Ndi Emekeme Ndin̄wam Nsan̄a Ndọ Emi Mînịmke ke Akpanikọ?
1. Ntak emi esidọn̄de mbon en̄wen ndikụt nte mbon emi mînịmke ke akpanikọ, emi ẹdọde nditọete nnyịn, ẹbọde akpanikọ?
1 Ndi mme asuanetop emi nsan̄a ndọ mmọ mînịmke ke akpanikọ ẹdu ke esop mbufo? Ke edide ntre, anaedi esidọn̄ mme asuanetop emi ndikụt nsan̄a ndọ mmọ ẹtienede ẹbuana ke utuakibuot akpanikọ. Edi idịghe mmọ ikpọn̄ ke esidọn̄. Esidọn̄ ofụri esop n̄ko, sia mmọ ẹtiene Abasi ẹyom ‘kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.’ (1 Tim. 2:4) Didie ke ikeme ndin̄wam mbon emi mînịmke ke akpanikọ, oro ẹdide nsan̄a ndọ mme asuanetop oro ẹdude ke esop nnyịn?
2. Didie ke ndinyene mbufiọk edinam nnyịn ikeme ndin̄wam nsan̄a ndọ emi mînịmke ke akpanikọ?
2 Akpa, ana idomo ndifiọk se inamde owo emi mînịmke ke akpanikọ ekere n̄kpọ nte enye ekerede. Ediwak nsan̄a ndọ emi mînịmke ke akpanikọ ẹsima ubon mmọ ẹnyụn̄ ẹdomo ndidi nti nsan̄a ndọ ye nti mme ete ye eka. Edi se mmọ ẹnịmde ke akpanikọ ẹban̄a ido ukpono ekeme ndikpụhọde ye eke nnyịn. Ekeme ndidi ukụre se mmọ ẹdiọn̄ọde ẹban̄a Mme Ntiense Jehovah edi se mme ufan mmọ emi mîtịmke idiọn̄ọ nnyịn m̀mê emi mîmaha nnyịn ẹtịn̄de ẹnọ mmọ. Ndusụk mmọ imaha nte nsan̄a ndọ mmọ ẹdade ini emi mmọ ẹkesidude ye ubon, ẹnam n̄kpọ Abasi. Ndinyene mbufiọk ayan̄wam nnyịn ifọn ido inyụn̄ inam n̄kpọ ukpono ukpono ye owo emi mînịmke ke akpanikọ, utu ke nditie ndịk ndịk ke ini ikụtde mmọ.—N̄ke 16:20-23.
3. Nso idi mfọnn̄kan usụn̄ ndin̄wam owo emi mînịmke ke akpanikọ ọbọ akpanikọ?
3 Nyene Udọn̄ ke Idemmọ: Mfọnn̄kan usụn̄ ndin̄wam owo emi mînịmke ke akpanikọ ọbọ akpanikọ ke akpa ini, edi edu nnyịn, idịghe nneme Bible. (1 Pet. 3:1, 2) Se inen̄erede idi akpan n̄kpọ ke afan̄ emi edi nnyịn ndinyene udọn̄ ke idem owo oro. Nditọete iban ẹkeme ndinam ufan ye n̄wan eyenete nnyịn emi mînịmke ke akpanikọ ke ini nditọete iren ẹnamde ufan ye mme ebe eyenete nnyịn an̄wan emi mînịmke ke akpanikọ. Didie?
4. Didie ke ikeme ndiwụt ke imenyene ọkpọkpọ udọn̄?
4 Edieke mûsoboke kan̄a ye ebe m̀mê n̄wan emi mînịmke ke akpanikọ, emekeme ndinam ntre ke ama ekebem iso eneme ye nsan̄a ndọ esie emi edide Christian. Kûyak idem emem fi edieke owo oro mînịmke ke akpanikọ do mînamke n̄kpọ ufan ufan ye afo ke akpa ini emi osobode ye enye. Nte nnyịn inamde n̄kpọ ufan ufan inyụn̄ iwụtde ke imenyene udọn̄ ke idemesie ekeme ndinam enye ama Mme Ntiense Jehovah. (Rome 12:20) Ndusụk mme Christian ẹsikot owo oro mînịmke ke akpanikọ ye ubon esie ufọk man ẹkeme ndimehe ye enye nnyụn̄ mbiat usua ekededi oro enye enyenede aban̄a nnyịn mfep. Mmọ ẹsineme se enye amade, utu ke ndiyịre ndineme Ikọ Abasi ye enye. Nte ini akade, ke ini owo emi mînịmke ke akpanikọ ọtọn̄ọde ndinam n̄kpọ ufan ufan, ẹkeme ndineme nneme N̄wed Abasi. Mîdịghe enye ekeme ndiyịme ikot ndidụk mbono esop nnyịn kiet man edise se nsan̄a ndọ esie esikpepde, sia edide enye ememehe ye ndusụk owo ke esop. Idem ekpededi enye iyomke ndidiọn̄ọ se nnyịn ikpepde, imosụk ikeme nditoro enye ke un̄wam oro enye ọnọde nsan̄a ndọ esie.
5. Didie ke mbiowo ẹkeme ndin̄wam owo emi mînịmke ke akpanikọ?
5 Mbiowo akpan akpan ẹkpenyene ndisịn ifịk n̄n̄wam nsan̄a ndọ emi mînịmke ke akpanikọ, nnyụn̄ ndu ke mben̄eidem ndidaa ifet ekededi emi ebererede nnọ ikọ ntiense. Nsan̄a ndọ emi mînịmke ke akpanikọ, emi mîsimaha nneme Bible, ekeme ndikpan̄ utọn̄ n̄kop nsịnudọn̄ N̄wed Abasi ke ini enye odude ke ufọkibọk m̀mê ọdọn̄ọde ata idiọk udọn̄ọ. Edieke owo akpade ke ubon oro ndusụk owo mînịmke ke akpanikọ mîdịghe ubon oro ẹsobo afanikọn̄, mbiowo ẹkeme ndidọhọ mbon emi mînịmke ke akpanikọ ẹtiene ẹtie ke ini mmọ ẹdọn̄de ubon oro esịt.
6. Nso ye nso ikpanam in̄wam nsan̄a ndọ emi mînịmke ke akpanikọ?
6 Kere nte esịt ekpenemde eyenete nnyịn ke esop edieke nsan̄a ndọ esie ọbọde akpanikọ! Emi n̄ko ekpenem Jehovah, mme angel, ye ofụri esop esịt. (Luke 15:7, 10) Edi edieke owo emi mînịmke ke akpanikọ mînyịmeke ndibọ akpanikọ kan̄a, nnyịn isụk ikokop inemesịt koro se nnyịn inamde enem Jehovah emi “mîyomke owo ndomokiet atak edi oyom kpukpru owo ẹkabade esịt.”—2 Pet. 3:9.
[Se ẹwetde ke ikpọ abisi ke page 6]
Mfọnn̄kan usụn̄ ndin̄wam owo emi mînịmke ke akpanikọ ọbọ akpanikọ ke akpa ini, edi edu nnyịn, idịghe nneme Bible