Ndise Mban̄a Nsọn̄idem eke Spirit Mme Asuanetop Emi Ẹwọrọde Idụn̄
1. (a) Ke ini asuanetop ọwọrọde idụn̄, nso ke mme ewetn̄wed akani ye obufa esop ẹkpenam? (b) Mmanie ẹkpesịn ubọk ke leta edimen owo n̄wụt? (c) Ini ewe ke ẹkpenọ (mme) kad aka obufa esop?
1 Ndusụk ini mme asuanetop ẹsiwọrọ idụn̄. Man itie ebuana mmọ ye Abasi osụk okop idem, ana mme asuanetop oro ẹsọsọp ẹtọn̄ọ ndibuana ye esop oro ekperede obufa ebietidụn̄ mmọ akan ẹnyụn̄ ẹnam mbiowo ẹdiọn̄ọ mmọ. (N̄ke 18:1) Edieke asuanetop editiede ebe ọfiọn̄ ita ke ebiet oro enye akade, enye ekpenyene ndinam ewetn̄wed obufa esop ọdiọn̄ọ enyịn̄ ye adres akani esop esie man ewetn̄wed ekeme ndiwet nyom (mme) kad Congregation’s Publisher Record ye leta edimen owo n̄wụt emi kọmiti utom ẹsịnde ubọk. Edieke enye ọdiọn̄ọde enyịn̄ ye adres esop emi enye akade, enye ekpenyene nditịn̄ nnọ ewetn̄wed esop mbemiso ọkpọn̄de. Kọmiti utom ke ntem idibetke-bet obufa esop ewet mmimọ mbemiso ẹnọde mme n̄kpọ emi.—Se Ẹtịm man Inam Uduak Jehovah, page 88.
2. Nso ke ẹkpenam man ẹkụt ẹte ke (mme) kad asuanetop ye leta oro ẹwetde ẹban̄a enye ẹkesịm ebiet ẹnọde mmọ ẹka?
2 Edieke usụn̄ oyomde, ẹkpenyene ndinọ n̄kọk itieutom (mme) kad emi man ẹnọ ẹsọk obufa esop. Emi ayanam kad oro isopke. Edieke obufa esop odude ekpere, mbiowo ẹkeme ndimen mme n̄kpọ emi n̄kọnọ ke ubọk. Akpana akani esop enyene (mme) kad ye leta edimen owo n̄wụt eke mmọ tutu mmọ ẹfiọk ke obufa esop ẹbọ enye oro ẹkenọde ẹsọk mmọ.
3. Didie ke ẹkpese ẹban̄a ibatutom mme asuanetop oro ẹdide esop obufa, ndien nso ke ẹkpenam ke ini kad mmọ edide edisịm?
3 Edieke otode ntak kiet m̀mê eken owo ibakke ibọ kad emi, ewetn̄wed obufa esop ikpewetke ibatutom an̄wautom esie idọn̄ ke obufa kad, edi ekpenyene ndibon kpukpru ibatutom an̄wautom asuanetop emi tutu kad esie edisịm. Ke ẹma ẹkebọ kad oro, ewetn̄wed oyosion̄o ibatutom emi ọdọn̄ ke kad oro onyụn̄ atan̄ kpukpru mmọ adian ye ibatutom an̄wautom esop eke ọfiọn̄ oro, nte ekemde ye ndausụn̄ oro ẹma ẹkenọnọ ke nte ẹkpesede ẹban̄a ibatutom oro ẹnọde ke idiọk ini.
4. Didie ke nnyịn ikeme ndin̄wam mbon oro ẹwọrọde idụn̄?
4 Mbiowo, mme ete ye mme eka m̀mê mme iman, ye ekemmọ mme Christian ẹkpenyene nditi mme asuanetop oro ẹwọrọde idụn̄ se mmọ ẹkpenamde man ẹka iso ẹbuana kpukpru ini ye obufa esop mmọ. Kpukpru owo ke obufa esop, akpan akpan mbiowo, ẹkpenyene ndinyene udọn̄ ke idem mbufa asuanetop, ẹn̄wana ẹdiọn̄ọ ebiet mmọ ẹdụn̄de ẹnyụn̄ ẹn̄wam mmọ ẹmehe ye obufa n̄kann̄kụk mmọ.—Rome 15:7; 2 Cor. 6:11-13.