Ndi N̄wed Oro Odu ke Eti Idaha?

Ọfọn ibụp mbụme emi iban̄a n̄wed ekededi oro iyomde ndinọ owo. N̄wed ekededi oro en̄wịnede utọn̄, akpade mmọn̄, abaride, m̀mê awahade ayanam ẹtịn̄ idiọk ẹban̄a esop Abasi onyụn̄ ekeme ndinam enyeneufọk inyeneke udọn̄ ke etop uwem oro odude ke n̄wed oro.

Didie ke ikeme ndikama n̄wed nnyịn ediye ediye? Ndusụk owo ẹsidọn̄ nsio nsio n̄wed ke nsio nsio itie ke ekpat ukwọrọikọ mmọ. Ke uwụtn̄kpọ, mmọ ẹnyene itie emi ẹsidọn̄de mme n̄wed, mme magazine ye ndiye uduot n̄kpri n̄wed, mme tract, ye ntre ntre eken. Ini ekededi oro mmọ ẹyakde Bible mmọ ye n̄wed ekededi oro mmọ ẹkamade ẹsịn ke ekpat ukwọrọikọ mmọ, mmọ ẹsinam ntre sụn̄sụn̄ mbak ẹdiwaha m̀mê ẹdin̄wịne. Ndusụk mme asuanetop ẹsidọn̄ n̄wed mmọ ke efọk n̄wed m̀mê ke ekpat ọkpọ. Inamke n̄kpọ m̀mê nso usụn̄ ke ibiere ndikama n̄wed nnyịn, nnyịn iyomke owo ndomokiet enyene eti ntak ndikụt ndudue nnọ utom ukwọrọikọ nnyịn ke ntak emi inọde enye n̄wed oro owo mîkamake ọfọn.​—2 Cor. 6:3.