“Mme Utom Ọniọn̄ Ẹwụt ke Ọniọn̄ Enen”
1. Didie ke ndusụk owo ẹsise utom nnyịn?
1 Ndusụk ini, imesisobo mme enyeneufọk oro mîmaha ndikop ukwọrọikọ nnyịn ke ntak oro mmọ mîtịmke ifiọk nnyịn m̀mê ke ntak ndiọi ikọ oro ẹtịn̄de ẹdian Mme Ntiense Jehovah. Ekeme ndidi idiọk ikọ oro mbon usuanetop ẹketịn̄de ẹban̄a nnyịn anam mmọ ẹsịn ndikop ukwọrọikọ nnyịn. Ke ndusụk ebiet, ẹsikot nnyịn “enyene-ndịk n̄ka.” Didie ke ikpanam n̄kpọ ke ini mme owo ẹdoride nnyịn ikọ ntre?
2. Ke ini mme owo ẹtịn̄de idiọk ikọ ẹdian nnyịn, nso idinam idem okûmem nnyịn?
2 Kûyak Idem Emem Fi: Mme owo ikesitịmke ifiọk Jesus ye mme asan̄autom Jehovah eke akpa isua ikie, ẹsinyụn̄ ẹma nditịn̄ ndiọi ikọ ndian mmọ. (Utom 28:22) Edi mmọ ikayakke idiọk ikọ emi anam mmọ ẹkop bụt ẹban̄a utom ukwọrọikọ mmọ. Jesus ọkọdọhọ ete: “Mme utom ọniọn̄ ẹwụt ke ọniọn̄ enen.” (Matt. 11:18, 19) Enye ama aka iso anam uduak ete esie ifịk ifịk, onyụn̄ ọfiọk ke mbon oro ẹnen̄erede ẹyom akpanikọ ẹyedi ẹdikụt ufọn eti mbụk. Nnyịn nditi ke mme utọ n̄kpọ emi ẹma ẹwọrọ Eyen Abasi idiyakke idem emem nnyịn.
3. Ntak emi nnyịn mîkpayakke idem akpa nnyịn ke ini mme owo ẹtịn̄de idiọk ikọ ẹdian nnyịn ẹnyụn̄ ẹbiọn̄ọde nnyịn?
3 Jesus ama etịn̄ ke ererimbot ayasua mbet imọ kpa nte enye akasuade imọ. (John 15:18-20) Mmọdo, ikpanaha akpa nnyịn idem ke ini mme owo ẹtịn̄de idiọk ikọ ẹdian nnyịn ẹnyụn̄ ẹbiọn̄ọde nnyịn. Ke nditịm ntịn̄, oyom iti ke mme orụk n̄kpọ oro ẹyenen̄ede ẹsọn̄ ubọk nte mme akpatre usen emi ẹkperede utịt ye nte Satan ayatde esịt idahaemi akan akpa. (Edi. 12:12) Imenem esịt koro emi owụt ke ererimbot Satan ọmọn̄ ebebe efep.
4. Didie ke ikpanam n̄kpọ ke ini mme owo mîmaha utom ukwọrọikọ nnyịn?
4 Bọrọ Sụn̄sụn̄: Oyom ika iso inam n̄kpọ ke eti usụn̄ inyụn̄ ibọrọ owo ikọ sụn̄sụn̄ idem ke ini mmọ mîmaha ukwọrọikọ nnyịn. (N̄ke 15:1; Col. 4:5, 6) Edieke ikemede, ọfọn ndisian enyeneufọk oro enyenede esịt akpanikọ ke mme owo ẹsitịn̄ nsio nsio ndiọi ikọ ẹdian Mme Ntiense Jehovah mîdịghe imekeme ndibụp enye ntak emi enye etịn̄de se enye etịn̄de. Sụn̄sụn̄ ibọrọ nnyịn ekeme ndinam enye afiak ekere aban̄a se enye okokopde aban̄a Mme Ntiense Jehovah, onyụn̄ akpan̄ utọn̄ ini en̄wen oro Ntiense edide ufọk esie. Edi, edieke enyeneufọk enen̄erede ayat esịt, etie nte ọkpọfọn ndidaha n̄kpọn̄ enye kan̄a. Imenen̄ede inịm ke Jehovah ama utom nnyịn inamke n̄kpọ m̀mê mme owo ẹse nnyịn didie.—Isa. 52:7.