Yom Mbon Oro Ẹdotde
1. Didie ke iwụt esịtekọm iban̄a ifet oro inyenede ndinam utom ukwọrọikọ?
1 Ke ini utom ukwọrọikọ Jesus, enye ama esinen̄ede esịn ukeme ada eti mbụk ọdọn̄ mbon nsụkesịt, esịt. (Isa. 61:1, 2) Nte mme isụn̄utom ye udiana isụn̄utom emi idade ke ibuot Christ, imama ifet oro inyenede mfịn ndikpebe enye ke ndinen̄ede nyom mbon oro ẹdotde ke efakutom nnyịn ye unana edikpa mba.—Matt. 10:11; 2 Cor. 5:20.
2. Nso iwụt ke Paul ama okpụhọde ekekem ye idaha, ndien ye nso utịp?
2 Kpụhọde Ekekem ye Idaha: Ekedi ido apostle Paul ndisibem iso n̄ka synagogue n̄kọkwọrọ ikọ nnọ mme Jew ye mme okpono Abasi ke ido mme Jew. (Utom 14:1) Ke Philippi, enye ye Silas ẹma ẹkeyom mme owo ke ‘ebiet emi mmọ ẹkekerede ẹte itie akam odu.’ Mmọ ẹma ẹtọn̄ọ ndikwọrọ ikọ nnọ iban do, ndien Lydia emi ekedide kiet ke otu iban emi, ama ọsọsọp enyịme akpanikọ.—Utom 16:12-15.
3. Ke adianade ye edikwọrọ ikọ ke ufọk ke ufọk, m̀mọ̀n̄ efen ke ikeme ndikwọrọ ikọ ke efakutom nnyịn?
3 Ke adianade ye utom ukwọrọikọ eke ufọk ke ufọk, nte emekeme n̄ko ndikwọrọ ikọ nnọ mme owo oro okụtde ke mme itie mbehe ubomisọn̄, mme itie unọ idem nduọkodudu, mme itieutom, mme efak oro mme owo ẹsiwakde ndidu, mme itie mbubehe, ye mme ufọkurua oro ẹdude ke efakutom mbufo? Emekeme ndida leta m̀mê urụk ukopikọ n̄kwọrọ ikọ nnọ mme owo ke mme efak oro ẹsịnde ọkọ ye ke mme ufọk oro ẹnyenede mbon-ukpeme. Nditịn̄ enyịn nse nnyụn̄ n̄kpụhọde ekekem ye nsio nsio idaha oro ẹdude ke efakutom mbufo ayanam “ẹnyene ekese ndinam ke utom Ọbọn̄.”—1 Cor. 15:58.
4. Nso n̄kpọ en̄wen ke ikpanam edieke efakutom esop nnyịn mîkponke?
4 Ediwak mme asuanetop ẹsiwọrọ ẹka esop en̄wen ke idụt mmọ m̀mê ke idụt en̄wen man ẹketat utom ukwọrọikọ mmọ. Mbon en̄wen ẹmekpep obufa usem man ẹkeme ndikwọrọ ikọ nnọ mbon esenidụt oro ẹdụn̄de ke efakutom mmọ.
5. Didie ke ikpese ini emi idude mi, ndien nso ke ikpebiere ndinam?
5 Ana kpukpru nnyịn iti ke “in̄wan̄ edi ererimbot.” (Matt. 9:37; 13:38) Sia edisobode idiọk editịm n̄kpọ emi ke mîbịghike, ana owo kiet kiet ekere nte enye akpadade idaha, ukeme, ye mme ifet oro enye enyenede atat utom ukwọrọikọ esie. Jehovah ọn̄wọn̄ọ ke edieke inịmde n̄kpọ Obio Ubọn̄ akpa, imọ iyọdiọn̄ ukeme oro isịnde nditat utom ukwọrọikọ nnyịn.—Matt. 6:33.