Didie ke Ọkpọbọrọ?
1. Ntak akpanade itiene uwụtn̄kpọ Jesus ke ini ẹbụpde nnyịn mbụme?
1 Mme owo ẹsụk ẹdodu ke n̄kpaidem tutu esịm emi ẹban̄a nte Jesus ekesikụtde unen ke ndibọrọ mme owo mbụme. Ke ini ẹbụpde nnyịn nsio nsio mbụme ke an̄wautom, ọyọfọn ikpebe Jesus ke nte ibọrọde mme mbụme emi.—1 Pet. 2:21.
2. Nso ikeme ndin̄wam nnyịn ibọrọ mbụme uforo uforo?
2 Bem Iso Nọ N̄kpan̄utọn̄: Jesus ama esikere aban̄a ntak emi mme owo ẹkesibụpde mbụme. Ndusụk ini ẹsiyom ẹbụp mbụme man ẹtịm ẹfiọk se idude ke ekikere owo oro obụpde mbụme oro. Owo emi obụpde fi m̀mê emenịm Jesus ke akpanikọ, ekeme ndinen̄ede n̄kop n̄kpaidem ndifiọk ke afo usudiaha Christmas. Edieke ọfiọkde se inamde owo oro obụp mbụme oro, eyekeme ndinen̄ede n̄kọk ibuot ye enye.—Luke 10:25-37.
3. Mmọn̄ ke nnyịn ikeme ndikụt mme ibọrọ N̄wed Abasi oro ẹnọde uyụhọ?
3 Da Ikọ Abasi Nọ Ibọrọ: Mfọnn̄kan n̄kpọ esidi ndida Bible mbọrọ mbụme oro. (2 Tim. 3:16, 17; Heb. 4:12) N̄kpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible ye Mme Ibuotikọ Bible Ndida Nnyene Nneme ẹmen̄wam ndinọ nnennen ibọrọ. Idem ke ini owo oro obụpde mbụme mînyịmeke ke Bible edi N̄wed Abasi, afo emekeme ndida mbufiọk n̄wụt enye se Ikọ Abasi ekpepde. Sịn udọn̄ nọ owo oro nditịm n̄kere mban̄a n̄wọrọnda ọniọn̄ oro ẹkụtde ke Bible. Edieke ekpebede Jesus, mme ibọrọ fo ẹyebiet “apple o-gold ke usan e-silver”—ẹditie uku uku, ẹnem ẹnyụn̄ ẹnyene ufọn.—N̄ke 25:11.
4. Mme ini ewe ke ọfọn nditre ndibọrọ kpukpru mbụme?
4 Ndi Akpana Ibọrọ Kpukpru Mbụme? Edieke mûfiọkke ibọrọ mbụme, kûkop bụt ndidọhọ ete: “Ami mfiọkke ibọrọ mbụme emi, edi mmekeme ndinam ndụn̄ọde nnyụn̄ mfiak ndinọ fi ibọrọ.” Nsụhọdeidem ye udọn̄ oro enyenede ke idem enyeneufọk ekeme ndinam enye ọdọhọ fi afiak edi. Edieke okụtde ke owo oro mîsimaha utom nnyịn obụp mbụme man ọtọn̄ọ eneni, kpebe Jesus ke ndifiọk nte ọbọrọde. (Luke 20:1-8) Kpasụk ntre, edieke owo emi mînyeneke udọn̄ ke etop fo oyomde ndifan̄a mfan̄a, da eti ido tre nneme oro nnyụn̄ da ini fo yom mbon oro ẹnyenede eti esịt.—Matt. 7:6.
5. Nso uwụtn̄kpọ ke Jesus ekenịm kaban̄a nte ẹkpebọrọde mbụme? (Se n̄ko ekebe oro odude ke page emi.)
5 Jesus ama ọfiọk ke ndibuọt idem ye Jehovah ayan̄wam imọ ‘itie ntiense inọ akpanikọ,’ ndien emi esịne ndibọrọ mme mbụme oro mbon esịt akpanikọ ẹbụpde. (John 18:37) Nso ifet ke nnyịn inyene ntem ndikpebe Jesus ebe ke ndibọrọ mbụme “mbon oro ẹnyenede eti esịt ndinyene nsinsi uwem”!—Utom 13:48.
Mme Akpan N̄kpọ Nditi
◼ Nen̄ede kpan̄ utọn̄ man ọfiọk se inamde owo obụp mbụme.—Luke 8:18.
◼ Da Bible bọrọ mbụme. Mme n̄wed un̄wam ukpep Bible ekeme ndin̄wam nnyịn inen̄ede ifiọk nte ikpadade Bible inam n̄kpọ.—Heb. 4:12.
◼ Nyene mbufiọk ye nsụhọdeidem, nyụn̄ da eti ido nam n̄kpọ.—Col. 4:6.