Unọ Ikọ Ntiense Urụk Ukopikọ Ekeme Ndinyene Ufọn
1. Ntak emi ikpadade unọ ikọ ntiense urụk ukopikọ nte akpan usụn̄ ukwọrọikọ nnyịn?
1 Ntak emi ikpadade urụk ukopikọ inọ ikọ ntiense? Koro enye edi usụn̄ en̄wen oro ikemede ndin̄wam mme owo ẹnyene nnennen ifiọk oro ẹdinamde mmọ ẹnyene edinyan̄a. (2 Pet. 3:9) Okposụkedi emi utom ukwọrọikọ eke ufọk ke ufọk edide akpan usụn̄ emi isidade ikwọrọ ikọ, nnyịn imesida mme usụn̄ en̄wen ikwọrọ ikọ inọ mbon oro mîsidụhe ke ufọk.—Matt. 24:14; Luke 10:1-7; Edi. 14:6.
2. Didie ke ẹtịm unọ ikọ ntiense urụk ukopikọ?
2 Nte Ẹsitịmde: Ukem nte ẹsinọde efakutom oro ẹdikwọrọde ikọ ke ufọk ke ufọk, ẹsinọ mme asuanetop efakutom emi ẹdinọde ikọ ntiense urụk ukopikọ. Owo kiet ekeme ndida urụk ukopikọ n̄kwọrọ ikọ mîdịghe etie ye owo iba m̀mê ita. Ẹkpenyene nditie ke ebiet emi uyom mîdụhe nnam emi. Ediwak owo ẹkụt ke esifọn idori mme n̄wed oro isikamade ikwọrọ ikọ ke ufọk ke ufọk ke okpokoro.
3. Nso ke ikpeti ke ini inọde ikọ ntiense ke urụk ukopikọ?
3 Nte Ẹkpedade Urụk Ukopikọ Ẹnọ Ikọ Ntiense: Ikpenyene nditịn̄ ikọ ke ido nneme ke ini inọde ikọ ntiense ke urụk ukopikọ. Ndusụk owo oro ẹtọn̄ọde ndida urụk ukopikọ n̄kwọrọ ikọ ẹkeme ndikokot se idude ke n̄wed nnọ enyeneufọk, edi ẹkpenyene ndinam emi ke ido nneme. Mme ntọn̄ọikọ oro ẹdude ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible, Utom Obio Ubọn̄ Nnyịn, ye tract oro Nte Akpama Ndifiọk Akpanikọ? ẹkeme ndin̄wam. Ke ini etịmde nneme fo, kere ban̄a se oyomde ndineme, mbụme oro edibụpde, ye mme itie N̄wed Abasi ifan̄ oro edidade ọbọrọ mbụme oro. Nte ido edide, afo edinọ ukem n̄wed oro esinọde ke utom ukwọrọikọ eke ufọk ke ufọk. Ti mme akpan n̄kpọ ifan̄ emi: Sụhọde idem tịn̄ ikọ sụn̄sụn̄. Wụt ukpono, nyene ime, nyụn̄ tie ufan ufan sia owo emi afo adade enyene nneme ekeme ndifiọk. Kpan̄ utọn̄ ke ini enyeneufọk etịn̄de ekikere esie nyụn̄ kọm enye. Kûtịn̄ n̄kpọ ndomokiet uban̄a ndutịm etịbe koro owo oro ekeme ndikere ada urụk ukopikọ eben̄e okụk.
4. Nso ufọn ke unọ ikọ ntiense urụk ukopikọ ekeme ndinyene ke efakutom nnyịn?
4 Ekeme ndidi owo oro afo ọkwọrọde ikọ ọnọ ke urụk ukopikọ edi owo udọn̄ọ emi mîkemeke ndiwọrọ an̄wa mîdịghe edi anamutom oro owo mîsikwe ke ini utom ukwọrọikọ eke ufọk ke ufọk. Ndusụk owo ẹdụn̄ ke efak oro ẹsịnde ọkọ m̀mê ke mme ufọk oro ẹnyenede mbon ukpeme. Ke ntre, man ikeme nditịm nnam utom ukwọrọikọ nnyịn ọyọhọ ọyọhọ, kere ban̄a edida urụk ukopikọ ikọ nnọ ntiense, koro enye enyene ekese ufọn.