Mme Mbono An̄wautom
1. Ntak emi isimade ndinam ndutịm nnọ utom an̄wautom?
1 Jesus ama enịm eti uwụtn̄kpọ ke ndinam ndutịm nnọ utom edikwọrọ Obio Ubọn̄. Kpasụk ntre, mbon oro ẹsede enyịn ẹban̄a utom edikwọrọ Obio Ubọn̄ oro ẹnamde ke ofụri ererimbot mfịn ẹnen̄ede ẹyom ẹnam utom emi ke ndutịm. Ntak edi oro mme esop ke ofụri ererimbot ẹsidade mme mbono an̄wautom ẹtịm mme asuanetop Obio Ubọn̄ idem ẹnọ an̄wautom.—Matt. 24:45-47; 25:21; Luke 10:1-7.
2. Nso ke ẹkpenam ke mme mbono an̄wautom?
2 Eti Ndutịm: Ẹnam mme mbono an̄wautom man ẹnọ mbon oro ẹyomde ndiwọrọ an̄wautom nsịnudọn̄, nti ukpep, ye ndausụn̄. Ẹkeme ndineme itie N̄wed Abasi eke usen oro ibio ibio edieke enye etịn̄de n̄kpọ aban̄a utom ukwọrọikọ. Ndusụk ini, ẹsisio n̄kpọ ke Utom Obio Ubọn̄ Nnyịn, Nte Ẹkpetọn̄ọde Ẹnyụn̄ Ẹkade Iso ke Nneme Bible, ye n̄wed Ufọkn̄wed Utom, ẹneme man ẹtịm kpukpru owo ke mbono oro idem ẹnọ an̄wautom usen oro. Ẹkeme n̄ko ndinam ibio ibio nnamn̄wụt ke nte ẹkpenọde n̄wed. Ẹkeme ndibọn̄ akam ediberi mbemiso m̀mê ke ẹma ẹkedeme efakutom ẹnyụn̄ ẹdian mme owo. Kpukpru owo ẹkpenyene ndidiọn̄ọ nsan̄a mmọ ye efakutom mmọ. Ke mbono emi, oro esibịghide ke n̄kpọ nte minit 15 ama akasuana, kpukpru owo ẹkpenyene ndidaha efakutom ye unana ubiatini.
3. Mmanie ẹkpenam ndutịm ẹnọ mme mbono an̄wautom?
3 Didie ke Ẹsitịm Mme Mbono An̄wautom? Esenyịn utom edinam ndutịm mbono an̄wautom. Mme esenyịn otu m̀mê udiana mmọ ẹnyene mbiomo ndisan̄a ye mme otu an̄wautom mmọ n̄wọrọ an̄wautom ke utịturua. Ndusụk mme esenyịn m̀mê mme asan̄autom unamutom ẹkeme nditiene mme otu an̄wautom n̄wọrọ an̄wautom ke ufọturua. Mme esenyịn otu ẹkpenyene ndibọ esenyịn utom efakutom oro okponde ekem man otu mmọ ẹnyene efakutom oro ekemde mmọ ndikwọrọ ikọ ke ufọk ke ufọk ke mme utịturua. Esenyịn utom edinam ndutịm ọnọ mbon oro ẹdimende otu an̄wautom ika ukwọrọikọ ke ufọturua.
4-6. (a) Nso ebuana ke mbono an̄wautom enyene ye efakutom esop? (b) Nso ye nso ikpanam ẹbiere nte ẹnịmde mme mbono an̄wautom?
4 M̀mọ̀n̄ ye Ini Ewe ke Ẹkpenịm Mbono Emi? Utu ke ndinam kpukpru owo ke esop ẹkeboho ọtọkiet, esinen̄ede ọfọn ẹnam ndutịm man ẹsinịm mme mbono an̄wautom ke nsio nsio itie oro ẹdifọnde ye mme owo, oro esiwakde ndidi ke ufọk mme owo, man ẹkeme ndikwọrọ ikọ ke ofụri efakutom. Ẹkeme n̄ko ndinịm mbono an̄wautom ke mme Ufọkmbono Obio Ubọn̄. Ediwak esop ẹsinịm mbono an̄wautom ke Ufọkmbono Obio Ubọn̄ ke ẹma ẹkekụre utịn̄ikọ an̄wa ye Ukpepn̄kpọ Enyọn̄-Ukpeme ke Sunday. Ẹkpenyene ndinam eti ndutịm man ebiet emi ẹnịmde mbono an̄wautom ekpere efakutom. Mmọdo, ẹkpenyene ndidụn̄ọde ndutịm oro ẹnamde ke ini ke ini man ẹkụt ẹte ke mme itie oro ẹnịmde mme mbono an̄wautom ọfọn oyonyụn̄ anam ẹkeme ndikwọrọ kpukpru efakutom.
5 Nte efakutom etiede edibiere mfọnn̄kan ini oro ẹkpenịmde mbono emi ye ibat ini oro ẹkpenịmde ke urua ke urua. Mme mbụme oro ẹtienede mi ẹyen̄wam ẹbiere mfọnn̄kan itie ye ini oro ẹkpenịmde mme mbono an̄wautom.
6 Ewe efakutom oyom ẹnen̄ede ẹnọ ntịn̄enyịn? Ini ewe enen̄ede ọfọn ẹka ukwọrọikọ ke ufọk ke ufọk? Ndi ọkpọfọn ẹsinam utom eke ufọk ke ufọk m̀mê mfiakn̄ka ke mbubreyo? Ẹkpenyene ndidian kpukpru ndutịm an̄wautom ke obukpọk ntọt esop. Ọdọn̄ kpukpru mme asuanetop Obio Ubọn̄ ndikwọrọ ikọ ke kpukpru efakutom mmọ tutu ẹkeme nditịn̄ nte apostle Paul eketịn̄de ete: ‘Nnyeneke aba efakutom eke owo mînamke utom.’—Rome 15:23.
7. Nso mbiomo ke owo oro ẹdọhọde enịm mbono an̄wautom enyene?
7 Ndinịm Mme Mbono An̄wautom: Edieke owo emi ẹdọhọde enịm mbono an̄wautom etịmde idem ọfọn, oro oyowụt ke enye okpono ndutịm oro. Ẹkpenyene nditọn̄ọ mbono emi ke ini, ẹneme mme n̄kpọ oro ẹdin̄wamde mme owo ke an̄wautom, ẹnyụn̄ ẹnam enye edi ibio ibio, ke n̄kpọ nte minit 10 m̀mê 15. Akpana owo emi enịmde mbono emi ọdiọn̄ọ efakutom oro ẹdikwọrọde mbemiso ọtọn̄ọde mbono emi. Okposụkedi emi mîfọnke ẹda ẹbet mbon oro ẹdidide ke mbono an̄wautom ama akasuana, ọyọfọn ẹnịm etop ẹnọ mmọ man mmọ ẹdiọn̄ọ ebiet oro ẹdikwọrọde ikọ. Kpukpru owo ẹkpenyene ndidaha n̄ka efakutom mmọ ndondo oro mbono an̄wautom asuanade. Nti n̄kpọ oro ẹdinemede ye item oro ẹdinọde ke mbono an̄wautom ẹkeme ndinọ kpukpru owo oro ẹbuanade ndausụn̄ ke an̄wautom usen oro.—N̄ke 11:14.
8. Didie ke mbon oro ẹdụkde mbono an̄wautom ẹkeme ndibere ye mbon oro ẹdade usụn̄?
8 Ndidụk Mme Mbono An̄wautom: Oyom kpukpru nnyịn ibere ye ndutịm emi. (Heb. 13:17) Edieke ekemede, owo emi esede aban̄a otu an̄wautom ayan̄wam owo ekededi oro oyomde owo emi enye edisan̄ade kiet. Ọyọfọn mme asuanetop oro ẹnyenede mbufiọk ẹdu man ẹn̄wam mbufa owo ye mme asuanetop oro mînen̄ekede inyene mbufiọk. Mbon oro ẹnyịmede ẹdian mmimọ ẹnọ owo en̄wen ndusụk ini ẹkeme ndinam ekese ufọn. (N̄ke 27:17; Rome 15:1, 2) Akpana kpukpru owo ẹdomo ukeme ndikesịm ebiet emi ẹnịmde mbono an̄wautom ke ini. Ukpono oro inyenede inọ ndutịm ukara Abasi emi ye edikere mban̄a nditọete nnyịn ayanam inam mme ukpụhọde oro ẹyomde ke mme afan̄ emi.—2 Cor. 6:3, 4; Phil. 2:4.
9. Mme akpan usụn̄ ewe ke mme asiakusụn̄ ẹkeme ndinọ ndutịm emi ibetedem?
9 Nte Mme Asiakusụn̄ Ẹkemede Ndin̄wam: Un̄wam emi mme asiakusụn̄ ẹsisịnde ke mbono an̄wautom enen̄ede edi akpan n̄kpọ, esinyụn̄ esịn udọn̄ ọnọ kpukpru owo. Imọdiọn̄ọ ke mme asiakusụn̄ ẹnyene ediwak mbiomo. Mmọ ẹsise ẹban̄a ubon mmọ ẹnyụn̄ ẹnam utom idịbi udia, ke adianade ye edinịm ukpepn̄kpọ Bible nnyụn̄ nnam mfiakn̄ka. Ntem, mme asiakusụn̄ ikpekereke ke oyom mmimọ idụk kpukpru mbono an̄wautom oro esop odiomide, akpan akpan edieke ẹsinịmde mbono emi kpukpru usen. Nte ededi, etie nte mme asiakusụn̄ ẹyekeme nditiene ndụk ndusụk mbono an̄wautom ke urua. Imesikpep ekese n̄kpọ ke mbono an̄wautom, n̄ko ifiọk Ikọ Abasi ye ifiọkutom an̄wautom mme asiakusụn̄ ẹkeme ndinen̄ede n̄n̄wam mbon en̄wen. Mmọ ndisiwọrọ an̄wautom ke ubọk ke ubọk anam mmọ ẹnyene ekese ifiọk. Mbon en̄wen ẹkeme ndibọ ufọn nto ifiọk emi. Nte mmọ ẹnamde utom ukwọrọikọ ifịk ifịk ẹnyụn̄ ẹtienede ẹdụk mme mbono an̄wautom edi eti uwụtn̄kpọ ọnọ mbon en̄wen ndikpebe. Ẹnen̄ede ẹkọm mmọ ke nte mmọ ẹsitienede ẹdụk mme mbono an̄wautom.
10. Ntak emi kpukpru mme asuanetop Obio Ubọn̄ ẹkpeberede ye ndutịm emi ke ofụri esịt-e?
10 Ata akamba ikpehe ke utom edikwọrọ Obio Ubọn̄ nnyịn emi edi ndikwọrọ ikọ ke ufọk ke ufọk ukem nte Jesus ye mme mbet esie ẹkesinamde. Ẹdiomi mme mbono an̄wautom man ẹsịn udọn̄ ẹnọ mme owo ẹnyụn̄ ẹnam mme owo ẹtiene ẹbuana ke utom emi ọyọhọ ọyọhọ. Kpukpru mme asuanetop ẹkpenyene ndibere ye utọ ndutịm ukara Abasi emi ke ofụri ukeme mmọ. (Utom 5:42; 20:20) Kpukpru nnyịn ikpakam inam ukpụhọde oro anade inam man inọ ndutịm emi ibetedem. Ima inam ntre, imekeme ndidori enyịn ke Jehovah eyenen̄ede ọdiọn̄ nnyịn, emi onyụn̄ ekeme ndinam esịt adat Adausụn̄ nnyịn, kpa Jesus Christ, nte ikwọrọde eti mbụk Obio Ubọn̄ Abasi.—Matt. 25:34-40; 28:19, 20.