Da Bible Nam N̄kpọ ye Usọ
1. Ntak emi Bible enen̄erede enyene ufọn-ọ?
1 Ndida Ikọ eke odudu spirit Abasi emi odude ke Bible nnam n̄kpọ ye usọ an̄wam nnyịn itan̄a inyụn̄ ikpep akpanikọ in̄wan̄-in̄wan̄ inyụn̄ iyarade mme nsunsu ukpepn̄kpọ ye item owo.—2 Tim. 2:15; 1 Pet. 3:15.
2. Nso idin̄wam nnyịn inyene usọ ke ndisọp n̄kụt mme itie N̄wed Abasi?
2 Nen̄ede Mehe ye Bible: Man owo enyene usọ ke ndida n̄kpọutom ekededi nnam n̄kpọ, oyoyom enye enen̄ede emehe ye n̄kpọutom oro. Ndikot ofụri Bible mma ayan̄wam fi ọfiọk se ibuotikọ Bible aban̄ade. Emi n̄ko ayan̄wam fi eti mme itie N̄wed Abasi onyụn̄ ọsọp okụt mmọ. Edieke enen̄ede emehe ye Bible, ayada uko ye mbuọtidem ọnọ ikọ ntiense ke ido nneme ye ke an̄wautom.—1 Thess. 1:5.
3, 4. (a) Nso idi ndusụk usụn̄ oro ikpenen̄ede imehe ye Bible? (b) Nte emesinam n̄kpọ en̄wen oro edinamde etetịm emehe ye mme itien̄wed Bible?
3 Nam edi ido fo ndisikụbọde Bible fo nnyụn̄ ntiene nse ke ini mbono esop akade iso. Ke ini anamde ukpepn̄kpọ idemfo ye ke ini etịmde idem ọnọ mme mbono esop, kot mme itie N̄wed Abasi oro ẹsiakde ẹsịn nyụn̄ tie kere nte akpadade mmọ ẹsịn ke edinam. Ediwak owo ẹmekụt ke edikot mme itie N̄wed Abasi nnennen nnennen ke Bible, utu ke ndikot ke kọmputa m̀mê ke babru oro emịn̄de-mịn̄, esin̄wam mmimọ ke an̄wautom ndisọp nti ebiet oro mmọ ẹdude.—John 14:26.
4 Ndusụk ubon ẹnyene ini emi ẹsitiede ẹkpep nte ẹkpemụmde mme itien̄wed Bible ẹdọn̄ ke ibuot. Ekeme ndinam emi ke ndida n̄kpri babru n̄wet itien̄wed ke n̄kan̄ kiet ye mme ikọ itien̄wed oro ke n̄kan̄ eken. Owo mmọ kiet kiet ẹyese m̀mê iyekeme nditịn̄ se idude ke itien̄wed oro ke ibuot mîdịghe m̀mê iyeti ebiet oro ikọ itien̄wed oro odude ke Bible. Ndidomo nse nte ikpọkwọrọde ikọ ye nte ikpadade Bible ikan eneni nnyụn̄ mbọrọ mbụme esin̄wam n̄ko ndifori usọ nnyịn.
5. Ntak emi ikpoyomde ndida Bible mfori usọ nnyịn?
5 Idụhe n̄wed efen oro ẹkemede ndimen ndomo ye Bible. Enye ikpọn̄ ọdọn̄ọ mme uwetn̄kpọ oro ẹkemede ndinam owo enyene “ọniọn̄ ọbọ edinyan̄a.” (2 Tim. 3:15) Sia ediwak owo oro ẹdude ke efakutom nnyịn mîmeheke ye mme ọsọn̄urua n̄kpọuto emi ẹdude ke Bible, nnyịn imenyene eti ntak ndifori usọ nnyịn ke ndiwụt mmọ se Bible ekemede ndinen̄ede nnam nnọ mmọ.—N̄ke 2:1-5.