Ẹkpeme Nditọ Mbufo Ẹbiọn̄ọ Mbuaha Mbuọtidem ke Ufọkn̄wed
1. (a) Ntak emi nditọ Mme Ntiense Jehovah ẹsidude eti uwem ke ufọkn̄wed-e? (b) Ewe mfịna ke nditọ emi ẹsisobo?
1 Ke ediwak ufọkn̄wed, ẹdiọn̄ọ nditọ Mme Ntiense Jehovah ke ntak nti edu uwem mmọ. Emi edi koro mme ete ye eka mmọ ẹsisịn ukeme “ẹkama mmọ ke ntụnọ ye ke usụn̄ ukere n̄kpọ Jehovah.” (Eph. 6:4) Edi, enyene mfịna oro ufọkn̄wed esikamade. Imesiwak ndikop nte nditọ ufọkn̄wed ẹnamde oburobụt ido m̀mê ẹbiatde ibet ke ufọkn̄wed.
2. Nso ye nso ke ndusụk mme esenyịn ufọkn̄wed ẹsinam man ẹtre idiọk edu uwem nditọwọn̄ ke ufọkn̄wed?
2 Ediwak ini, man ẹtre idiọk edu uwem nditọwọn̄ ke ufọkn̄wed, mme esenyịn ufọkn̄wed ẹsidọhọ ẹkpep ukpepn̄kpọ ido ukpono, ndusụk ini ẹkotde mme ọkwọrọ ederi ẹdinam emi. Ke ndusụk ufọkn̄wed, ẹsibọn̄ akam kpukpru usenubọk mbemiso ẹtọn̄ọde n̄wed. Ẹsikwọ mme ikwọ ido ukpono ke mme mboho emi. Idem ke mme ubet ukpepn̄kpọ, ẹsikpep nditọ ufọkn̄wed ukpepn̄kpọ ye ikwọ nsunsu ido ukpono. Mme esenyịn ufọkn̄wed ẹsidọhọ ke ndibuana ke mme edinam ye mme usọrọ ido ukpono ke ufọkn̄wed edi amama ye mûmaha ye nte ke iyọdọhọ eyen ufọkn̄wed etre n̄wed ke usen ifan̄ mîdịghe ibịn enye ifep ke ufọkn̄wed edieke enye mîtieneke ibuana.
3. Nso ikpenen̄ede ibehe mme ete ye eka?
3 Ntem, enen̄ede ọfọn mme ete ye eka oro ẹdide mme Christian ẹkpeme nditọ mmọ mbak mmọ ẹditiene ẹbuana ke mme utọ edinam mbuaha mbuọtidem oro. Mmọdo mmọ ẹsinọde nditọ mmọ item N̄wed Abasi oro edin̄wamde mmọ ẹdian̄ade ẹkpọn̄ Akwa Babylon mbak mmọ ‘ẹditiene ẹbuana ke mme idiọkn̄kpọ esie,’ ẹdinyụn̄ “ẹtụk n̄kpọ ndek.” (Edi. 18:4; 2 Cor. 6:14-18) Kpukpru mbufo emi ẹnen̄erede ẹkere ẹban̄a eti itie ebuana nditọ mbufo ye Jehovah ẹmedot itoro. Nso en̄wen ke mme ete ye eka ẹkpenam man ẹkpeme nditọ mmọ ẹsio ke ubọk “asua” emi enen̄erede oyom ndita nditọwọn̄ emi mînyeneke ifiọk?—1 Pet. 5:7, 8.
4. Ini ewe ke mme ete ye eka ẹkpenyene nneme ye mme andikpep nditọ mmọ?
4 Mbemiso mfịna edemerede, ọkpọfọn mme ete ye eka ẹda ediye uduot ekpri n̄wed oro, Mme Ntiense Jehovah ye Ubọ Ukpep, ẹnyene nneme ye mme esenyịn ufọkn̄wed ye mme andikpep nditọ mmọ. Ke oro ebede, ọkpọfọn mme ete ye eka ẹwet leta oro etịn̄de in̄wan̄-in̄wan̄, ke mmemmem usụn̄, ye ke edu ukpono se idide idaha mmọ.
5. Nso edidiọn̄ ke mme ete ye eka ẹdinyene edieke mmọ ẹsịnde ukeme ẹkpeme nditọ mmọ?
5 Imọfiọk ke nditọ nnyịn ẹyeka iso ẹsobo idomo mbuọtidem sia ererimbot emi oyomde ndinụk mmọ nsịn ke usụn̄ esie. (Rome 12:2) Imenịm ke mbufo mme ete ye eka ẹyewụt ọniọn̄ ẹnyụn̄ ẹnam n̄kpọ man ẹkpeme nditọ mbufo, emi mînyeneke ifiọk, mbak mmọ ẹdibiat itie ebuana mmọ ye Abasi. (N̄ke 22:3) Ẹfiọk ẹte ke Jehovah ọyọdiọn̄ ukeme oro ẹsịnde man ẹn̄wam nditọ mbufo ẹka iso ẹsan̄a ke mfafaha inuaotop emi adade esịm uwem.—Matt. 7:13, 14.