄a eti mbụk ọnọ mme owo ke mme ebiet efen n̄ko edieke mme idaha fo ẹyakde?
3. Ntak emi enende ndikot edikwọrọ ikọ ke efak, ke mme itie ubon moto, ke mme itie unọ idem nduọkodudu, ke mme itie mbubehe, ye ntre ntre eken “an̄wan̄wa” unọ ikọ ntiense?
3 “An̄wan̄wa” Unọ Ikọ Ntiense: Nso idi nnennen usụn̄ ndikot edikwọrọ ikọ ke efak, ke mme itie ubon moto, ke mme itie unọ idem nduọkodudu, ke mme itie mbubehe, ye ntre ntre eken? Apostle Paul ọkọdọhọ ke imọ ima ikwọrọ ikọ “an̄wan̄wa” ye ke ufọk ke ufọk. (Utom 20:20) Mmọdo, “an̄wan̄wa” unọ ikọ ntiense edi nnennen usụn̄ ndikot edikwọrọ ikọ ke efak, ke mme itie ubon moto, ke mme itie unọ idem nduọkodudu, ke mme itie mbubehe, ye ntre ntre eken. Edi akpanikọ ke utom ukwọrọikọ eke ufọk ke ufọk osụk edi ata akpan ye mfọnn̄kan usụn̄ ndida ntan̄a etop Obio Ubọn̄ nnọ mme owo. Nte ededi, mme ọkwọrọ eti mbụk akpa isua ikie ẹkewụk ntịn̄enyịn ke mme owo, idịghe ke mme ufọk. Mmọ ẹma ẹda kpukpru ifet ẹtịn̄ ẹban̄a akpanikọ—an̄wan̄wa, ke ido nneme, ye ke ufọk ke ufọk. Nnyịn ikpakam inam kpa ntre man inam utom nnyịn ọyọhọ ọyọhọ ima.—2 Tim. 4:5.