Mme Ntọt

◼ N̄wed ẹnọde ke April ye May: Enyọn̄-Ukpeme ye Awake! Ke ini afiakde aka ebịne mbon oro ẹkewụtde udọn̄, esịnede mbon oro ẹkedụkde Editi m̀mê mme edinam ukara Abasi eken, edi oro mîbuanake ifịk ifịk ye esop, sịn ukeme ndida n̄wed Bible Ekpep ntọn̄ọ ukpepn̄kpọ Bible. June: Nso ke Bible Enen̄ede Ekpep? Edieke edide mme enyeneufọk ẹnyenyene n̄wed emi, mme asuanetop ẹkeme ndinịm akani n̄wed ekededi oro odude ke esop. July ye August: Mme asuanetop ẹkeme ndinọ ekededi ke otu ndiye uduot n̄kpri n̄wed emi ẹnyenede page 32 oro ẹtienede mi: Afo Emekeme Ndidi Ufan Abasi!, Dara Uwem ke Isọn̄ ke Nsinsi!, Enyịn̄ Abasi Oro Edibịghide ke Nsinsi, Ke Ini Owo Oro Afo Amade Akpade, Nso Idi Uduak Uwem—Didie ke Afo Ekeme Ndikụt Enye?, Nso Itịbe inọ Nnyịn ke Ini Nnyịn Ikpade?, Nte Abasi Enen̄ede Ekere Aban̄a Nnyịn?, Spirit Mme Akpan̄kpa—Nte Mmọ Ẹkeme Ndin̄wam Fi m̀mê Ndinọ Fi Unan? Nte Mmọ Ẹnen̄ede Ẹdu?, Usụn̄ Oro Adade Esịm Nsinsi Uwem—Nte Afo Omokụt Enye? Nọ n̄kani ndiye uduot n̄kpri n̄wed ekededi oro esop enyenede awak akaha.

◼ Ke mme urua mbono district, mbono circuit, ye usen akpan mbono, owo idinịmke Ukpepn̄kpọ Bible Esop, Ufọkn̄wed Utom Ukara Abasi, ye Esoputom. Ke ntem, imesịn udọn̄ inọ kpukpru owo ndidụn̄ọde se idude ke mme ikpehe mbono esop ita emi, ẹkeme ndinam emi ke mbubreyo Utuakibuot Ubon.

◼ Ibuotikọ akpan utịn̄ikọ ini Editi eke 2010 edidi “Ini Ewe ke Idinyene Ata Emem ye Ifụre?”