Ẹtoro Jehovah Kpukpru Usen
1. Nso ke ẹsịn udọn̄ ẹnọ mme asan̄autom Abasi ndinam, ndien ntak-a?
1 Edidem David ama etịn̄ ubiere esie nditoro Jehovah “kpukpru usen,” idem ke nsinsi nsinsi. (Ps. 145:2, 7, 21) Nnyịn n̄ko imenyene eti ntak nditoro Jehovah kpukpru usen.—Ps. 37:10; 145:14, 18; 2 Pet. 3:13.
2. Didie ke mme ubon ẹkeme nditoro Jehovah kpukpru usen?
2 Ke Ufọk Nnyịn: Nnyịn imenyene mme n̄wed emi ikemede ndida nneme n̄kpọ mban̄a Abasi ye Bible ke ini ikerede iban̄a itie N̄wed Abasi eke usen ke usen, ke ini Utuakibuot Ubon, ye ke ini itịmde idem inọ mme mbono esop. Ediwak ubon ẹsidia udia ọtọkiet ke nsụhọde n̄kaha ini kiet ke usen. Ndidia udia ọtọkiet anam owo inemeke nneme itọk itọk onyụn̄ ọnọ mmọ ifet nditoro Jehovah. Utọ nneme oro, emi mme ete ye eka ẹkemede ndineme, ekeme ndinen̄ede n̄n̄wam mmọ ẹbọk nditọ mmọ ke “ntụnọ ye ke usụn̄ ukere n̄kpọ Jehovah.”—Eph. 6:4; Deut. 6:5-7.
3. Mme ifet ewe ke inyene ke ini idude ye nditọete nnyịn?
3 Ye Nditọete Nnyịn: Ke ini idude ke an̄wautom m̀mê ke mme mbono esop, nnyịn imenyene nti ifet nditoro Jehovah ye ekemmọ mme andinịm ke akpanikọ. (N̄ke 15:30; Phil. 4:8; Heb. 13:15) Sia kpukpru nnyịn imade Jehovah, ikpenyene nditịn̄ esịtekọm oro inyenede ke ntak mfọnido Jehovah ke ini inemede nneme ye kiet eken.—Ps. 106:1.
4. Ke mme idaha ewe ke afo ekeme nditoro Jehovah?
4 Ke Ini Inemede Nneme ye Mbon Oro Mînịmke ke Akpanikọ: Okposụkedi nte n̄kpọ etiede ekemede ndinam nnyịn iwọrọke an̄wautom kpukpru usen, nditịn̄ ikọ ọkpọkọm ke esisịt ini ye mme nsan̄autom, nsan̄a ufọkn̄wed, ye mbon en̄wen emi ẹdude ẹkpere nnyịn mban̄a Jehovah ye mme uduak esie ekeme ndinam mbon esịt akpanikọ ẹnyene idotenyịn. (Ps. 27:14; 1 Pet. 3:15) Ke ini akakade isan̄ ke ubomofụm, eyenete an̄wan kiet ama ọnọ akaisan̄ kiet ikọ ntiense. Se n̄wan oro okokopde ama enen̄ede ọnọ enye ndọn̄esịt ye nsịnudọn̄ tutu enye ọnọ eyenete nnyịn oro adres ye nọmba urụk ukopikọ esie man mmọ ẹkpekeme ndika iso ke nneme oro. Nte ererimbot emi ọdiọn̄de-diọn̄ ọdiọk, ikọt Jehovah ke ẹka iso ‘ẹkwọrọ emem ẹnyụn̄ ẹbụk nti n̄kpọ’ ẹnọ mbon oro ẹkpan̄de utọn̄ ẹnọ mmọ. Emi anam mbon en̄wen ẹnyene idotenyịn onyụn̄ anam mmọ ẹtoro Jehovah.—Isa. 52:7; Rome 15:11.
5. Ntak emi ọdọn̄de nnyịn nditoro Jehovah, ndien nso utịp ke emi ekeme ndinyene?
5 Esinem Jehovah didie ntem ndikop nte mme asan̄autom esie ẹtorode enye kpukpru usen! Ukem nte mme edibotn̄kpọ Jehovah oro ẹdude ẹkan nnyịn ẹkụk, nnyịn n̄ko imotoro Jehovah kpukpru usen ke ufọk nnyịn, ke esop, ye ke ini itịn̄de ikọ inọ mbon en̄wen emi mîdịghe mme anditoro Jehovah kan̄a.—Ps. 19:1-4.