Nte Emeben̄e Idem Nditọn̄ọ Ikọ Ntiense Ido Nneme?
1. Nọ uwụtn̄kpọ oro owụtde ke ikọ ntiense ido nneme ekeme ndinyene uforo.
1 Ikọ ntiense ido nneme ekeme ndinen̄ede nnyene uforo. Bible ọdọn̄ọ ata ediwak uwụtn̄kpọ ikọ ntiense ido nneme oro ẹkenyenede nti utịp. (John 4:7-15) Didie ke ikpeben̄e idem ndinọ ikọ ntiense ido nneme?
2. Didie ke ọfọn̄ ye ukamaidem nnyịn anam ikeme ndinọ ikọ ntiense?
2 Ọfọn̄ ye Ukamaidem: Ndisịne ọfọn̄ nnyụn̄ n̄kama idem nte odotde kpukpru ini ayanam ikeme ndikwọrọ ikọ ifụre ifụre inọ mme owo. (1 Tim. 2:9, 10) Ekeme ndidi nnyịn idikemeke ndikwọrọ ikọ nnọ mme owo edieke isịnede n̄kpọ emi mîfọnke. Edieke ikamade idem ke usụn̄ oro asanade onyụn̄ eyede, mme owo ẹkeme ndiyom ndifiọk orụk owo emi nnyịn idide. Ke uwụtn̄kpọ, ke ini ebe ye n̄wan emi ẹdide Mme Ntiense ẹkekade isan̄, owo Muslim emi eketiede ekpere mmọ ama okụt nte mmọ ẹsịnede n̄kpọ ọfọn onyụn̄ obụp m̀mê mmọ ẹdi mme Christian. Emi ama ada ekesịm nneme Bible ke hour ita.
3. Ke ndikpebe uwụtn̄kpọ Jesus, didie ke afo esitọn̄ọ nneme?
3 Nditọn̄ọ Nneme: Ke ini Jesus okosobode n̄wan Samaria ke obube mmọn̄ Jacob, enye akakam ọtọn̄ọ nneme ke ndidọhọ n̄wan oro ọnọ imọ mmọn̄ in̄wọn̄. Ukem ntre, imekeme ndida ikọ ifan̄ itọn̄ọ nneme mîdịghe ibụp mmemmem mbụme. Okposụkedi emi ikemede ndikop ndịk ndusụk ini nditọn̄ọ nneme, imekeme ‘ndida uko’ nnam emi edieke iberide edem ke Jehovah.—1 Thess. 2:2.
4. Didie ke ikeme ndiben̄e idem ndinọ ikọ ntiense ido nneme?
4 Ndiyom Mme Ifet Ndinọ Ikọ Ntiense: Ediwak mme asuanetop ẹnyene usụn̄ oro mmọ ẹsidade ẹnọ ikọ ntiense ido nneme. Fiak se mme n̄kpọ oro esinamde kpukpru usen, nyụn̄ kere ban̄a mme owo oro ekemede ndisobo. Kama mme n̄wed oro ediyomde ye ekpri Bible. Se mbon oro ẹdude ẹkpere fi nnyụn̄ nyene udọn̄ ke idem mmọ. Ke ama ekekere aban̄a mme idaha oro ekemede ndisobo usen oro, oyodu ke mben̄eidem ndinọ eti ikọ ntiense.—Phil. 1:12-14; 1 Pet. 3:15.
5. Ntak emi ikpetịmde idem man inọ ikọ ntiense ido nneme ini kiet ekededi?
5 Ima oro imade Abasi ye mbọhọidụn̄ edi akpan ntak iba oro anamde isida kpukpru ifet oro inyenede inọ ikọ ntiense ido nneme. (Matt. 22:37-39) Sia oyomde ikwọrọ ikọ idahaemi ikan nte ikesikwọrọde, oyom itịm idem man ikwọrọ ikọ ini kiet ekededi. Akpana iben̄e idem ndida kpukpru ifet oro ebererede ikwọrọ eti mbụk Obio Ubọn̄ inọ mbon efen ke adan̄aemi ifet osụk odude.—Rome 10:13, 14; 2 Tim. 4:2.