‘Ẹyekwọrọ Eti Mbụk Obio Ubọn̄ Emi’!
1. Nnyịn inam didie ifiọk ke baba n̄kpọ kiet ikemeke-keme nditre utom ukwọrọikọ?
1 Baba n̄kpọ kiet ikemeke-keme nditre Jehovah ndinam uduak esie. (Isa. 14:24) Okposụkedi emi eketiede nte ke Gideon emi ekedide Ebiereikpe ye owo 300 esie idikemeke ndikan udịmekọn̄ Midian emi ẹkedide owo 135,000, Jehovah ama ọdọhọ enye ete: “Afo ayanyan̄a Israel osio ke ubọk Midian. Nte idịghe ami ndọn̄ fi?” (Judg. 6:14, 15) Nso utom ke Jehovah ọnọ ibetedem mfịn? Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matt. 24:14) Owo ndomokiet idikemeke nditre utom emi!
2. Ntak emi ikpodoride enyịn nte ke Jehovah ayan̄wam nnyịn owo kiet kiet ke utom ukwọrọikọ?
2 Jehovah Esin̄wam Nnyịn Owo Kiet Kiet: Ke adan̄aemi inyenede mbuọtidem nte ke Jehovah ayan̄wam Mme Ntiense esie nte otu ndikụt unen, ndi imekeme ndidori enyịn nte ke enye ayan̄wam nnyịn owo kiet kiet? Ke ini uwem ọkọsọn̄de ye apostle Paul, enye ama okụt nte Jehovah akadade Jesus Eyen esie an̄wam enye. (2 Tim. 4:17) Nnyịn imekeme ndinịm nte ke Jehovah n̄ko ọyọdiọn̄ ukeme oro owo nnyịn kiet kiet esịnde ndinam uduak esie.—1 John 5:14.
3. Ke mme idaha ewe ke Jehovah esin̄wam nnyịn?
3 Ndi editịmede esịt uwem eke usen ke usen ọbọ fi odudu oro akpadade anam utom ukwọrọikọ? “Enye ọnọ mbon mba odudu.” (Isa. 40:29-31) Ndi ke osobo ukọbọ m̀mê ubiọn̄ọ? “Top mbiomo fo nọ Jehovah, ndien enye ayakama fi.” (Ps. 55:22) Ndi emesinana uko ndusụk ini? “Ka ndien, ami nyonyụn̄ ndu ye inua fo.” (Ex. 4:11, 12) Ndi emenyene udọn̄ọ oro mîyakke fi enen̄ede esịn idem ke utom ukwọrọikọ? Jehovah ama se afo anamde ke ofụri esịt ọnọ enye, onyụn̄ ekeme ndida enye nnam n̄kpọ ọkpọkọm enye ekpri didie.—1 Cor. 3:6, 9.
4. Didie ke ndinyene mbuọtidem ke Jehovah edin̄wam nnyịn?
4 Jehovah “omonyụn̄ anyanade ubọk esie, ndien anie edinụk enye afiak?” (Isa. 14:27) Nnyịn ikpakam ika iso ndikwọrọ ikọ “ye uko ke odudu Jehovah” sia inyenede mbuọtidem nte ke Jehovah ọyọdiọn̄ utom ukwọrọikọ nnyịn.—Utom 14:3.