Ndi Emekeme Ndibuana ke An̄wautom ke Sunday?

1. Nso ke ikeme ndikpep nto se Paul ye mme nsan̄a esie ẹkenamde ke Philippi?

¹ Ekedi usen Sabbath, kpa usen emi ediwak mme Jew ke Philippi ẹsiduọkde odudu. Paul ye mme nsan̄a esie ẹkeka obio oro ke ini isan̄ isụn̄utom mmọ kiet. Idụhe owo ndomokiet oro akpakasuade ọnọ mmọ edieke mmọ ẹkpeketrede ukwọrọikọ ẹnyụn̄ ẹduọk odudu usen oro. Edi mmọ ẹma ẹfiọk ke mme Jew ẹsisop idem ke edem obio man ẹbọn̄ akam, ntre mmọ ẹma ẹda ifet oro ẹkwọrọ ikọ ẹnọ mmọ. Anaedi esịt ama enen̄ede enem Paul ye mme nsan̄a esie ke ini Lydia akakpan̄de utọn̄, ofụri mbonufọk esie ẹnyụn̄ ẹnade baptism! (Utom 16:13-15) Sia ediwak owo mfịn ẹsiduọkde odudu ke Sunday, ntak mûdaha ndusụk ini ke usen emi ukwọrọ ikọ unọ mmọ?

2. Mme n̄kpọ-ata ewe ke ikọt Jehovah ẹkekan man ẹkeme ndikwọrọ ikọ ifụre ifụre ke Sunday?

² Ukeme Oro Ẹkesịnde man Ẹkwọrọ Ikọ ke Sunday: Ke 1927, ẹma ẹsịn udọn̄ ẹnọ ikọt Jehovah ndisida ndusụk ini ke Sunday n̄kwọrọ ikọ. Ẹma ẹbiọn̄ọ mmọ ndondo oro mmọ ẹketọn̄ọde ndinam oro. Ẹma ẹmụm ediwak mmọ ke United States ẹte ke mmọ ẹbiat ibet Sabbath eke Sunday, ẹtịmede mme owo, ẹnyụn̄ ẹsan̄a ẹnyam n̄wed ke ini owo mînọhọ mmọ unyịme. Edi ikọt Jehovah iketreke ndikwọrọ ikọ. Ke mme iduọk isua 1930, mmọ ẹma ẹnam se ẹkotde “ubịnikọt mbahade otu,” emi mme asuanetop ke mme esop n̄kann̄kụk ẹsisopde idem ọtọkiet ẹkwọrọ ikọ ke efakutom kiet. Ndusụk ini oro ẹkesimụmde mme asuanetop, mmọ ẹma ẹsiwak tutu mbon ukara ikemeke ndinam mmọ n̄kpọ ndomokiet. Ndi afo emenen̄ede owụt esịtekọm aban̄a n̄waidem emi nditọete oro ẹkenamde man ikeme ndikwọrọ ikọ ifụre ifụre ke Sunday?

3. Nso inam Sunday edi ata eti usen ndikwọrọ ikọ?

³ Ata Eti Usen Ndikwọrọ Ikọ: Ediwak owo ẹsidu ke ufọk ke Sunday. Mmọ ẹsiwak ndinyene ini. Ndusụk mme aka ufọkabasi ẹkeme ndima ndineme mban̄a Abasi ke usen emi. Edieke isinyenede mbono esop ke Sunday, ọwọrọ ke imesesịne ọfọn̄ nte ikpesịnede ika ukwọrọikọ, ntre ntak mûtịmke idem man abuana ke an̄wautom mbemiso m̀mê ke mbono esop ama akasuana? Nam mfefere udia kama edieke oyomde anam ntre.

4. Nso idatesịt ke ikeme ndinyene edieke idade ndusụk ini ke Sunday ikwọrọ ikọ?

⁴ Edieke idade ndusụk ini ke Sunday ikwọrọ ikọ, iyosụk inyene ini ndiduọk odudu. Ndien nduọkodudu emi edisan̄a ye inemesịt oro inyenede ke ntak emi iketienede ibuana ke edisana utom. (N̄ke 19:23) Nnyịn iyokop idatesịt ndikeme ndikụt owo emi ebietde Lydia!