‘Ẹtiene Nde-Ikpat Jesus Ketket’
1. Ntak ọfọnde ndikot nnyụn̄ ntie n̄kere mbụk Gospel mbinan̄-a?
1 Mbụk uwem Jesus ke isọn̄ oro ẹwetde ke Gospel mbinan̄, ẹnen̄ede ẹwụt nte Eyen Abasi etiede. Sia anade mme Christian “ẹtiene nde ikpat esie ketket,” ọyọfọn nnyịn isio ini inịm man ida ikot inyụn̄ itie ikere mme mbụk Gospel. (1 Pet. 2:21; Mark 10:21) Odot itịm ikere ikpehe uwem Jesus oro ekemede ndisịn udọn̄ nnọ nnyịn ke utom ukwọrọikọ.
2. Didie ke uwụtn̄kpọ oro Jesus ekenịmde ke ndime ime enyene ufọn ọnọ nnyịn?
2 Uwụtn̄kpọ oro Jesus Ekenịmde: Ndi akanam owo anam n̄kpọ ye afo idiọk idiọk ke ini ọkwọrọde ikọ ke ufọk ke ufọk? Ke ini isobode utọ ubiọn̄ọ oro, imesiti ikọ Jesus emi: “Edieke mmọ ẹkekọbọde mi, mmọ ẹyekọbọ mbufo n̄ko.” (John 15:20) Edi akpanikọ nte ke idịghe kpukpru ntịme ntịme ibọrọ oro ẹbọrọde nnyịn ke an̄wautom ẹdi ukọbọ. Edi idatesịt oro ẹkenịmde enye ke iso akan̄wam enye ndiyọ kpukpru orụk idomo ye ukọbọ oro enye okosobode. Nnyịn n̄ko imekeme ndiwụk ekikere ke ndinyene unyịme Jehovah nnyụn̄ mbọ utịp edinam akpanikọ nnyịn. Emi idiyakke nnyịn ‘ikpa mba inyụn̄ ikop mmemidem ke ukpọn̄ nnyịn.’ (Heb. 12:2, 3; N̄ke 27:11) Nte nnyịn ikade iso isịn idem inam utom ukwọrọikọ kpukpru ini, imetịm inịm ke Jesus Christ ayan̄wam nnyịn.—Matt. 28:20.
3. Didie ke nnyịn ikeme ndida utom ukwọrọikọ nte Jesus akadade?
3 “Ẹkesio Mi Ẹdọn̄ Ẹte Ndinam Emi”: Jesus akada utom edikwọrọ Obio Ubọn̄ nte akakan n̄kpọ ke uwem esie. (Luke 4:43) Enye ama esịn idem eti eti ke utom ukwọrọikọ. Enye akada utom ukwọrọikọ ke akpan n̄kpọ, esinyụn̄ ada kpukpru ifet oro ebererede etịn̄ aban̄a Obio Ubọn̄. Sia idide mme anditiene Jesus, nso utịp ke emi edinyene ke idem nnyịn? Nte isụk inamde mbubehe nnyịn ke usen ke usen, ndi odu mme owo emi nnyịn ikemede ndikwọrọ eti mbụk nnọ? Ima Christ akpakam onụk nnyịn ndikwọrọ eti mbụk nte ikekeme ke kpukpru itie!—2 Cor. 5:14.
4. Ke mme usụn̄ ewe ke ikeme ndinam n̄kọri ke utom ukwọrọikọ nnyịn?
4 “Akananam Owo Ndomokiet Itịn̄ke Ikọ Ntem”: Idem ama esikpa mbon oro ẹkekpan̄de utọn̄ ẹnọ Jesus aban̄a nte enye ekesikpepde n̄kpọ. (John 7:46; Matt. 7:28, 29) Nso ikanam enye okpụhọde ye mme andikpep eken? Enye ama ama akpanikọ oro enye ekekpepde, ama mme owo oro enye ekekpepde n̄kpọ, onyụn̄ ada nsio nsio usụn̄ ekpep mmọ n̄kpọ. Ima ikpebe Akwa Andikpep, imekeme ndinam n̄kọri ke utom ukwọrọikọ nnyịn.—Luke 6:40.
5. Nso ikpedi utịtmbuba nnyịn nte isụk ikotde inyụn̄ itiede ikere mme mbụk Gospel?
5 Mme ọsọn̄urua n̄kpọ ifan̄ emi ke ẹsio ẹwụt ke uwem Jesus. Mme n̄kpọuto ewe en̄wen ke afo ekeme ndikụt? Nte afo odụn̄ọrede uwem Jesus ke ndikot nnyụn̄ ntie n̄kere etop emi ẹdọn̄ọde ke Gospel mbinan̄ emi, biere ‘ndifiọk ima Christ’ ke ndikpebe ikọ ye edinam esie.—Eph. 3:19.