Obufa Ikpehe Ndida Ntọn̄ọ Ukpepn̄kpọ Bible
1. Ewe obufa ikpehe edidu ke Enyọn̄-Ukpeme eke Nsiondi Ofụri Owo, ndien ẹtịm enye man ẹda ẹnam nso?
1 Ọtọn̄ọde ke ọfiọn̄ efen, iyenyene obufa ikpehe ke Enyọn̄-Ukpeme eke Nsiondi Ofụri Owo ndin̄wam nnyịn itọn̄ọ ukpepn̄kpọ Bible. Ẹkot ikpehe emi “Kpep N̄kpọ To Ikọ Abasi.” Okposụkedi emi ndusụk owo ke efakutom nnyịn ẹdimade ndikot ikpehe emi, ẹkam ẹtịm enye man ẹda ẹnyene nneme ye enyeneufọk.
2. Nso idi ndusụk n̄kpọ oro ẹdude ke obufa ikpehe emi?
2 Se Idude ke Ikpehe Emi: Ẹwet ibuotikọ ye n̄kpri ibuotikọ esie nte mbụme emi ẹdibụpde enyeneufọk ke ini ẹnyenede nneme ye enye. Ẹsasiak mme akpan itie N̄wed Abasi ẹsịn, owo ikotke-kot isịn, man enyeneufọk ekeme ndikpep n̄kpọ nnennen nnennen nto N̄wed Abasi. Ẹnam mme ikpehe ekikere ẹdi mbio mbio man ẹkeme ndineme mmọ idem ke ini ẹdade ke enyịn̄usụn̄. Ibuotikọ ke nsiondi kiet kiet odụri ntịn̄enyịn aka n̄wed Bible Ekpep man an̄wam fi ọtọn̄ọ ukpepn̄kpọ Bible ke n̄wed emi, ke ini odotde ndinam ntre.
3. Ke ini ikwọrọde ikọ ke ufọk ke ufọk, didie ke ikpada ikpehe emi itọn̄ọ ukpepn̄kpọ Bible ke enyịnusụn̄?
3 Nte Ikpadade Enye Inam N̄kpọ: Ke ini ọnọde owo magazine, afo emekeme ndibụp enye edemede-owo-udọn̄ mbụme oro aban̄ade ibuotikọ ikpehe emi. Ke uwụtn̄kpọ, nsiondi eke January 1 eneme ufọn oro Bible enyenede. Afo emekeme ndibụp ete: “Ndi ada Bible nte Ikọ Abasi m̀mê ada enye nte eti n̄wed? [Bet ibọrọ.] Enyene inem inem ibuotikọ oro enemede n̄kpọ emi.” Wụt enye akpa mbụme, kot akpa ikpehe ekikere, nyụn̄ kot itie N̄wed Abasi oro ẹsiakde ẹsịn. Fiak bụp mbụme oro, nyụn̄ dọhọ enyeneufọk ọbọrọ. Neme ediwak mbụme nte odotde, adade mbụme kiet kiet nte ibuot nneme. Mbemiso ọnyọn̄de, dụri ntịn̄enyịn esie wụt mbụme oro etienede nyụn̄ nam eti ndutịm ndifiak n̄ka n̄keneme enye. Fiak ka kpukpru urua keneme n̄kpọ efen efen ke ibuotikọ oro tutu afo afiak ada nsiondi efen ọsọk enye. Usụn̄ efen edi nditọn̄ọ ukpepn̄kpọ Bible nnennen nnennen ye enyeneufọk. Da ibuotikọ oro odude ke ikpehe emi wụt enye nte isinịmde ukpepn̄kpọ Bible.
4. Didie ke ikpada obufa ikpehe emi inam n̄kpọ ke ini inamde mfiakn̄ka?
4 Afo emekeme n̄ko ndida obufa ikpehe emi nnam n̄kpọ uforo uforo ke mme afan̄ magazine fo ye ke ini anamde mme mfiakn̄ka. Emekeme ndidọhọ ete: “Enyene obufa ikpehe emi odude ke Enyọn̄-Ukpeme. Yak n̄wụt fi nte akpadade enye anam n̄kpọ.” Akam nnyịn edi yak obufa ikpehe emi an̄wam ediwak owo “ẹsịm nnennen ifiọk akpanikọ.”—1 Tim. 2:4.