Ndi Ọyọtọn̄ọ Ukpepn̄kpọ Bible ke Ọfiọn̄ October?
1. Nso ke ẹdinọ ke October?
1 Ẹdinọ Enyọn̄-Ukpeme ye Awake! ke ọfiọn̄ October. Man inam n̄kpọ iban̄a udọn̄ oro ikokụtde, ẹsịn udọn̄ ẹnọ nnyịn ndinọ tract Nte Akpama Ndifiọk Akpanikọ? nnyụn̄ ndomo nditọn̄ọ ukpepn̄kpọ Bible. Didie ke ikeme ndinam oro ke ini ifiakde ika?
2. Didie ke ikeme ndikama tract Ndifiọk Akpanikọ ntọn̄ọ ukpepn̄kpọ Bible ke ini ifiakde ika ibịne owo emi ọkọbọde mme magazine?
2 Nte Ẹkpedade Tract Oro Ẹnam N̄kpọ: Imekeme ndidọhọ ite: “Mme magazine oro n̄kọkpọn̄de ye afo ẹsịn udọn̄ ẹnọ mme owo ke kpukpru idaha ye ke kpukpru ido ukpono ndidụn̄ọde Bible. [Yak tract Ndifiọk Akpanikọ nọ enyeneufọk, nyụn̄ wụt enye mme mbụme oro ẹdude ke akpa page tract emi.] Mmọ emi ẹdi ndusụk mme edemede-owo-udọn̄ mbụme, ndien Bible ọnọ mme ibọrọ oro ẹnọde uyụhọ. Ndi akanam omobụp ekededi ke otu mbụme emi?” Ke enyeneufọk ama ọkọbọrọ, neme ye enye kiet ke otu mbụme esie emi tract oro ọbọrọde, nyụn̄ kot kiet ke otu itie N̄wed Abasi oro ẹsiakde ẹsịn. Ekem dọhọ enye ete ke emi edi kiet ke otu n̄kpọ oro Bible ekpepde, nyụn̄ yak n̄wed Bible Ekpep nọ enye. Imekeme ndien ndineme akpa ikpehe ekikere ifan̄ ke ibuotikọ oro enye emekde ke n̄wed emi. Mîdịghe imekeme ndimek ndikụbọde n̄ka ebiet oro ẹnen̄erede ẹneme n̄kpọ ẹban̄a ibuotikọ oro ikenemede ke tract oro. Imekeme ndida mme ntọt oro ẹdude ke n̄wed Bible Ekpep mi nnam n̄kpọ:
● Nte Abasi enen̄ede ekere aban̄a nnyịn? (p. 10-11, ikp. eki. 6-10)
● Nte ekọn̄ ye ndutụhọ ẹyetre tutu amama? (p. 12, ikp. eki. 12-13)
● Nso isitịbe inọ nnyịn ke ini ikpade? (p. 59-60, ikp. eki. 7-8)
● Nte idotenyịn ndomokiet odu ọnọ mme akpan̄kpa? (p. 71, ikp. eki. 13-15)
● N̄kpọbọn̄ didie akam nnọ Abasi man enye okop? (p. 166-167, ikp. eki. 5-8)
● Nso ke n̄kpanam man n̄kop inemesịt? (p. 9, ikp. eki. 4-5)
3. Didie ke ikpanam n̄kpọ itiene nte idaha etiede?
3 Edi edieke idaha mîyakke nnyịn itọn̄ọ ukpepn̄kpọ ke n̄wed Bible Ekpep inyụn̄ inam iwụt nte isikpepde n̄wed emi ke akpa ini oro ifiakde ika, imekeme ndisụk nnam ndutịm man ifiak ika ikaka iso ke nneme nnyịn. Etiene udọn̄ emi owo oro enyenede, imekeme ndimek ndineme se ikande mbụme kiet ke tract oro nte ifiakde ika ediwak ini mbemiso inọde n̄wed oro. Nnyịn ikpakam ida ediye tract emi inam n̄kpọ nte ọfọnde ke October, ke nditọn̄ọ ukpepn̄kpọ Bible nnyụn̄ n̄n̄wam mbon oro ẹnyenede eti esịt ‘ẹfiọk akpanikọ.’—John 8:31, 32.